29
Ili ya atakaci a kubana a̱ likuci i Dawuda
1 Ili ya atakaci i ɗa a kubana wa̱ nu, Ariyelu, Ariyelu,
likuci i na Dawuda u da̱sa̱ngi.
ka̱ya̱ dem
ɗa va kulyaꞋa kelime n kuyaꞋan ka̱ɗiva̱ ka̱ nu.
2 N nannai dem mi ta̱ a̱ kutuka̱ Ariyelu
n atakaci, wi ta̱ a kuyaꞋan kpalu ka̱ta̱ u shika̱,
wi ta̱ o kokpo an katalikalyuka wa̱ va̱ upali nu mpasa.
3 Mi ta̱ a kubanka likuci ya n kuvon,
n kambuku i ɗa ka̱ta̱ n shilika̱ n i ɗa,
mi ta̱ a kumaꞋa idasakpatsu i mashilya
adama a na m banka n kuvon.
4 I ta̱ o kubonoko wu ka̱ca̱pa̱ punu a iɗika ka̱ta̱ vi yaꞋan kadanshi,
kadanshi ka̱ nu ki ta̱ a̱ kuzuɗa̱ punu a̱ kubuta̱.
Ka̱la̱ka̱tsu ka̱ nu ki ta̱ o kokpo tsu ka̱la̱ka̱tsu ka kafataluwa punu a iɗika,
ka̱la̱ka̱tsu ka̱ nu ki ta̱ o kuyongo e yemeni punu a̱ kubuta̱.
5 Ama irala i nu n a̱bunda̱i yi ta̱ o kubono an kubuta̱ ku lenwu,
aza a na i a kutamba wu i ta̱ a kulaza an kopo ka na ko tsu tono wunla̱i.
Ki ta̱ a kuyaꞋan nannai gogoꞋo, babu uzuki
6 Vuzavaguɗu MalaꞋimili wi ta̱ a̱ kuta̱wa̱
n akpanga n kugba̱ɗa̱ ki iɗika n kacaꞋa ka gbangam,
n wunla̱i wu utsura m melentsu ma akina ma na mi a̱ kukula̱.
7 Ka̱ta̱ ka̱bunda̱i ka aduniyan ra̱ka̱ ka na ka̱ shilika̱i n Ariyelu,
koɓolo n aza a na a̱ shilika̱i n a̱yi ali n ubuta̱ wu utsura u ni dem ɗa a kambuki ni,
wi ta̱ o kokpo adanshi alatani a ɗa,
tsu kene ku na ku tsu ta̱wa̱ vuma n kayin.
8 Tsu na vuza vu kambulu u ci yaꞋan alatani a na wi a kulyaꞋa ilikulyaꞋa,
ka̱ta̱ u ɗa̱nga̱ baci u cina kambulu ka ka buwa yi ta̱,
tsu vuza na wi a kupana kakuli u ci yaꞋan alatani a na wi o kusoꞋo mini,
ama ka̱ta̱ u jimgba u cina kakuli ka̱ ni a kulyaꞋa kelime n kutakacika yi.
Nannai ɗa ka kuyaꞋan n iɗika kakau n a̱bunda̱i
i na u shilika̱i n Kusan ku Sihiyona.
9 YaꞋan tsulau ka̱ta̱ kpamu vi yaꞋan mereve,
lyaꞋa kelime n kubonoko ka̱ci ka̱ nu ka̱yimba̱.
Maka ka̱ci ka̱ nu n ili i yoku babu vu soꞋo ma̱ra̱,
okpo ga̱lu babu vu soꞋo i na i kumaka wu.
10 Vuzavaguɗu u tuka̱ ɗa̱ ta̱ n alavu a na a̱ kuwa̱i.
U paɗarai a̱shi a̱ ɗa̱, a̱ɗa̱ eneki,
u palai aci a̱ ɗa̱, a̱ɗa̱ oboci.
11 Wa̱ nu kene ku nampa dem ili i ɗa ba, ama tsu kadanshi ka na ki u ɓa̱ya̱ngi a katagarda. Vu neke baci katagarda ka u vuza na u kufuɗa we kece, ɗa a danai ni, <<Adama a̱ Ka̱shile kece,>> wi ta̱ a̱ kushuku ka̱ta̱ u dana, <<Ma kufuɗa ba, ki ta̱ uɓa̱ya̱ngi.>>
12 Ko vu neke baci katagarda ka u vuza na u yevei mekecu ba, ɗa vu danai, <<Adama a̱ Ka̱shile kece,>> wi ta̱ a̱ kushuku ka̱ta̱ u dana, <<N yeve mekecu ba.>>
13 Ɗa Vuzavaguɗu u danai,
<<Uma a nampa a tsu dana ta̱ ele uma a̱ va̱ a ɗa i ama n una̱,
ka̱ta̱ kpamu e neke mu tsugbayin n una̱ koci,
ama punu a̱ a̱ɗu e le, i ta̱ daꞋin nu mpa.
Kucikpa ku na a ci yaꞋan a kubana wa̱ va̱,
kuta̱ ta̱ a̱ ubuta̱ u kuyotsongusu ku uma.
14 Adama a nannai kpamu, mi ta̱ a kuyaꞋan ili i mereve n uma a nampa,
ili i mereve kakau,
ka̱ta̱ kuyeve ka aza a ugboji e le ku na̱mgba̱,
ugboji wa aza a ugboji e le u kotso.>>
15 Ili ya atakaci i ɗa a kubana wa aza a na o tsu sokongu
kuyeve ku le daꞋin adama a Vuzavaguɗu,
ele na a ci yaꞋan ulinga u le a̱ ka̱yimbi ka̱ta̱ e sheshe a dana,
<<Yayi we enei tsu? Yayi u kuyeve i na ci yaꞋin?>>
16 I sabaꞋi ili ɗa i bonokoi i ɗa mavadai,
adanshi e sheshe ta̱ kamaꞋi ko mogbodo ko bono ciꞋin tsu kumaꞋa,
ili i na a yaꞋin va yi ta̱ a kudana yayi u yaꞋin mu,
<<A̱yi ɗa u yaꞋin mu ba>>?
Mogbodo mi ta̱ a kudana kamaꞋi ka,
<<U yeve ili ba>>?
17 M megeshe kenu, Lebano wi ta̱ o kubono iɗika i tsuta̱,
ka̱ta̱ ubuta̱ u tsuta̱ u yotso an kakamba ba?
18 A kanna ka nanlo kagulani ki ta̱ a kupana vuza yoku e kukece katagarda,
ka̱ta̱ ka̱yimba̱ kene
wo kudoku wo yongo a̱ ubuta̱ u ka̱yimbi ba.
19 Aza a na o goyoi ka̱ci ke le i ta̱ a kuyaꞋan ma̱za̱nga̱ a̱ ubuta̱ u Vuzavaguɗu,
aza a unambi a yaꞋan ma̱za̱nga̱ adama a vuza Ciɗa vi Isaraila.
20 Aza a ugbamukaci i ta̱ o kukotso,
aza a na a ci yaꞋan ulami i ta̱ o kukotso,
ka̱ta̱ aza a na a kiwanai n kuyaꞋan ku ukuna u wuya a yaꞋan wuni,
21 aza a na n kadanshi ku una̱ koci a tsu zuwa vuma u yaꞋan unushi
i ta̱ a kaza vuza na wi n kadanshi ka mayun a̱ ubuta̱ wa afada,
koɓolo n aza a na a ci yaꞋan aꞋuwa adama a na a̱ la̱nga̱sa̱ aza a usuɓi.
22 Adama a nannai ili i na Vuzavaguɗu vu na u shiba̱i Ibirahi u danai kpaꞋa ku Yakubu i ɗaɗa na,
<<Yakubu wo kudoku wa yaꞋan wono kpamu ba,
a̱shi a̱ ni o kudoku a runza ba.
23 Makyan ma na baci we enei muku n ni,
adama a ulinga we ekiye u va̱,
i ta̱ a kuzuwa kula ku va̱ ku yongo ciɗa,
ka̱ta̱ o bonoko vuza Ciɗa vu kpaꞋa ku Yakubu wo okpo ciɗa kpamu.
I ta̱ a kushamgba n uneki u tsugbayin a kubana u Ka̱shile ka Yakubu.
24 Ka̱ta̱ uma a na a̱ puwa̱nka̱i punu a̱ a̱ɗu e le o bono a̱ ciya̱ kuyeve,
aza a̱ ka̱sa̱la̱ kpamu i ta̱ a kisa odoki.>>