8
1 Ɗa Vuzavaguɗu u danai Musa, <<Bana u Firi'auna ka̱ta̱ vu dana yi, <Ili i na Vuzavaguɗu u danai i ɗaɗa na, ka̱sukpa̱ uma a̱ va̱ a wala adama a na a̱ ciya̱ a bana a cikpa mu.
2 Ama vu sa̱nka̱ le baci kulaza, mi ta̱ a̱ kutuka̱ m ma̱dukpa̱ mo opoɗo punu a iɗika i nu dem.
3 Kuyene ku Nilu ki ta̱ a kushana n opoɗo. I ta̱ a̱ kuta̱ ka̱ta̱ a uwa e kefeku ka̱ nu, n kunu ku kasa ku nu ali a gaɗi vu kajiba ka̱ nu, n i'uwa ya aza a̱ gba̱ra̱-gba̱ra̱ a ulinga a̱ nu, n uma a̱ nu ra̱ka̱. I ta̱ kpamu a ku'uwa e kenle ka̱ kuya̱na̱ koɓolo m masasu ma kulapaka kiya ka akala dem.
4 Opoɗo a i ta̱ a kuɗikpangusu n a carai nu n uma a̱ nu dem, koɓolo n aza a̱ gba̱ra̱-gba̱ra̱ a̱ nu feu.> >>
5 Ɗa Vuzavaguɗu u danai Musa, <<Dana Haruna, <Ɗengusa̱ kalangu ka na ki e kukiye ku nu vu sapangu nɗolu dem, ni nyeneke, n adaɓa. Opoɗo i ta̱ a̱ kuta̱ a Masar, ka̱ta̱ a pala iɗika ya.> >>
6 Ɗa Haruna u ɗengusa̱i kukiye ku ni, ɗa u sapangi nɗolu m Masar dem, ɗa a̱ uta̱ka̱i n opoɗo a na a palai ubuta̱ dem.
7 Ɗa oboci e le feu ɗa a ya'in nannai n utsura u le, a zuwai opoɗo a̱ uta̱i punu a iɗika ya.
8 Ɗa Firi'auna u ɗekei Musa n Haruna ɗa u danai le, <<Folonokoi mu Vuzavaguɗu adama a na u takpaka mu ma̱dukpa̱ mo opoɗo ma mpa n uma a̱ va̱, mi ta̱ a̱ kuka̱sukpa̱ uma a̱ nu a wala a bana a ya'anka Vuzavaguɗu alyuka.>>
9 Ɗa Musa u danai Firi'auna, <<N neke wu ta̱ tsugbayin. Zagba ayin a na vi cigai n folono Vuzavaguɗu adama a̱ nu n uma a̱ nu, ciya̱ avu m kpa'a ku nu yu uvuka m ma̱dukpa̱ mo opoɗo ma, ka̱ta̱ a̱ ka̱sukpa̱ a na i o Kuyene ku Nilu koci.>>
10 Ɗa Firi'auna u danai, <<Mkpa vu nampa.>> Ɗa Musa u danai, <<M pana ta̱, mi ta̱ a kuya'an tsu na vu danai, adama a na vu yeve ta̱ babu vuza na wi lo tsu Vuzavaguɗu Ka̱shile ka̱ tsu.
11 Opoɗo a i ta̱ a̱ kuka̱sukpa̱ wu m kpa'a ku nu, n aza a̱ gba̱ra̱-gba̱ra̱ a̱ nu, n uma a̱ nu, a na o kokpo koci a ɗaɗa a na i o Kuyene ku Nilu.>>
12 Ana Musa n Haruna a̱ uta̱i ɗa a̱ ka̱sukpa̱i Firi'auna, ɗa Musa u ya'in kavasa a kubana u Vuzavaguɗu ciya̱ u takpa ma̱dukpa̱ mo opoɗo ma na u tuka̱i Firi'auna.
13 Ɗa Ka̱shile ka ya'in tsu na Musa u folonoi, ɗa opoɗo a na i a kpa'a n a na i o oyonto n ashina dem a̱ kuwa̱i.
14 Ɗaɗa o ɓolongi opoɗo a otoro-otoro, ali ɗa iɗika ya yo okpoi n ushami.
15 Ama ana Firi'auna we enei ukuna wo opoɗo wa u jebe ta̱, ɗa u doku u ya'in ugbamukaci. U panaka Musa n Haruna ba, uteku tsu na Vuzavaguɗu u danai ɗe.
Ma̱dukpa̱ mi ikurukpatai
16 Ɗa Vuzavaguɗu u danai Musa, <<Dana Haruna, <Ɗengusa̱ kalangu ka̱ nu ka̱ta̱ vu lapa iɗika. Kubuta̱ ki iɗika ku na ku ɗa̱nga̱i ki ta̱ o kokpo ikurukpatai a iɗika i Masar ra̱ka̱.> >>
17 Ɗa ta na a ya'in nannai, ana Haruna u ɗengusa̱i kalangu ka̱ ni, ɗa u lapai iɗika ɗa kubuta̱ ku ɗa̱nga̱i. Ɗa ta na ko okpoi ikurukpatai, ɗa ikurukpatai ya i ka̱na̱i kutakacika uma a Masar ra̱ka̱, ali nu nnama n le dem. Ɗa kubuta̱ ki iɗika ka dem ko okpoi ikurukpatai.
18 Ama ana oboci e le a cigai kuya'an nannai n ciboci ci le, a fuɗa ba. Ko n nannai dem, ɗa ikurukpatai i ka̱na̱i kutakacika uma nu nnama.
19 Ɗa oboci a danai Firi'auna, <<Na va gbani ɗa ba, kukiye ku Ka̱shile ku ɗa.>> Ama ka̱ɗu ka Firi'auna ko doku ka gbamasakai, ali ɗa u iwain kupana. Uteku u na Vuzavaguɗu u danai ɗe.
Ma̱dukpa̱ ma ayun
20 Ɗa Vuzavaguɗu u danai Musa, <<Ɗenga̱ mkpa'a n usana, vu gasa n Firi'auna ayin a na wi a kubana e kuyene ka, ka̱ta̱ vu dana yi, <Ili i na Vuzavaguɗu u danai i ɗaɗa na, ka̱sukpa̱ uma a̱ va̱ a laza a bana a ya'anka mu a̱ga̱nda̱.
21 Vu ka̱sukpa̱ baci uma a̱ va̱ a lazai ba, mi ta̱ a̱ kusu'uku ɗa̱ n ka̱kuma̱ ka ayun, avu n aza a̱ nu, n aza a̱ gba̱ra̱-gba̱ra̱ a̱ nu dem, n i'uwa i le. Punu a i'uwa ya aza a Masar yi ta̱ a kushana n ayun, ali a̱ kimba̱i iɗika dem.
22 <<<Ama a kanna ka nanlo, mi ta̱ a kukanza iɗika i Goshon a̱ ubuta̱ u na uma a̱ va̱ i, ayun a kusa'wa ɗe ba. Adama a na vi yeve a na mpa Vuzavaguɗu mi ta̱ kpamu punu a iɗika i nampa.
23 Mi ta̱ a kuzuwa urotu u na u kupecuku uma a̱ va̱ n uma a̱ nu, urotu wi ili i mereve i nampa yi ta̱ a̱ kuta̱wa̱ makpa'a.> >>
24 Ɗa ta na Vuzavaguɗu u ya'in nannai. U su'uki m ma̱dukpa̱ ma ayun a kubana e kefeku ka Firi'auna, n i'uwa ya aza a̱ gba̱ra̱-gba̱ra̱ a̱ ni a Masar dem, ɗa iɗika ya kpamu i ka̱na̱i kuna̱mgba̱ n ka̱kuma̱ ka ayun ka.
25 Ɗa Firi'auna u ɗekei Musa n Haruna u danai, <<Banai i ya'anka Ka̱shile ka̱ ɗa̱ ka alyuka punu na a iɗika ya.>>
26 Ɗaɗa Musa u danai, <<Nannai va u ya'an ba. Alyuka a na tsa kuya'anka Ka̱shile Vuzavaguɗu vu tsu i ta̱ o kokpo ili yu unata a kubana wa aza a Masar. E ene tsu baci a kuya'an alyuka a ili yu unata n a̱shi e le, i a kuvara tsu n atali ba?
27 U ga'an ta̱ ci ya'an nwalu n ayin a tatsu e meremune, ci yeve ci ya'anka Vuzavaguɗu Ka̱shile ka̱ tsu alyuka tsu na u danai.>>
28 Ɗa Firi'auna u danai, <<N kuka̱sukpa̱ ɗa̱ ta̱ i bana i ya'anka Vuzavaguɗu Ka̱shile ka̱ ɗa̱ alyuka e meremune. Ama ka̱ta̱ i bana da'in ba, gogo na ya'ankai mu kavasa bi'i feu.>>
29 Ɗa Musa u danai, <<N ka̱sukpa̱ baci na mi ta̱ a kuvasa u Vuzavaguɗu ka̱ta̱ mkpa'a u takpa ma̱dukpa̱ ma ayun ma u Firi'auna, n aza a̱ gba̱ra̱-gba̱ra̱ a̱ nu, n uma a̱ nu dem. Ama mi ta̱ a kuɓarangu wu, ka̱ta̱ vu doku vi ya̱nsa̱ tsu ba, vu doku vu sa̱nka̱ uma kubana kuya'anka Ka̱shile ke le alyuka ba.>>
30 Ɗa Musa u ka̱sukpa̱i Firi'auna, u banai u ya'in kavasa a kubana u Vuzavaguɗu ciya̱ u takpa ma̱dukpa̱ ma.
31 Vuzavaguɗu u ya'in tsu na Musa u folonoi, ɗa u takpai ma̱dukpa̱ ma ayun ma u Firi'auna, n aza a̱ gba̱ra̱-gba̱ra̱ a̱ ni, n uma a̱ ni dem ko kayun ke te ka buwa ba.
32 Ama Firi'auna u doku u ya'in ugbamukaci, u ka̱sukpa̱ uma a a laza ba.