32
Medendem ma azanariya
1 Ana Musa va u kpa̱ɗa̱i kucipa̱ a kusan ka gogo'o, ɗa uma a Isaraila ra̱ka̱ a banai a gasai u Haruna, ɗa a danai Haruna va, <<Pana, ya'anka tsu a̱ma̱li a na o kutono n a̱ tsu. Vuma vu nampa Musa, vuma na wu uta̱ka̱i tsu Masar, ci yeve ili i na i ya'in ni ba.>>
2 Ɗaɗa Haruna u danai le, <<Tuka̱i n iliyatsuvu ya azanariya ya̱ a̱ma̱ci a̱ ɗa̱, n olobo a̱ ɗa̱, n nkere n ɗa̱ i na i a ku'ukasa.>>
3 Ɗa uma a̱ la̱nsa̱i iliyatsuvu ra̱ka̱ ɗa a̱ tuka̱i ni.
4 U ɗikai ili i na e nekei ni va, ɗa u luwa̱i i ɗa, ɗa u ma'i ka̱ma̱li an medendem. Ɗa uma ra̱ka̱ a dananai, <<A̱ɗa̱ aza a Isaraila ka̱ma̱li ka̱ ɗa̱ ka'a na, ka na ku uta̱ka̱i ɗa̱ a Masar.>>
5 Ana Haruna we enei nannai, ɗa u ma'i katalikalyuka e kelime ka̱ ka̱ma̱li ke medendem ka, ɗa u danai, <<A kubana mkpa'a ka̱ɗiva̱ ki ta̱ lo adama a Vuzavaguɗu.>>
6 Kanna ke ire, uma a̱ ɗa̱nga̱i n usana ka̱li-ka̱li, ɗa a lyukai alyuka o kusongu, ɗa kpamu o doku ɗa a ya'in alyuka a̱ ma̱ta̱na̱. Ana o kotsoi nannai ɗa a̱ da̱sa̱ngi, a̱ ka̱na̱i kulya'a n o so'i, ɗa a̱ ka̱na̱i kuya'an tsugbani.
7 Ɗa Vuzavaguɗu u danai Musa, <<Cipa̱ gogo'o, adama a na uma a̱ nu a na vu uta̱ka̱i a Masar va, a̱ na̱mgba̱ ta̱ n tsugbani.
8 A̱ ka̱sukpa̱ ta̱ kutono mu, ɗa kpamu i ɗe a ya'ankai ka̱ci ke le ka̱ma̱li an medendem. A̱ kuɗa̱nku yi ta̱, ali ɗa a ya'ankai ni alyuka. Ɗa uma a i kpamu a kudana ka̱ma̱li ke le ka'a na, ka na ku uta̱ka̱i aza a Isaraila a Masar.>>
9 Ɗa Vuzavaguɗu u danai Musa, <<Mpa me ene ta̱ uma a nampa,>> uma ugbamukaci ɗa.
10 Gogo na ka̱sukpa̱ wupa u va̱ u cipa̱ we le ka̱ta̱ mu una le, ka̱ta̱ kpamu n zuwa wu vo okpo kumaci ku gbayin.
11 Ama ɗa Musa u folonoi Vuzavaguɗu u danai, <<Vuzavaguɗu yiɗa̱i i zuwai ɗa va kuya'an wupa n uma a̱ nu a na vu utukai a iɗika i Masar n utsura u gbayin n kukiye ku utsura ku nu?
12 Yiɗa̱i i zuwai ɗa va kuzuwa aza a Masar a dana vu uta̱ka̱ le ta̱ n kusheshe ku gbani-gbani adama a na vuna le a kusan ka̱ta̱ vu ni'wa̱ta̱ngu le aduniyan? N folono ta̱ ka̱ta̱ vu ka̱sukpa̱ wupa u nu wa, kucukpa vu ka̱sukpa̱ mita ma na vi sheshei kusu'uku uma a̱ nu.
13 Ciɓa n kagbashi ka̱ nu Ibirahi n Ishaku n Yakubu, aza na vu kucinakai n ka̱ci ka̱ nu, vu danai mi ta̱ a kuzuwa ntsukaya n ɗa̱ n yimkpa uteku tsa azangata a gaɗi, ka̱ta̱ n neke le iɗika i na vi ya'in uzuwakpani an va kuneke le, ka̱ta̱ yo okpo ili yi uka̱ni i le ayin dem.>>
14 Ɗaɗa Vuzavaguɗu u saba'i kusheshe ku ni, ɗa u kpa̱ɗa̱i kutuka̱ le n kawuya ka na wi ishi a̱ kutuka̱ uma a̱ ni.
15 Ana Musa u panai nannai, ɗa u cipa̱i a kusan ka n nshemberu ma atali n wila̱ n ni e ekiye. I ta̱ uɗani pulai n asuvu dem.
16 Nshemberu ma atali ma ulinga u Ka̱shile u ɗa, iɗani ya kpamu Ka̱shile ka'a ka ɗanai n ka̱ci ka̱ ni.
17 Ana Jesuwa u panai uma a kuya'an yoroli ɗa u danai Musa, <<Yoroli i nampa ya i ya'an ta̱ adanshi kuvon ki ta̱ ɗe a̱ ubuta̱ u koɓolo wa.>>
18 Ɗa Musa wu ushuki,
<<Na va yoroli yu ulya'i u kuvon u ɗa ba,
kpamu yoroli ya aza o kuso'o atakaci i ɗa ta na ba,
Ama yoroli yi ishipa i ɗa mi a kupana.>>
19 Ana u yawai ɗevu n ubuta̱ u na i va, ɗa we enei le e kuje'e n ka̱ma̱li ke medendem ka na a ya'in va. Ɗa u ya'in wupa n a̱bunda̱i, ali ɗa u variki nshemberu ma atali n wila̱ n na mi e ekiye a̱ ni, ɗa ta na o ɓosoi miri-miri a ɗaka vu kusan va.
20 Ɗa u ɗikai ka̱ma̱li ke medendem ka na a ya'in va ɗa u songi ka'a, ɗa wi iruwai ɗa kokpoi kokomo. Ɗa u bula̱ngi ka'a a̱ mini, ɗa u zuwai aza a Isaraila o so'o.
21 Ɗa u danai Haruna, <<Yiɗa̱i uma a nampa a ya'ankai nu, ɗa vu zuwai a ya'in ili i gbani-gbani i gbayin nannai?>>
22 Ɗa Haruna u danai, <<Vuzagbayin, ka̱ta̱ vu ka̱sukpa̱ ka̱ɗu ka̱ nu ka̱ kula̱ ba. Vi yeve ta̱ uteku u na uma a nampa o ci yongo a kuciga kuya'an ka gbani-gbani.
23 A danai mu, <Ya'anka tsu a̱ma̱li a na tso kutono. Vuma vu nampa Musa wu uta̱ka̱ tsu ta̱ a Masar, ama ci yeve ili i na i ya'in ni ba.>
24 Ɗa n danai le, <Vuza na baci wi n iliyatsuvu ya azanariya u tuka̱.> Ɗa a̱ tuka̱i mu ta na, ana n zuwai akina ɗa i derikpei, ɗa i bonoi tsu medendem.>>
25 Ana Musa we enei Haruna va u ka̱sukpa̱ ta̱ uma a ya'an ili i kavama ali ɗa okpoi ili yi izoshi a̱ ubuta̱ wi irala i le,
26 ɗa u shamgbai a̱ utsutsu u ka̱tsura̱ wa, u ɗengusa̱i ka̱la̱ka̱tsu, <<A̱ɗa̱ na yi a̱ ubuta̱ u Vuzavaguɗu, ta̱wa̱i na wa̱ va̱.>> Ɗaɗa aza e Levi ra̱ka̱ a̱ shida̱i a kubana wa̱ ni.
27 Ɗa Musa va u danai le, <<Ili i na Vuzavaguɗu Ka̱shile ki Isaraila ka danai i ɗaɗa na, yaba dem u woku kotokobi ka̱ ni ka̱ta̱ i ka̱na̱ kubana n u bonoi punu ubuta̱ u ka̱tsura̱ wa, a̱ kugita̱ a kakambu ka nampa sai a kakambu ka nan ɗe. Ka̱ta̱ yu una uma a, ko vuza nu ko ka̱ja̱'a̱ ka̱ nu ko vuza na yi ida̱shi koɓolo.>>
28 Ɗa aza a Levi o tonoi ili i na Musa u danai le a kanna ka nanlo ka, ɗa uma ɗevu n a̱kpa̱n a tatsu (3,000) a̱ kuwa̱i a kanna ka nanlo.
29 Ɗa Musa u danai aza e Levi a, <<Anana ye erengu ta̱ ka̱ci ka̱ ɗa̱ adama a ulinga u Vuzavaguɗu, n tsu na yu unai muku n ɗa̱ n aza ɗa̱ dem, n nannai ɗa i ciya̱i una̱singai anana.>>
30 Ana kayin kasai ɗa Musa u danai uma a, <<I ya'an ta̱ ili i gbani-gbani i gbayin. Ama mi ta̱ o kubono a̱ ubuta̱ u Vuzavaguɗu ko mi ta̱ a kufuɗa kufolono yi, ka̱ta̱ u cinukpaka ɗa̱ unushi u ɗa̱ wa.>>
31 Ɗa Musa u bonoi a̱ ubuta̱ u Vuzavaguɗu ɗa u danai, <<Ɓoɓou! Ili i gbani-gbani i gbayin i yiɗa̱i ta na uma a nampa a ya'in nannai! A ya'anka ɗe ka̱ci ke le a̱ma̱li a azanariya.
32 Ama gogo na n folono wu ta̱ cinukpaka le unushi wa, ama ki baci a kuya'an nannai ba, mayun ura kula ku va̱ punu a katagarda ka na vu ɗanai va.>>
33 Ɗa Vuzavaguɗu wu ushuki Musa, <<Vuza na baci de dem u nusakai mu a̱yi ɗa n kutakpa kula ku ni a katagarda ka.
34 Gogo na ɗa̱nga̱ vu bana vu tono n uma a a kubana a̱ ubuta̱ u na n danai nu va, kalingata ka̱ va̱ ki ta̱ a kuwala kelime ka̱ ɗa̱. Ama ayin a na n kutakacika uma a a yawa baci, mi ta̱ a kuya'an adama a̱ unushi u le.>>
35 Ɗa Vuzavaguɗu u tuka̱i uma a m ma̱dukpa̱ adama a ili i na a ya'in n ka̱ma̱li ke medendem ka na Haruna u ya'ankai le va.