27
Katalikalyuka ko Kusonku ili i Kune'e
1 <<Vi ya'an katalikalyuka ka m maɗanga ma megele, ugaɗi u ni u yawa udashi u cindere n kagimi, wanshi kpamu nannai udashi u cindere n kagimi. Uɗa̱ngi u ni u ya'an udashi u na̱shi n kagimi, wanshi n ugaɗi u katalikalyuka ka u ya'an feu derere.
2 Vi ya'an avana a ngon n na̱shi n ni dem, adama a na avana a o okpo umatyangbani ubuta̱ u te punu n katalikalyuka ka, ka̱ta̱ vu kuma ka'a n vuyum vi shili.
3 Vu ma'a mgbodo n na a̱ ku tsuwa̱nsa̱ka̱ kokomo ka katalikalyuka ka, n ikenekpetsu ya akina, n apara, n ikaɓatsu, n a̱mbu a̱ kupura̱ka̱ cikina, ili i nampa ya a ya'an i ɗa n iyum i shili.
4 Ka̱ta̱ vi ya'an katalikalyuka n kazatsu n viyum vi shili, ɗe atusu a ka̱ta̱ vu uka nkawani mi iyum i shili n na̱shi adama a ngon n na̱shi n katalikalyuka ka.
5 Vu zuwa kazatsu ɗaka, adama a na u pala katalikalyuka ka kagimi.
6 Vi ya'an alangu a̱ kuɓa̱na̱ka̱ katalikalyuka ka m maɗanga ma megele vu kuma ma'a n viyum vi shili.
7 Vu uka alangu a punu a nkawani ma, akambu e re dem adama a na a̱ ciya̱ a ya'anka ulinga a ayin a na baci i a kuɗika katalikalyuka ka.
8 Vi ya'an katalikalyuka ka n kungu nu nɗanga n na e she'wei n na mi wanshi, ka̱ta̱ vu ya'an tsa akpati vu na vi n ka̱ɓa̱ya̱mkpa̱tsu ba, tsu na n yotsonki nu a kusan ka.
Ulanga u Ma̱va̱li ma kuciɓa n Ka̱shile
9 <<Ka̱ta̱ vi ya'an Ulanga u Ma̱va̱li ma kuciɓa n Ka̱shile ma, a saku ɗe kakashi ka na a ya'in n arikinlai n tsugbere tsu singai tsa. A uɓon u ɗaka kpamu ugaɗi u kakashi wa u yawa udashi amangatawun (100),
10 ka̱ta̱ a saku ɗe akashi a a̱ nshikpu mi iyum i shili kamanga, aza a na a zuwai a anci e le a na a ya'in n iyum i shili a na i kamanga feu. Vu saku akashi a̱ utsutsu a nu nroki n na a ya'in n azurufa koɓolo nu nkawani.
11 Ta kpamu i kuya'an nannai n tsu gaɗi a kakashi ka na a kusaku va, ka ya'an udashi amangatawun n amangerenkupa (150), nu nshikpu kamanga, ida̱sa̱mkpa̱tsu i le a ya'an i ɗa n iyum i shili kamanga feu. Nkawani n awin, a ya'an a ɗa n azurufa.
12 <<N tsu ukocishi u ka̱livi u kakashi wa wanshi u ni u ya'an udashi amangatatsunkupa n u tawun n nshikpu kupa n ida̱sa̱mkpa̱tsu kupa feu a ya'an a ɗa n azanariya.
13 N uɓon u kasana a̱ ubuta̱ u na utsutsu wi, udashi u yawa amangatatsunkupa n u tawun.
14 Akashi a kakambu ke te ku utsutsu ka ugaɗi u ni u yawa udashi kamanga n u re n kagimi, ka̱ta̱ i saku ɗe ka'a a ashamkpatsu a tatsu ka̱ta̱ i kiyangu le a̱ ida̱sa̱mkpa̱tsu i tatsu ya.
15 Ta kpamu nannai n kakambu ka nan ɗe. Ukambu u re wu utsutsu wa, a saku ɗe akashi a na i n ugaɗi u na u yawai udashi kamanga n u re n kagimi koɓolo n ashamkpatsu a tatsu n ida̱sa̱mkpa̱tsu a tatsu feu.
16 A utsutsu u ku'uwa a ulanga u Ma̱va̱li ma kuciɓa n Ka̱shile ma, ugaɗi u ni u yawa udashi kamangankupa. Ka̱ta̱ a ya'an kakashi n arikinla n tsugbere tsu na ci tsu mini mu usuni, n tsu na ci yotsoi mini ma garula, n tsu mini ma̱ ma̱ɗiya̱, n tsugbere tsa akaɗa. Ka̱ta̱ a ca'a n igani, ka̱ta̱ a saku ɗe ka'a a ya'anka le ashamkpatsu a̱ na̱shi n ida̱sa̱mkpa̱tsu i na̱shi.
17 Ashamkpatsu ra̱ka̱ a na a̱ ka̱ra̱'i a ulanga u Ma̱va̱li ma kuciɓa n Ka̱shile ma, ka̱ta̱ a shiya le n awin a azurufa. Okoɓotsu e le o okpo a na a ya'an n azurufa feu, ida̱sa̱mkpa̱tsu yo okpo i na a ya'in n iyum i shili.
18 Ugaɗi wu ulanga wu uteku u Ma̱va̱li wa ra̱ka̱ u yawa udashi amangatawun n amangerenkupa (150), wanshi u ni u ya'an udashi amangatatsunkupa n u tawun, kashani ka̱ ni ka yawa ubapi u cindere n kagimi. Ka̱ta̱ a̱ ka̱ra̱ka̱ uteku wu uba̱nga̱ wa n kakashi ka na a ya'in n arikinla a singai, n anci a̱ iyum e le.
19 Ucanuku u na a kuya'anka ulinga u Ma̱va̱li wa dem, n aguta a na a̱ kushukpa̱ka̱ Ma̱va̱li ma, a uteku wu ulanga u Ma̱va̱li wa feu a ya'an i ɗa n iyum i shili.
Mani'in adama a̱ Ma̱kuni
20 <<Vu dana muku mi Isaraila a̱ tuka̱ m mani'in ma zaitu ma na a pishai mayin adama a kutasukusu ma̱kuni ma ayin tutu.
21 Ka̱ta̱ i zuwa kashamkpatsu ka̱ ma̱kuni a̱ ubuta̱ u Ma̱va̱li mo Oɓolo wa n tsu pulai tsu kakashi ka na a palakai Akpati vu Uzuwakpani vu na vi a̱ ubuta̱ u ciɗa wa. Haruna m muku mo olobo n ni, ele ɗa a̱ kula̱na̱ ma̱kuni ma akina ma kanna n kayin dem, adama a na mo yongo a kakana e kelime ka Vuzavaguɗu. Na va ɗaɗa wila̱ u uma Isaraila, i tono u ɗa ali nu ntsukaya n na i kumatsa.