20
Wila̱ Kupa u Ka̱shile
1 Ɗa Ka̱shile ka ya'in kadanshi ka nampa ra̱ka̱.
2 <<Mpa ɗa Vuzavaguɗu Ka̱shile ka̱ ɗa̱, vuza na wu uta̱ka̱i ɗa̱ a Masar a iɗika i na yi ishi a ugbashi.
3 <<Ka̱ta̱ vu tono ka̱ma̱li ba, sai mpa Ka̱shile ende'en.
4 <<Ka̱ta̱ vi ya'anka ka̱ci ka̱ nu a̱ma̱li o yoku a na o yotsoi ili i na yi gaɗi ko iɗika ko i na yi a̱ mini ba.
5 Ka̱ta̱ vu kuɗa̱nku le ko vu cikpa le ba. Mpa ɗa Vuzavaguɗu Ka̱shile ende'en, Ka̱shile ka na ka̱ tsu kpa̱ɗa̱ kuciga cishe'e. Vuza na u kutakacika muku adama a̱ unushi wu isheku i le, ali ntsukaya n tatsu ali a kubana n na̱shi ele na a iwain mu,
6 Ama a̱ɗa̱ na i cigai mu ɗa i tonoi wila̱ u va̱, mi ta̱ o kuyotsongu ucigi a kubana u muku ali a ntsukaya nu ntsukaya.
7 <<Ka̱ta̱ vu ka̱na̱ kuɗeke kula ku Vuzavaguɗu gbani ba. Adama a na mpa Vuzavaguɗu mi ta̱ a kutakacika vuza na u ya'in nannai.
8 <<Zuka n kanna ka Ashibi, ka̱ta̱ vu ka̱na̱ ka'a ciɗa mayin.
9 Ayin a̱ ta̱li i ta̱ lo, a na avu va kuya'an ulinga.
10 Ama kanna ke cindere dem ka Vuzavaguɗu Ka̱shile ka̱ nu ka'a, adama a nannai ka̱ta̱ vi ya'an ulinga ba, ko avu, ko maku ma̱ nu kolobo ko mekere, ko kagbashi ka̱ nu kolobo ko mekere, ko kuzuwa ku nu, ko komoci ka kpa'a ka̱ nu dem.
11 A ayin a̱ ta̱li a ɗaɗa Vuzavaguɗu u ya'in ili i nampa gaɗi n iɗika m mala n ili dem, ɗa wu uvukai a kanna ke cindere. Ɗa Vuzavaguɗu u zuwakai ka'a una̱singai ɗa kanna ka Ashibi ko okpoi kanna ka ciɗa.
12 <<Cikpa eshevu n a̱na̱vu, adama a na vi yongo ayin n a̱bunda̱i a iɗika i na Vuzavaguɗu Ka̱shile ka̱ nu ki e kuneke wu.
13 <<Ka̱ta̱ vu una vuza ba.
14 <<Ka̱ta̱ vi ya'an tsugbani n vuka vu vuza ba.
15 <<Ka̱ta̱ vi ya'an uboki ba.
16 <<Ka̱ta̱ vu dana vuza kakuna ka a'uwa ba.
17 <<Ka̱ta̱ vu cikala kisa kpa'a ku vuza nu ba. Ka̱ta̱ vi ya'an a̱shi a wuya n vuka vu vuza nu ba, ko kagbashi ka̱ ni, ko anaka a̱ ni, ko majaki ma̱ ni, ko ili i yoku i ni ba.>>
18 Ana uma a panai akpanga n ulaɗi nu mkpanyanya n ciliki tsa avana, ɗa e enei ka̱nga̱ ka̱ kimba̱i kusan ka, ɗaɗa uma a panai wovon ali e je'ekei ikyamba ɗa a shamgbai da'in.
19 Ɗa uma a a danai Musa <<Avu ya'an kadanshi n a̱ tsu, a̱ tsu ta na tsa kupanaka wu ta̱, ama ka̱ta̱ vu ka̱sukpa̱ Ka̱shile ka ya'an kadanshi n a̱ tsu ba, talo tsa̱ kuwa̱.>>
20 Ɗa Musa u danai uma a <<Ka̱ta̱ i pana wovon ba, Ka̱shile ka̱ ta̱wa̱ ta̱ adama a na u kondo ɗa̱, ka̱ta̱ kpamu i pana wovon u ni talo ya ya'an unushi.>>
21 Ɗa uma a a shamgbai da'in Musa tamkpamu u doki u yawai ɗevu n keleshu ka na ki n ka̱yimbi kpaɓam a̱ ubuta̱ u na Ka̱shile ki.
Uteku u na a kuma'a katalikalyuka ka Vuzavaguɗu
22 Ɗa Vuzavaguɗu u danai Musa, <<Dana aza a Isaraila ili i nampa, <Ye ene ta̱ n ka̱ci ka̱ ɗa̱ ana n ya'in kadanshi n a̱ɗa̱ na ɗe gaɗi.
23 Ka̱ta̱ i ya'anka ka̱ci ka̱ ɗa̱ ka̱ma̱li ka azurufa ko ka azanariya adama a na i cikpa le ba, sai mpa koci.
24 I ma'aka mu katalikalyuka ka n ci'in ta ɗe i kuya'anka mu alyuka o kusongu n alyuka a na a̱ kutuka̱ m ma̱ta̱na̱, maraɗika ko mokyon ko kanaka a̱ ubuta̱ u na mpa n zagbai i ciɓasa n kula ku va̱, mi ta̱ a̱ kuta̱wa̱ wa̱ ɗa̱ ka̱ta̱ n zuwaka ɗa̱ una̱singai.
25 Yi baci a kuma'aka mu katalikalyuka ka, ka̱ta̱ i ma'aka n atali a na e she'wei ba. I she'we baci n ili i kushe'weke, ki ta̱ o kokpo ili yu unata wa̱ va̱.
26 Ka̱ta̱ i ma'aka mu katalikalyuka ki idasakpatsu ba, adama na ka̱ta̱ i ka̱sukpa̱ ciyampa tsu ɗa̱ e keteshe a ayin a na yi a kukumba ba.>