15
Vishipa vu Musa
1 Ɗa Musa n aza a Isaraila a ya'in vishipa vu nampa va a kubana a̱ ubuta̱ u Vuzavaguɗu, mi ta̱ a kuya'an vishipa vu kucikpa Vuzavaguɗu, adama a na a̱yi ɗa u ciya̱i ulya'i u gbayin. U vakangi kodoku n kakumbi ka̱ ni dem a mala.
2 Vuzavaguɗu ɗa katsura ka̱ va̱ a̱yi ɗa kpamu vishipa vu va̱, a̱yi ɗa wishi u va̱. A̱yi ɗa Ka̱shile ka̱ va̱, mi ta̱ a kucikpa yi, Ka̱shile ke esheku a̱ va̱, n kucikpa yi ta̱.
3 Vuzavaguɗu kovonshi ka'a, kula ku ni ku ɗa feu Vuzavaguɗu.
4 Ekeke o odoku a Firi'auna n osoji a̱ ni, u vakangi le a mala. Aza a̱ gba̱ra̱-gba̱ra̱ a uzagbi a Firi'auna u ni'wa̱nta̱ngi le a Mala ma Shili.
5 Ɗa mini mu uga̱vi ma palai le, ɗa a liɓai sai ɗaka tsu katali.
6 Kukiye ku singai ku nu Vuzavaguɗu ki ta̱ n tsugbayin n utsura, n kukiye ku singai ku nu ku ɗaɗa vu la̱nga̱sa̱i irala.
7 N tsugbayin tsu utsura tsu nu tsu ɗa vu poloi aza a na i a tsurala n avu. Ɗa vu tsunki le wupa u nu, vu songi le n akina a̱ nu tsu mita̱ me ɗekpu.
8 N utsura wa ayinviki a na a̱ uta̱i a̱ vunu vu nu, ɗa mala mo ɓolongi a̱ ubuta̱ u te. Mini ma̱ a̱bunda̱i mo bonoi ma ya'in mashilya, mala ma̱ kutsa̱i an katali e mere ma mala ma.
9 <<Vurala vi le vu danai,
<N kusaɓa le ta̱, n kulya'a le ta̱,
n ku pecuku ta̱ ucanuku wa,
n kuɗika ta̱ ili i na mi a kuciga,
n kutala ta̱ kotokobi ka̱ va̱
ka̱ta̱ ekiye a̱ va̱ a una le.>
10 Ama ɗa vu uvula̱i n ayinviki a̱ nu,
ɗa mala ma palai le,
ɗa a liɓai tsu ka̱ta̱mba̱
punu a̱ mini ma gbayin.
11 <<Yayi a̱ ka̱tsuma̱ ka̱ a̱ma̱li wi uteku tsu nu Vuzavaguɗu?
Yayi wi uteku tsu nu a̱ ka̱tsuma̱ ka tsugbayin n ciɗa, n utsura n tsugbayin a kuya'an ili i mereve?
12 Vu ba̱ra̱kpa̱i kukiye ku usingai ku nu
ɗa iɗika i soɗongi le.
13 <<N ucigi u gbayin u nu u ɗa vu ci ya'an kaguɓa
ka uma a̱ nu a na vi isai.
A̱ ka̱tsuma̱ ku utsura u nu u ɗa va kuguɓa le
a kubana ubuta̱ wi ida̱shi u ciɗa u nu.
14 Iɗika kakau yi ta̱ a kupana ka̱ta̱ i dagaza,
una̱mgbi u ka̱tsuma̱ u ka̱na̱ ta̱ aza a Filisitiya.
15 Ngono n Edom mi ta̱ a kudagaza,
aza a̱ gba̱ra̱-gba̱ra̱ a Mowabu i ta̱ a̱ kulima̱ adama atakaci,
aza Kana'ana i ta̱ a̱ kuni'wa̱n,
16 wovon n udagaji wi ta̱ a kuka̱na̱ le.
Ama adama a utsura u kukiye ku nu,
i ta̱ a kushamgba n utsura an katali,
ali sai ayin a na uma a̱ nu a lazai, Vuzavaguɗu,
ali sai ayin a na uma a na vu uta̱ka̱i a lazai.
17 Vi ta̱ a̱ kuɗika le ka̱ta̱ vu shikpa̱ le,
a kusan ku nu,
ubuta̱ u na avu Vuzavaguɗu vu lapulukai ka̱ci ka̱ nu,
A̱ A̱'isa̱ a na avu Vuzavaguɗu, vu lapulukai ka̱ci ka̱ nu.
18 Vuzavaguɗu wi ta̱ a kulya'a tsugono,
ali ayin babu uteku.>>
19 Ana odoku a Firi'auna n ekeke o odoku n akumbi e le a uwai a mala ma, ɗa Vuzavaguɗu u bonokoi m mini ma, u palai le m ma'a, ama aza a Isaraila a walai a iɗika i ɗekpu punu e mere ma mala ma.
20 Ɗa taku vu Haruna Miriyamu keneki, u ɗikai ma̱ka̱nlu e ekiye a̱ ni ɗa ta na a̱ma̱ci n a̱bunda̱i o tonoi ni, a̱ ka̱na̱i tsuwa'i n e je'i.
21 Ɗa Miriyamu u ya'in vishipa vu nampa, <<Ci ya'ankai Vuzavaguɗu vishipa, adama a na a̱yi ɗa u ciya̱i ulya'i u gbayin. A̱yi ɗa u ni'wa̱nta̱ngi odoku n akumbi e le dem a mala.>>
Mini mo okono mo okpoi mu uyo'o
22 Ɗaɗa Musa u tonoi n aza a Isaraila, ana a̱ ka̱sukpa̱i Mala ma Shili, ɗa u zuwai le a wala e meremune ma na e ci ɗeke Shuru. A ya'an ta̱ ayin a tatsu, ele a kuwala e meremune ma nanlo ama e ene mini ba.
23 Ana a yawai a Mara a fuɗa o so'o mini ma ba, adama a na mini ma mi ta̱ n okono. (I ɗaɗa i zuwai ɗa e ɗekei ubuta̱ wa Mara.)
24 Ɗa uma a ya'ankai Musa mololo, a danai, <<Yiɗa̱i tsa ɗamgba tso so'o?>>
25 Ɗa Musa u shi'ika̱i Vuzavaguɗu, ɗa Vuzavaguɗu u yotsongi ni kacaka ka maɗanga. Ɗa u ɗikai u vakangi ka'a punu a̱ mini ma, ɗa mini ma mo bonoi uyo'o. A̱ ubuta̱ wa ɗe ɗa Vuzavaguɗu u nekei le kupi'isa n wila̱, ɗa kpamu u kondoi le.
26 Ɗa u danai, <<I pana baci ka̱la̱ka̱tsu ka Vuzavaguɗu Ka̱shile ka̱ ɗa̱ mayin, ɗa i ya'in ili i na i ga'in ni kpamu, ɗa i tonoi ili i na u danai derere. Ɗa kpamu i tonoi wila̱ u ni ra̱ka̱, mpa mi a̱ kutuka̱ ɗa̱ n ila̱nishi tsu na n su'uki aza a Masar ba, adama a na mpa ɗa Vuzavaguɗu vu na u tsu potsotongu ɗa̱.>>
27 Ɗaɗa uma a a yawai e Elim, a̱ ubuta̱ u na wi n a̱shi a̱ mini kupa n e re ni nshuwa amangatatsunkupa. Ɗa a vaki lo ɗevu n ubuta̱ u mini wa.