9
Mepiposete maro Tawi
1 Mame tõturupose Tawi, ynara tykase ynororo:
— Sauu ekyrỹpyry nae ro, kure tyritohme, Jonata pokoino?
2 Sauu tõ poetohpyry nae ro nexiase, esety Zipa. Tykohmase ynororo, aehtohme Tawi a oturupotohme.
— Omoro hma Zipa? tykase Tawi.
— Ỹ, ywy ase, tykase ynororo, opoetoryme ase.
3 Mame tõturupose tuisa a eya, ynara tykase:
— Nae ro Sauu ekyrỹpyry, kure tyritohme, jomihpyry ae ro Ritonõpo netaryme? tykase ynororo.
— Ỹ, nae ro toiro, Jonata mũkuru. Yrome ahmitahpyryme ynororo, ãtakamahpyry. Ytoytopỹme ynororo, tykase Zipa.
4 — Otoko hnae ynororo? tykase tuisa.
— Makia, Amieu mũkuru tapyĩ tao mana, pata Ro-Tepaa po! tykase Zipa.
5 Naeroro tonehpose ynororo tuisa Tawi a.
6 Mame Mepiposete, Jonata mũkuhpyry, Sauu parỹpyry, tooehse tahtao typorohse ynororo tosekumuru po tõmyty nono pokoxi tyrise eya, Tawi ẽpataka “Imehxo mase,” katohme eya.
— Mepiposete, tykase Tawi.
— Ỹ, opoetoryme ase, tykase ynororo.
7 — Enaromyra exiko, tykase Tawi. — Kure oriry se ase omy Jonata pokoino. Atamuru Sauu tupi tõkehko ekarõko ropa ase oya, emero. Mame jũme oesary ekarõko ase jotuhtoh po, tykase.
8 Typorohse ropa Mepiposete tosekumuru po, ynara tykase:
— Otyme kure ywy? Typahsẽme sã rokẽ ase, kaikuxi ekepyry sã rokene. Oty katohme kure jyrĩko mahno? tykase.
9 Mame Zipa tykohmase tuisa Tawi a, ynara tykase eya:
— Sauu tapyinỹpyry emero ekarõko ase iparỹpyry a.
10 Omoro, omũkuru tõ maro, opoetory tõ maro erohnõko itupi tõ poko, tonahsẽ enehtohme, oesẽ parỹpyry napyryme. Yrome jũme otuhnõko mã ynororo ymezã po.
Zipa tumũkue nexiase 15me, typoetoke roropa 20me, enara.
11 Mame tuisa Tawi tozuhse Zipa a:
— Õmipona tyrĩko ase emero, opoetoryme ase, tykase.
Tawi meza po tõtuhse Mepiposete, Tawi mũkuru samo.
12 Tumũkue Mepiposete nexiase, esety Mika. Zipa ekyry tõ emero Mepiposete poetoryme toehse.
13 Mame moroto Jerusarẽ po ehse Mepiposete, kokoro rokẽ otuhse ynororo tuisa Tawi maro. Ahmitahpyryme nexiase ynororo, asakoro ipupuru.