22
Tawi eremiatoh Ritonõpo eahmaryme
(Saumu 18)
1 Tawi eremiatoh moro, Ritonõpo eahmatohme, typynanohse tahtao, Sauu tõ winoino, imehnõ etapary se exiketõ winoino roropa. Mokaro winoino typynanohse tahtao toremiase ynororo, ynara tykase:
2 Ritonõpo jewomaneme mana, Topu konõto, ytapyiny jamihme exikety, ypynanohneme roropa.
3 Ritonõpo jesemy, Topu konõto, imaro otonẽnõko ase.
Jewomãko mana osewomatoh ke samo;
Ypynanohneme jamihmã mana;
jewomaneme yyryhmara imehnõ ehtohme.
4 Ritonõpo kohmãko ase jakorehmatohme,
ypynanohnõko mana yporemãkapopyra jepetõkara ehtohme.
Kuesẽkõ seahmatone!
5 Tomyehmase exiase pohkane konõto ke, joorihmatohme;
pohkane konõto jenahkapotoh a, typoremãkapose ywy.
6 Oorihnõko ase tymyhse jexiryke sã eary ke.
Emynyhmãko ase yronymyryme joorikyry se pyra jexiryke.
7 Typoremãse jahtao, tykohtase ywy Ritonõpo a:
— Kuakorehmako myhene! ase eya.
Tytapyĩ tae jomiry totase eya;
yxitary totase eya rahkene.
8 Morarame nono tykytyky tykase,
kywyh tykase roropa;
ypy ãtykyry kywyh tykase,
tykytyky tykase roropa tãtaekymase Ritonõpo exiryke.
9 Eunary ae orexĩto tutũtase, ĩtae apoto tutũtase wewe zahkatoh samo.
10 Kapu totapuruhmakase eya,
tyhtose ynororo.
Akuru xinukutumehme sã toehse, ipupuru zopikoxi.
11 Taporihke exikety pona tõtyrise toytotohme.
Tõnuhse tyryrykane apory po.
12 Tãtose, koko tyrise eya;
akurũ xinukutumãkomo,
tuna ke pehme tomyehmase ynororo;
13 nenenehkane ke apoto tukase esemazupurume.
14 Morarame Ritonõpo omiryme konomeru konõto kapu ae toehse,
tõmiry totapose Ritonõpo Jamihmehxo Exikety a.
15 Pyrou taropose eya, topetõkara sapararahme ripotohme;
nenenehkane ke tonepanohpose toto eya.
16 Mame topetõkara tupokase ahtao Ritonõpo a, tãtaekymase,
konomeru konõto tonehpose toto pona,
tuna esemary tonese tuna konõto zopino,
sero nono apõ tõsenepose.
17 Kaino tomary ke Ritonõpo a tapoise ywy.
Tanỹse ywy eya zue konõto kuae.
18 Ritonõpo a typynanohse ywy jepetõkara jamihme exiketõ winoino, yzehno exiketõ winoino.
Mokaro emero ymotye jamihme toh nexiase.
19 Jetuarimaryhtao tõsetapase ymaro toto;
yrome Ritonõpo, Jesemy a towomase exiase.
20 Tanỹse ywy eya, osa towomase exikety pona.
Ypynanopyase jamaro jexiryke.
21 Kurãkõ ke jepehmãko Ritonõpo mana, zae ehtoh poko rokẽ jexiryke.
Kure rokẽ jyrĩko mana azahkuru ehtoh poko pyra jexiryke.
22 Ise Ritonõpo ehtoh tyrise ya,
yyrypyry poko pyra ase,
Kuesẽkõ onurumekara ase.
23 Inyripohpyry omipona toehse ywy, emero porehme,
eramara ropa ase aomiry omipona pyra jehtoh poko.
24 Jyhxiropyra imehnõ mana zae rokẽ jexiryke, Ritonõpo neneryme azahkuru ehtoh poko pyra roropa jexiryke.
25 Naeroro kurã ke rokẽ topehmase ywy Ritonõpo a, ajohpe pyra jexiryke, tyyrypyhpyke pyra roropa jexiryke ineneryme.
26 Opoko amonohkara exiketomo a, anamonohpyra roropa mase, Ritonõpo.
Zae rokẽ roropa mase, zae exiketomo a.
27 Tyyrypyhpyke pyra exiketomo a, iirypyryme pyra mase roropa,
yrome popyra exiketomo a, epekarame mase.
28 Epyrypara exiketõ pynanohnõko mase, Ritonõpo.
Yrome epyrypaketõ rĩko mase tuisame pyra.
29 Omoro, Ritonõpo, yzeiponeme mase;
koko ehtoh enahkapõko mase ya, Jesemy.
30 Jakorehmãko mase jepetõkara maro etonatohme,
ajamitunuru ekarõko mase ya toto osewomatoh poremãkatohme ya.
31 Mose Ritonõpo, kure rokẽ emero tyrĩko mana.
Tõmihpyry omipona anamonohpyra mana.
Õsewomatohme mana, eya oytorykohtao oewomatohme.
32 Ritonõpo rokẽ Kuesẽkõme mana, imepỹ pyra.
Ynoro rokẽ kuewomanekõme mana.
33 Ritonõpo jamihme exiketyme exiryke imaro jahtao imehnõ zuno pyra ase,
emero rokẽ pona jytoryhtao jewomãko mana.
34 Upupuru rĩko mana kapauimo pupuru samo, osetapara sã jehtohme ypy tõ poro.
35 Osetapatoh poko jamorepãko mana, taky tõ jamihmãkõ poko ehtoh zuaro jehtohme.
36 Jewomãko mase Ritonõpo, osewomatoh mekaroase ya ypynanohtohme;
typynanohse oya jexiryke, orẽpyra ase toehse.
37 Jepetõkara a japoipopyra mexiase,
naeroro epukapitopyra ase.
38 Jepetõkara ekahmaryhtao ya, toto apoĩko ase.
Eramara ropa toehse ywy, toto enahkatoh pona ro.
39 Toto poremãkãko ase,
owõpyra ropa mã toto.
Nono pona epukãko mã toto, typoremãkase ymyhtokoxi.
40 Oya tyjamihtanohse jexiryke etonatohme,
jetapary se exiketõ poremãkapõko mase ya.
41 Ritonõpo, jepetõkara aropõko mase ywinoino,
yse pyra exiketõ enahkapõko ase.
42 Takorehmanekõ zupĩko toh mã repe,
yrome arypyra, toto pynanohne pyra mana;
Ritonõpo a kohtãko roropa toh repe,
yrome onezuhpyra mana.
43 Toto akurihmõko ase,
putoh katoh sã exĩko mã toto;
toto tũtũmãko ase osema ae purapuramã samo.
44 Typynanohse ywy oya, wekyry tõ yporemãkapory se toehse ahtao.
Imehnõ ahno tõ tuisaryme kyriase,
mokaro ahno tõ waro pyra exiase repe,
yrome seromaroro ynamoto tõme toehse mã toto.
45 Imehnõ ahno tosekumuru po porohnõko mã toto jẽpataka.
Jomiry etaryhtao eya xine,
omipona exĩko mã toto.
46 Osetapary se pyra exĩko mã toto,
tonẽtopõpyrykõ ae tũtãko mã toto, enaromỹke toexirykõke.
47 Isene Ritonõpo Kuesẽkõ mana!
“Kure mase” sykatone jewomane a.
Imehxo Exiketyme Ritonõpo mana,
Jamihmehxo Exiketyme, sekarotone, ypynanohneme exiryke.
48 Orẽpyra jyrĩko mana, jepetõkara poremãkatohme,
toto rĩko ypoetoryme mana,
49 typynanohse ywy eya, yzehnotokõ winoino.
Omoro, Ritonõpo orẽpyra jyrĩko mase, jepetõkara poremãkatohme ya,
jewomãko mase yyryhmary se exiketõ winoino.
50 Morara exiryke “Kure mase” ãko ase,
oeahmãko ase awaro pyra exiketõ pata tõ poro;
eremiãko ase oeahmary ke ya.
51 Tuisame imehxo jyrĩko Ritonõpo mana,
tynymenekahpyry pyno exikehpyra mana;
Tawi hkotano, ipoenomo, ipakomotyã jũme toto pyno exikehpyra mana.