18
Akape enaroximatopõpyry urutõ Mikaia a
(1 Tuisa 22.1-28)
1 Morarame tuisa Josapa tymõkomoke toehse ahtao, topeke tuhke roropa toehse ahtao, tyekyry takorehmase eya pytatohme tuisa Akape Izyraeu tõ esẽ ekyry maro.
2 Moromeĩpo tuhke pixo jeimamyry taropose ahtao Samaria pona toytose Josapa, Akape enese. Tuhke kaneru tõ totapase Akape a pui tõ roropa otuhtoh konõto ritohme Josapa tõ eahmatohme imehxo aexiry enepotohme. Morarame Josapa toahmase Akape a tymaro ytotohme etonase pata Ramote-Kireate poremãkatohme.
3 Tõturupose ynororo Josapa a:
— Oytory se pyra hma ymaro etonase pata Ramote maro?
Josapa a tozuhse, ynara tykase ynororo:
— Oytory se awahtao etonase ywy roropa amaro jytory se ase ypoetory soutatu tõ maro ãkorehmatohme, tykase.
4 Yrome osemazuhme sekaropone Ritonõpo Kuesẽkomo a.
5 Mame urutõ kõ tykohmase Akape a, 400mãkomo ekaropotohme.
— Oty zae exĩko nae: jytory etonase Ramote maro, ytopyra exiry?
— Ytoko, tykase toto. — Orẽpyra orĩko Ritonõpo mana Ramote poremãkapory poko.
6 Mame tõturupose Josapa, ynara tykase:
— Ritonõpo poe urutõ pyra hnae ekaropotohme Ritonõpo a? tykase.
7 — Nae, mokyro esety Mikaia, Inira mũkuru. Yrome mokyro se pyra ase ipunaka, kure jehtoh poko onekaropyra aexiryke. Popyra rokẽ jehtoh ekarõko mana, tykase Akape.
— Morara kara exiko! tykase Josapa.
8 Mame typoetory tamuxime exikety tykohmase Akape a aropotohme Mikaia enehse.
9 Mokaro, tuisa tõ asakoro, tuisa zupõ kurã ke typorohse toh kynexine tuisa apõ po, osa amerehmã po, Samaria omõtoh pũto. Mame toto ẽpataka urutõ kõ oturũko toh kynexine.
10 Toiro mokyro kynexine Zetekia, Kenaana mũkuru. Iretyry tõ tyrise eya kurimene risemy, ynara tykase ynororo Akape a:
— Ynara ãko Ritonõpo mana: “Senohne iretyry ke xirio tõ poremãkãko mase ipunaka õsetaparyhtao toto maro,” tykase.
11 Morara tykase imehnõ urutõ kõ emero:
— Ytotoko etonase Ramote põkõ maro. Toto poremãkãko mase. Orẽpyra orĩko Ritonõpo mana, tykase.
12 Morara ahtao mokyro, Akape naropohpyry Mikaia enehse ynara tykase eya:
— Mokaro urutõ kõ emero, orẽpyra tuisa exĩko mana, ekarõko mã toto. Moro saaro kaxiko omoro kure rokẽ oehtohme, tykase.
13 Yrome ynara tykase Mikaia eya:
— Ritonõpo rokẽ Imehxo Exiketyme mana. Inetaryme ynara ãko ase oya, inekarory rokẽ ekarõko ase! tykase.
14 Mame toeporehkase Mikaia ahtao tuisa tõ ẽpataka, ynara tykase Akape eya:
— Mikaia, tuaro se ynanase tuisa Josapa maro, kure Ritonõpo a yna ytory etonase Ramote põkõ maro? Ytopyra ynanae? tykase.
Ynara tykase Mikaia:
— Oetonatoko. Orẽpyra exĩko matose Ritonõpo poe. Toto poremãkãko matose.
15 Yrome tozuhse ynororo Akape a:
— Ajohpe pyra exiko Ritonõpo omiry ekaroryhtao ya. Tuhke rokẽ morara tykase ywy oya.
16 Mame ynara tykase Mikaia eya:
— Izyraeu tõ soutatu tõ enẽko ase sapararahme ypy tõ poro kaneru tõ samo tosẽke pyra. Ynara tykase roropa Ritonõpo ya: “Mokaro orutua kõ tosẽke pyra mã toto. Ah nytõ ropa toto tosaka xine, torẽtyke pyra,” tykase.
17 — Morara yka, tykase Akape Josapa a, — toipe mã ynororo. Omi kurã onekaropyra mana ypoko. Omi popyra rokẽ ypoko ekarõko mana.
18 Tõturuse ro Mikaia, ynara tykase:
— Seromaroro Ritonõpo omiry etatoko kẽty! Ritonõpo eneno typorohse tuisa apõ po kapu ao. Imaro ipoetory tõ, inenyohtyã xikihme toh nexino.
19 Mame tõturupose Ritonõpo: “Onoky Akape enekunohnõko nae, aytotohme Ramote pona, totapasẽme aehtohme moroto?” tykase. Mame tozuhse ynororo inenyohtyamo a tõsenetupuhtoh komo. Imehnomo a tyoro turuse.
20 Etyhpyryme toiro mokyro tõsenepose. Ynara tykase ynororo: “Ywy Akape enekunohnõko ase,” tykase. Mame tõturupose Ritonõpo a: “Otãto?” tykase.
21 Mokyro a tozuhse: “Ywy ytõko ase Akape poetory urutõ komo a, toto ritohme ajohpe. Mame ajohpe rokẽ oturũko mã toto,” tykase. Naeroro tonyohse ynororo Ritonõpo a: “Ytoko, Akape enekunohse. Enekunohnõko mase rahkene.”
22 Mame tõtyhkase Mikaia ynara karyke Akape a:
— Tuisa Akape, Ritonõpo nyrihpyry enẽko mase seromaroro. Opoetory tõ urutõ kõ emero enekunohnõko mã toto. Yrome tõmihpyry ae ro oya oorihmanohpõko Ritonõpo mana.
23 Morarame urutõ Zetekia toytose Mikaia a, ẽpãmase tomary ke, mame tõturupose:
— Otara ahtao toytose Ritonõpo Zuzenu ywinoino, oturuse amaro? tykase.
24 — Zuaro exĩko mase, otonẽse oytoryhtao tapyi taka, mya osa tapyi taõ taka, tykase Mikaia.
25 Mame takorehmane taropose tuisa Akape a Mikaia apoise:
— Mose apoiko arotohme Amõ a, pata kowenatu a, tuisa mũkuru Joaxi a roropa.
26 Toto zuruta: mose ẽmatoko ãpuruhpyry taka. Wyi rokẽ ekarotoko eya tuna maro kure rokẽ joehtoh pona ropa, tykase.
27 Ynara tykase Mikaia:
— Kure rokẽ ooepyry ropa ahtao, jomiry ae oturupyra Ritonõpo exiry!
Mame ynara tykase ropa ynororo:
— Otato ehtoko jomihpyry poko! tykase.
Akape orihtopõpyry
(1 Tuisa 22.29-35)
28 Morarame toytose tuisa Akape tuisa Josapa maro etonase pata Ramote-Kireate põkõ maro.
29 Ynara tykase Akape Josapa a:
— Osetapatoh taka kytoryhtao, tyoro upo amurũko ase juaro pyra imehnõ ehtohme. Yrome oupõ kurã, tuisa zupõ amurũko ro mase, tykase.
Naeroro Izyraeu tõ esẽ toytose etonatoh taka tyoro upo ke tamuruse.
30 Mame mokyro Xiria esẽ ynara tykase takorehmananomo a, kahu aronanõ tuisary tomo a: “Imehnõ onetapara ehtoko, Izyraeu esẽ rokẽ etapatoko,” tykase.
31 Naeroro tuisa Josapa tonese ahtao eya xine, Izyraeu tõ esemy ynororo tokarose eya xine repe. Tokahmase ynororo eya xine etapatohme. Yrome kui tykase ahtao typynanohse ynororo Ritonõpo a. Osetapaketõ toeramase ropa ewinoino,
32 tonetupuhse eya xine, Izyraeu tuisary kara. Naeroro onekahmara toehse toh kynexine.
33 Yrome pyrou tusarah tykase soutatu xirio a tuisa Akape onenepyra ahtao ro. Akape tuose aosewomatoh kuroko. Kui tykase tykahu arone a:
— Tuose ywy! Eramako, kuaroko taroino etonatoh poe, tykase.
34 Mame tõsetaparyhtao ro tuisa Akape takorehmase eya xine xikihme aehtohme tykahu ao ẽmyty xirio tõ wino, ikohmã pona. Mame tykohmãse ahtao toorihse ynororo.