8
Tuaro ehtoh Kure mana
1 Etatoko ke! Tuaro ehtoh kohtãko mana:
zae enetupuhtoh opore omitãko mana.
2 Tuaro ehtoh ypy emory po mana te, osema ehpio roropa,
osema atapiakary tõ po roropa mana.
3 Pata omõtoh po mana, omõtoh apuru tõ pũto kohtãko mana:
4 “Oya xine oturũko ase porehme,
toiro ekaropõko ase oya xine,
sero nono põkomo a emero porehme.
5 Poetome ro mase, zae ehtoh waro nymyry pyra ro mase.
Atamorepako zae ehtoh waro oehtohme.
Putupyra exikety sã pyra exiko.
Zae ehtoh poko atamorepako tuaro oehtohme.
6 Etatoko pahne, jomiry zae mana;
ynekarory oya emero zae mana.
7 Ynekarory oya ajohpe pyra mana;
ajohpe ehtoh se pyra jexiryke ipunaka.
8 Jomiry oya emero zae mana;
oenekunohpyra mana, ajohpe pyra mana.
9 Tuaro exiketomo a emero tupime pyra enetuputyry;
tuaro exiketomo a emero jarao mana.
10 Otato exiko ãmorepatoh poko ya; parata se hkopyra exiko.
Zuaro ehtoh sehxo exiko; uuru kurã se hkopyra exiko.
11 “Ywy ase Tuaro ehtopo;
kasuru motye typynehxo ase, uuru risẽ kehko motye roropa.
Openetatoh emero motye typynehxo ase.
12 Ywy ase Tuaro ehtopo;
zae ehtoh enetupuhnõko ase;
atamorepatoh waro ase, zae imenekary waro roropa ase.
13 Ritonõpo omipona awahtao popyra ehtoh se pyra mase.
Oepyrypary se pyra ase ipunaka te, imehnõ motye kure osekarory roropa,
popyra ehtoh poko se pyra roropa ase te,
omi ajohpe ehtoh se pyra ase, enara.
14 Ynyriry poko osenetupuhnõko ase,
mame tyrĩko ase rahkene;
zae ehtoh waro ase, jamihme ase roropa.
15 Tuisa tõ akorehmãko ase tuisame aehtohkõ poko, kowenu poko erohketõ akorehmãko ase inyripotyã kurã ritohme.
16 Kowenu tõ erohnõko mã toto akorehmaryke ya, tamuximãkõ te, tuisa tõ porehme takorehmase ahtao ya erohnõko mã toto.
17 “Imehnõ pyno ase ypyno toto ahtao; jupiryhtao ahno a jeporỹko mã toto.
18 Tineru nae ase, imehxo ehtoh roropa, mõkomo kurano te, emese kure ehtoh roropa zae apiakary poko, enara.
19 Ynekarory oya uuru kurã motye kure mana,
parata kurã motye roropa kure mana.
20 Zae ehtoh poko exiketõ esemary ae ytõko ase,
ajohpe pyra ase, zae ehtoh se exiketõ maro ytoytõko ase,
21 mõkomo kurã ekarõko ase ypyno exiketomo a,
itapyĩkõ pehkãko ase mõkomo kurã ke.
22 “Ywy, tuaro ehtoh tyrise Ritonõpo a apitoryme,
inyrityã onyripyra ro pake ahtao.
23 Ywy tyrise pakehxo, apitoryme,
sero nono onyripitopyra ro ahtao.
24 Tonuruse ywy tuna konõto tõ exipyra ahtao ro,
tuna enatyry pyra ahtao ro.
25 Tonuruse ywy ypy tõ exipyra ahtao ro,
somohmã tõ onyripyra ro ahtao esaka te,
26 sero nono onyripyra ro Ritonõpo ahtao,
tupito tõkehko; nono tomary pehmã apitorymã onyripyra tahtao ro.
27 Moroto exine kapu tyrise ahtao eya esaka,
xixi omõtoh tyrise ahtao eya tuna konõto epozakoxi.
28 Moroto exine akurũ tyrise ahtao eya kapu ao,
tuna enatyry totapuruhmakase ahtao eya tuna konõto kuao te,
29 tuna taunuhmapokehse ahtao eya,
esary ehpio onymotyẽkara ehtohme.
Moroto exine sero nono apõ tyrise ahtao eya.
30 Morara ahtao imaro exine, akorehmaneme sã inyriry poko.
Ypokoino tãkye kynexine, kokoro rokẽ amonohkara,
atãkyemãko imaro.
31 Atãkyemãko sero nono tõkehko poko,
inyrityã ahno poko roropa.
32 “Naeroro, aimo tomo, etako pahne!
Ynyripohpyry tyritoko, morarame tãkye exĩko matose.
33 Ãmorepatopõpyrykõ poko wenikehpyra ehtoko.
Tuaro ehtoko; ãmorepatopõpyrykõ onurumekara ehtoko.
34 Jomiry etaneme awahtao tãkye exĩko matose:
kokoro rokẽ ytapyĩ omõtoh tao awahtao,
jeraximãko ytapyĩ omõtoh tao.
35 Tapoise jahtao oya isene exĩko mase,
Ritonõpo zamaro exĩko roropa mase.
36 Yrome japoipyra exikety ataosanumãko mana.
Yse pyra exiketõ emero toorihtohkõ se mã toto.”