54
Jerusarẽ pyno Ritonõpo ehtopo
1 Jerusarẽ, nohpo emũkuapitopỹ sã mexiase,
yrome seromaroro oeremiako, okohtako ãtãkyemaryme,
ynara ãko Ritonõpo exiryke:
“Mose nohpo, inio nurumekahpyry tuhkehxo emũkuãko mana, tynioke exikety motye.”
2 Atapyĩ zumohxo tyriko, oesary zumo ehtohme,
omomỹke pyra exiko moro poko.
Eary tõ mosa xine tyriko,
atapyĩ kyryry wewe inepuru tõ ixixihmako nono aka!
3 Mame ononory sorohme ro exĩko mana xixi tũtatoh wino te,
xixi omõtoh wino, inikahpozakoxi te, ikurenaka roropa;
moro nono esẽme exĩko ropa oekyry tõ mana,
oepetõkara nupuxihkahpyry owinoino xine,
pata tõ irumekatyã pehme exĩko ropa mã kehko ahno ke.
4 Enaromyra exiko, ehxiropyra roropa exiko;
oserehpyra exiko, iiryhmazomopỹme exĩko mase.
Wenikehnõko mase ohtomatopõpyry poko oryxime awahtao, omuhpe oehtopõpyry poko roropa pytỹpome toehse awahtao.
5 Orihpono, Ritonõpo Jamihmehxo Exikety oniome exĩko mana;
Izyraeu tõ Esẽ kurã, sero nono põkõ emero Esemy, opynanohnõko mana.
6 “Izyraeu, nohpo sã mexiase, inio nurumekahpyry samo,
sam ãko mexiase, yrome okohmãko ropa Ritonõpo mana ooehtohme ropa.
Ynara ãko mana:
‘Typyty aropõko ropahxo ke nae anaroposaromepyra inio mana
imaro torẽnase toexiryke nuaseme ro tahtao?
7 Axĩtao rokẽ kurumekase,
yrome seromaroro opyno jexiryke yronymyryme ãpoĩko ropa ase.
8 Ozehno toehse jexiryke otonemyase owinoino, axĩtao rokene;
yrome taroino jũme opyno jehtoh enepõko ase oya,’ ”
ãko Ritonõpo, Opynanohnekomo.
9 Ynara ãko Ritonõpo mana:
“Noe ehtopõpyry ahtao jomiry etapoase eya:
‘Zomory tuna konõto onenehpopyra ropa exĩko ase nono pona;’
Moro saaro seromaroro jomiry etapõko ase:
‘Taroino ozehno exipyra ropa exĩko ase, jũme
oupokara, jũme awãnohpyra roropa exĩko ase.
10 Otarame ypy tõ ohpahnõko mã kehko emorymã tõ roropa,
yrome opyno jehtoh jũme exikehpyra exĩko mana,
omi ynetapohpyry ae ro jũme osepeme exikehpyra exĩko sytase.’ ”
Morara ãko Ritonõpo mana opynoto.
Jerusarẽ tyrisenano
11 Ynara ãko Ritonõpo mana:
“Pata Jerusarẽ, etuarimãko mase,
tuãnohse tyryrykane a, oemuhkehkananõ pyra mã amaro.
Orĩko ropa ase topu kurã ke, ãpõ tõ rĩko ase sapira tõkehko ke.
12 Soutatu tõ tapyĩ tõ pata apuru po rupi tõ risẽme tyrĩko ase,
omõtoh tonõ rĩko ase periro risẽme,
pata apuru tõ topu kurãkõ rĩko ropa ase.
13 Ywy roro apatary põkõ amorepãko ase,
torẽtyke pyra exĩko mã toto, typynanohneke roropa.
14 Zae ehtoh poko oexiryke orẽpyra exĩko mase.
Towomaneke exĩko mase oryhmary se exiketõ winoino,
orohmanohponanõ winoino roropa,
enaromyra exĩko mase popyra ehtoh oehpyra exiryke oya.
15 Imehnõ etonase aytorykohtao oya,
ypoe pyra tamoreme xine rokẽ ytõko mã toto.
Mame mokaro toetonary sato kõ amaro typoremãsẽme exĩko.
16 “Kurimene poko erohkety Rihpõme ase,
apoto zukãko mana, soutatu pyre tõ rĩko mana.
Soutatu Rihpõme roropa ase,
typyre ke imehnõ wõko mana, etapãko roropa mana,
17 yrome toto pyre owosaromepyra exĩko mã kehko,
mame ihxironanõ ẽpataka tarose awahtao
ohxironanõ poremãkãko mase.
Ypoetory tõ ewomãko ase,
orẽpyra toto rĩko ase tyehnotokõ poremãkapotohme.”
Ywy Ritonõpo oturuno.