52
Jerusarẽ pynanohnõko Ritonõpo mana
1 Apakako, Jerusarẽ, apakako ajamihtako ropa.
Pata kurã põkomo, oupõkõ kurãkõ amurutoko,
Ritonõpo se pyra exiketõ mokaro ahno
nuriame aexityã oehpyra ropa mã toto jumãme oesaka xine.
2 Jerusarẽ, pata kurano, typorohse exikety nono po,
emyhpokako keti tõ ikyryko;
owõko ropa ty nono poe, oupõ isasakako,
oporohko tuisa apõ pona, ãpuruhpyry taõkomo, Xião põkomo!
3 Ritonõpo Oesẽkõ ynara ãko typoetory tomo a:
— Tarose awahtao xine imehnõ nonory põkomo a tynamoto tõme mya tosaka xine, tineru onepehmara toh kynexine topehpyrykõme; moro saaro onepehmara exĩko ase omyhpokarykõ ropa ahtao ya.
4 Ritonõpo Oesẽkõ ynara ãko:
— Apitoryme Ejitu pona ypoetory tõ toytose nexiase; tamoreme xine toytose toto ise toexirykõke. Imeĩpo, axirio tomo a tarose toto tynamotokõme, onepehmara roropa toh nexiase.
5 Seromaroro oty enẽko ywy? Papironio tõ morara tyrĩko roropa mã toto: ypoetory tõ tarose eya xine tynamotokõme, yrome onepehmara toh nexiase. Ypoetory tõ poremãkananõ kohtãko, epyrypãko roropa mã toto orẽpyra toexirykõ poko, jyhtomakehpyra mã toto.
6 Yrome imeĩpo ẽmepyry oehnõko mana, ypoetory tõ jesety waro exĩko, ywy ase Ritonõpo, oturuase oya xine senohne poko!
7 Kure kuhse mã omi enehne tururume aepyry eneryhtao ypy tõ kuroko, omi enepyry etonara ehtoh poko,
omi kurã kypynanopyrykõ poko!
Ynara ãko mana Jerusarẽ põkomo a:
“Ritonõpo Oesẽkõ Tuisame mana!” ãko.
8 Etatoko ke, pata omõtoh erase tõ kohtãko!
Tãtãkyemarykõme kohtãko mã toto oximõme,
tonuru tõ ke enẽko mã toto,
Kuesẽkõ oepyry ropa pata Jerusarẽ pona.
9 Jerusarẽ typahse aexihpyry, oeremiako ãtãkyemaryme,
nupunato typoetory tõ enẽko Kuesẽkõ mana,
Jerusarẽ pynanohnõko mana.
10 Imeimehnõ nonory põkõ neneryme porehme tyjamitunuru kurã enepõko Ritonõpo mana.
Typoetory tõ pynanohnõko Kuesẽkõ mana,
moro enẽko sero nono põkõ porehme.
11 Ypoetory tomo, Papironia poe otũtatoko!
Irumekatoko emero porehme,
mame nuriame aexityã anapopyra ehtoko.
Ekurãkatoko amarokomo, Ritonõpo Tapyĩ mõkomory kurã aronanomo.
12 Seromaroro oytorykohtao axĩ pyra tũtãko matose,
oeparykõ se pyra exĩko matose, Ritonõpo aarorykõ ke.
Oewomatorỹko Izyraeu tõ Esẽ omye xine mana.
Ritonõpo poetory etuarimary poko
13 Ynara ãko Kuesẽkõ mana:
“Ypoetory nyriry emero zae exĩko mana;
toahmasẽme exĩko mana,
tuisamehxo ynororo exĩko mana, ekãtõko mã imoihmãkomo.
14 Tuhkãkõ tõsenuruhkase mokyro eneryke tyya xine,
itamurume tyyryhmase aexiryke
onenetupuhpyra epe tõ nexiase,
ahnome pyra tokarose ynororo eya xine.
15 Yrome tuhkãkõ imeimehnõ nonory põkõ kurãkãko mana;
mokyro eneryke tyya xine ynara ãko mã toto ipoko:
‘To, tuisamehxo mana,’ ãko.
Tuisa tõ osenuruhkãko roropa mã toto.
Mokyro eneryke zurupitopyra exiketõ enẽko mã toto,
enetupuhnõko mã toto onetapitopyra ro aexityã ipoko.”