49
Izyraeu saerehkaneme ahno tõ rãnao
1 Etatoko ke, ahno tomo moe nono põkomo,
ywy ase Ritonõpo poetoryme, jomiry etatoko;
otato ehtoko imeimehnõ nonory põkõ emero!
Jenurutopõpyry poe tymenekase ywy Ritonõpo a,
aja wakuru ao ro jahtao jesety ae tykohmase ywy eya.
2 Jomiry taere exikety sã tyrise eya, tapema aehtohpyry samo,
towomase ywy tomary ke eya.
Pyrou sã tyrise ywy eya pohsuime exikety samo
tukurãkase typyre ẽ ao, tõsẽ wotoh eraximatohme samo.
3 Ynara tykase ynororo ya:
“Izyraeu, ypoetoryme mase,
amaro jehtoh eneryke tyya xine tuhkãkõ jeahmãko mã toto,” tykase.
4 Yrome ynara tykase ywy:
“Toiparo rokẽ erokuase;
yjamitunuru tonahkase,
yrome jerohtoh otyhkara ro mana.”
Morara ahtao ro jerohtoh ewomãko Ritonõpo mana,
moro enetupuhnõko ase,
zae jepehmãko mana jerohtamitume.
5 Enurupyra ro jahtao tymenekase ywy Ritonõpo a typoetoryme jehtohme,
Jako pakomotyã enehtohme ropa tyya, Izyraeu tõ sapararahme exiketõ enehtohme tyya.
Imehxo exiketyme jekarõko Kuesẽkõ mana;
Ritonõpo poe jamihme ase.
6 Ynara ãko mã ynororo ya:
“Pitiko rokẽ oerohtoh oya nae?
Ypoetoryme orĩko ase Izyraeu tõ enehtohme ropa isene ro exiketomo,
toto kurãkatohme ropa inonorykõ po.
Moro motye oekarõko ase juteutõkara ezurume roropa oehtohme,
imeimehnõ pynanohneme oehtohme sero nono etyhpyry ponãmero.”
7 Ritonõpo, Izyraeu tõ Esẽ Kurano, Ipynanohnekõ roropa,
ynara ãko typoetory a, tyhtomase aexihpyry a,
ise pyra aexihpyry ahno a, pata tõ esẽ namoto a:
“Tuisa tõ ajamitunuru enẽko;
xikihme owõnõko mã toto:
‘Tuisamehxo Mase,’ katohme.
Tuisa tõ poenõ tosekumuru po porohnõko mã toto oẽpataka:
‘Imehxo Mase,’ katohme.
Ywy, Ritonõpo, zae rokẽ ase, emero tyrĩko ase jomihpyry ae ro;
ywy, Izyraeu tõ Esẽ Kurano, kymenekase ypoetoryme oehtohme.”
Pata Jerusarẽ tyrisẽme exĩko ropa mana
8 Ynara ãko Ritonõpo Kuesẽkõ typoetory tomo a:
“Opynanohtohkõ toehse ahtao õmirykõ etãko ase,
oezuhtorỹko ase, ãkorehmatorỹko ase.
Oewomatorỹko ase.
Mame amaro xine jomiry etapõko ase imeimehnõ ahno tomo a osepeme ehtohme.
Ononorykõ rĩko ropa ase kure,
oesarykõme moro nono ekarõko ropa ase oya xine typahse aexihpyry.
9 Ãpuruhpyry taõkomo a ynara ãko ase:
‘Otũtatoko ropa ãpuruhpyry tae!’
Ikohmamyry ao aexityamo a ynara ãko ase:
‘Tymyhpokase matose oytotohkõme ropa saeremãka!’ ãko.
“Kaneru sã exĩko mã toto onahpoty enapyryhtao osema ehpio, emorymã po roropa.
10 Emitapãpyra, tuna zehnara exĩko mã toto.
Toto onyryhmara xixi exĩko mana tyryrykane axitunety roropa nono tonorẽ poe, toto pyno jexiryke,
zae toto arõko ase tuna enatyry tõ pona.
11 Osema konõto rĩko ase ypy tõ rãnakuroko,
osema amimomã poro ypoetory tõ ytotohme.
12 Oehnõko ropa mã toto moino,
imehnõ nonory poe, inikahpoe te,
xixi omõtoh wino te, Asuã poe roropa ikurenaino.”
13 Kapu tomo, oeremiatoko!
Nono tomo, atãkyematoko!
Ypy tomo, okohtatoko tãkye oehtohkõke!
Typoetory tõ emuhkehkapõko Ritonõpo mana;
typoetory tõ etuarimaketõ pynanohnõko mana.
14 Yrome Jerusarẽ põkõ ynara tykase:
“Kuesẽkomo a turumekase sytatose;
kypoko xine tuenikehse Ritonõpo mana.”
15 Ynara ãko Ritonõpo, toto ezuhnõko:
“Poeto ẽ tumũkuru poko wenikehnõko nah?
Tumũkuru nymyry pyno exikehsaromepyra mana.
Morarame tumũkuru poko tuenikehse nohpo ahtao ro,
jũme wenikehpyra exĩko ase opoko.
16 Jerusarẽ, jũme owenikehpyra ase!
Jemary tõ pokona oesety tymerose ya mana.
17 Orinanõ ropa axĩ oehnõko mã toto,
oryhmahpõkõ orumekãko, epãko mã toto.
18 Osenuhmako omye enetohme,
oekyry tõ oximõnõko mã toto;
oehnõko ropa mã toto tosaka xine!
Ywy Ritonõpo, isene Exikety, ynara etapõko ase:
mokaro emero õkyry uuru risẽ sã mã toto,
epyrypãko matose oekyry tõ poko,
niotakety tõkyry poko epyrypakety samo.
19 “Ononorykõ typahse nexiase, turumekase roropa,
yrome seromaroro pitikohxo exĩko mana oehketõ pune pyra;
mokaro oryhmahpõkõ mya tarosẽme exĩko mana.
20 Mame oekyry tõ imehnõ aenurutyã imepỹ nonory po ynara ãko oya imeĩpo:
‘Sero nono pitikohxo nase;
osa zumohxo se sytatose kuesarykõme!’
21 Morarame ynara ãko mase oseya:
‘Onoky a tumũkuase moxiã emero ypoenõme?
Ywy, nohpo toemũkuakehse aexihpyry, turumekase, tynomose,
ãpuruhpyry tao tapuruse - onoky a moxiã tuãtanohpose ypoenõme?
Toiroro exiase - otokoino toehse moxiã emero nah?’ ”
22 Ritonõpo Kuesẽkõ ynara ãko typoetory tomo a:
“Jemary anỹnõko ase imehnõ nonory põkõ neneryme,
opoenõ enehtohme ropa Jerusarẽ pona, opoenomo,
oẽxiry tõ roropa tonao xine toto puimãko tymota po roropa.
23 Tuisa tõ jũkõ sã opoenõkõ pyno exĩko mã toto,
ipyxiãkõ opoenõ pyno ehtoh poko erohnõko mã toto.
Tosekumuru po porohnõko mã toto oẽpataka tõmytykõ po nono pokoxi.
Erohnõko mã toto opoetoryme.
Morara ahtao zuaro exĩko matose ywy ase Ritonõpo,
jenetupuhnanõ jũme emynyhmara exĩko mã toto.”
24 Soutatu wino imõkomory anapoisaromepyra imepỹ mana etonakehxĩpo.
Tuisa jamihme exikety winoino inamoto tõ onupuxihkasaromepyra ropa imehnõ mana.
25 Yrome ynara ãko Ritonõpo mana:
“Ywy soutatu tõ winoino inapoityãkõ puxihkãko ropa ase;
tuisa jamihmã winoino inamoto tõ apoĩko ropa ase.
Etonãko ase ozehno exiketõ maro,
opoenõ pynanohnõko ase.
26 Mame oepetõkara tõsenahkarykõ poko toto ripõko ase.
Aetỹtyã exĩko mã toto imehnõ etapary poko,
zehno toexirykõ poko roropa.
Morarame ahno emero zuaro exĩko mã toto
ywy, Ritonõpo, Opynanohnekõme ase;
ãpuruhpyry tae otũtanohponekomo.
Zuaro exĩko mã toto
ywy, Ritonõpo, Izyraeu tõ Esẽ Jamihmehxo ase.”