46
Papironia põkõ neponãmary
1 “Papironia põkõ neponãmarykõ Peu te,
Nepo maro toahmase aexityã toepuise, nono pona toepukase.
Moro ineponãmarykõ takimase tyritohme jumẽtu tõ pona;
omoxĩ mã kehko okyno tõ ipuimananõ totaehse ahtao.
2 Moxiã neponãmary toepuise, epukãko mã toto;
osepynanohsaromepyra mã toto,
tarosẽme exĩko mya epetõkara a.
3 “Izyraeu tomo, etatoko pahne,
Jako pakomotyã emero isene ro exiketomo!
Moino ro oenurutopõpyry poe ro tupuimase mexiase ya,
opyno xine exikehpyra exiase.
4 Ywy Ritonõpo Oesẽkõme ase,
opyno xine exikehpyra ase tamuhpõme oehtohkõ pona,
oũsetykõ karimutume ehtoh pona.
Kyriatose, aarotorỹko ase;
ãkorehmatorỹko ase opynanohtorỹko ase roropa.
5 “ ‘Onoky sã jekarõko matou?’ ãko Ritonõpo.
‘Onoky nae ysã exikety?’
6 Ahno nae tytineru apoĩko mã toto,
uuru pitiko rokẽ pyra, parata itamurume roropa,
mame tyrine epehmãko mã toto
moro uuru ke moro parata maro tyneponãmary ritohme.
Mame porohnõko mã toto
tosekumurukõ po tyneponãmarykõ eahmatohme.
7 Mame tyneponãmarykõ anỹnõko mã toto
tymotary pona ipuimatohme, esaka tyrĩko mã toto;
moroto rokẽ exĩko, ytosaromepyra mana tosary poe.
Eya ahno otururuhtao onezuhsaromepyra mana;
ahno onypynanohsaromepyra mana
popyra ehtoh toehse ahtao eya xine.
8 “Wenikehpyra ehtoko sero poko, iirypyrymãkomo:
osenetupuhtoko ynyrihpyry poko tuaro oehtohkõme.
9 Wenikehpyra ehtoko pake ynyrihpyry poko,
mame enetupuhtoko ywy rokẽ Ritonõpome ase,
imepỹ ypanõ pyra mana.
10 Apitory poe kuruatose sero etyhpyry poko.
Pake ahtao oturuase senohne emero ehtoh poko.
‘Josenetupuhtoh emero exĩko mana, ekurehpyra,
tyriry se jehtoh tyrĩko ase emero porehme,’ tykase ywy.
11 Orutua kohmãko ase xixi tũtatoh wino aehtohme;
moe nono poe, piano yhtory sã axĩ oehnõko mana ynyripohpyry ritohme emero porehme.
Jomihpyry ae ro emero tyrĩko ase;
josenetupuhtoh rĩko ase rahkene.
12 “Putuhtome exiketomo, etatoko pahne!
Ynara osenetupuhnõko matose:
okynahxo opynanohtohkõ oehpyra ekarõko matou?
13 Yrome ameke hkopyra opynanohtohkõ enehpõko ase jomihpyry ae ro;
okynã pyra orẽpyra exĩko ase.
Okynã pyra Jerusarẽ põkõ pynanohnõko ase, morarame imehxo jehtoh enepõko ase Izyraeu tomo a.”