35
Jerusarẽ põkõ tãkye ehtoh ropa
1 Ona tonorẽ atãkyemãko mana,
ekutãko ropa mana nono tonorẽ po;
2 Otyro ekuru tõ ke pehme, ona tonorẽ eremiãko mana tãtãkyemaryke.
Kure potu moro ona rĩko Ritonõpo mana ypy tõ Ripano samo,
otyro zamaro moro nono rĩko roropa mana ypy Karameru samo, jakanahmã Sarõ sã roropa.
Emero saeremehxo Ritonõpo ehtoh enẽko mã toto,
tuisamehxo Kuesẽkõ enẽko roropa mã toto.
3 Jamihmehxo oemarykõ tyritoko totaehse toto ahtao, oesekumurukõ roropa jamihme pyra aexityamo.
4 Kaxiko typoremãse exiketomo a:
“Enaromyra ehtoko; jamihme ehtoko,
Ritonõpo Kuesẽkõ oehnõko mana.
Kypynanohse xine oehnõko mana,
kuepetõkara wãnohse oehnõko mana.”
5 Mame tonurãkara osenuhmãko ropa,
otato pyra exiketõ otatõme exĩko ropa;
6 ahmitatyamo pyhsekyhme ytõko te,
wãko roropa mã toto,
tõmire pyra exiketõ eremiãko mã toto tãtãkyemarykõme.
Tuna enatyry tõ soesoekaneme exĩko nono tonorẽ po,
iporiry tõ axĩ serere ãko mã kehko nono tonorẽ kuroko.
7 Isawã axitunety ona tonorẽ po ikuhpome exĩko,
tuhke tuna enatyry nae exĩko ona tonorẽ po.
Onokyro tõ esaryme mã nono tahxikure exĩko, pyrou tõ ahtãko, muzua tõ sã roropa.
8 Moroto osema konõto nae exĩko,
tosehpase “Ritonõpo Kurã Esemaryme.”
Moro ae popyra ehtoh poko exiketõ ytopyra exĩko,
Ritonõpo poetory tõ moro osema ae ytõko mã toto.
Tuamekaro exiketõ moro ae aytorykohtao tahpyra exĩko mã toto.
9 Moro osema po reão tõ pyra exĩko mana,
onokyro tõ ytoytopyra mã toto moro ae;
mokaro ipynanohtyã rokẽ Ritonõpo a moro osema ae ytõko mã toto.
10 Toremiarykõme pata Jerusarẽ pona omõnõko mã toto,
kohtãko mã toto tãkye rokene.
Tãkye exikehpyra exĩko mã toto jũme, atasamara,
emynyhmara, xitara mã toto.