AMOXI
Amós
Ekarotopo
Amoxi kaneru tõ pyno exiketyme pata pitiko Tekoa po, Juta po. Tymenekase ynororo Ritonõpo a tõmiry ekarotohme Izyraeu tomo a inikahpozakoxi. Morara kynexine jeimamyry 750me Jezu Kyrixtu oehpyra ro ahtao, Jeropoão 2mano tuisame ahtao. Etonatoh pyra kynexine moroto Izyraeu po, yrome iirypyryme ehtoh moroto kynexine.
Tymõkomoke exiketõ rokẽ emãnõko toh kynexine, yrome zae pyra toh kynexine, enekunohnõko, imehnõ ryhmãko emero rokẽ po. Ritonõpo poko toto ahtao zae nymyry pyra toh kynexine. Naeroro turuse toto urutono a tyyrypyry rumekatohme, eramatohme ropa Ritonõpo a zae ehtoh poko rokẽ ehtohme ropa, popyra ehtoh se pyra ehtohme. Enepotoh ekaroryke Ritonõpo a Amoxi a zuaro toehse ynororo: typoetory tõ wãnohnõko Ritonõpo mana, yrome toto onenahkapopyra mana. Imeĩpo kure ehtoh enehpõko ropa Ritonõpo mana toto emãtohme ropa, osepeme tyrĩko mana, tãkye ropa tuisa Tawi ehtopõpyry samo.
Sero pape ao
Izyraeu zomye aexityã wãnopyry 1.1—2.5
Izyraeu tõ wãnopyry 2.6—6.14
Amoxi nenehpyry tomo 7.1—9.15
1
1 Sero omi Izyraeu tõ poko Ritonõpo nekarohpyryme mana Amoxi a, kaneru tõ poko erohkety, pata Tekoa po. Moro toehse asakoro jeimamyry nono tykytyky kara ro ahtao, Uzia tuisame ahtao Juta po te, Jeropoão, Joaxi mũkuru, tuisame ahtao Izyraeu nonory po.
2 Ynara tykase Amoxi:
“Ypy Xião poe, Jerusarẽ po,
opore oturũko Ritonõpo mana,
aomiry konomeru sã mana.
Onahpoty orihnõko mana,
tonore toehse ypy Karameru po porehme.”
Imeimehnõ wãnohnõko Ritonõpo mana
Xiria
3 Ynara ãko Ritonõpo mana:
— Pata Tamaxiku põkõ iirypyryme toehse itamurume, morara exiryke toto wãnohnõko ase. Kireate põkõ tyyryhmase eya xine exiryke, toto pona kahu tõ tarose eya xine ipupuru parihmã typohke kurimene risẽ ke.
4 Morara exiryke apoto enehpõko ase tuisa Hazaeu tapyĩ konõto zahkatohme, tuisa Pẽ-Hatate tapyĩ tõ jamihmãkõ maro.
5 Pata Tamaxiku omõtoh apuru tõ kararahnõko ase, Jakanahmã Awẽ põkõ enahkapõko ase, Pete-Etẽ tuisary maro. Xiria põkõ arõko imehnõ mana typoetoryme Kia nonory pona. Ywy Ritonõpo oturuno.
Pirixitea
6 Ynara ãko Ritonõpo mana:
— Kaza põkõ iirypyryme toehse itamurume, morara exiryke toto wãnohnõko ase. Ahno tapoise eya xine imepỹ nono põkõ porehme tynamotokõme, toto ekamotohme Etõ tomo a.
7 Morara exiryke apoto enehpõko ase Kaza apuru tõ zahkatohme. Moro pata tapyi tõ jamihmãkõ zahkãko roropa moro apoto mana.
8 Tuisa tõ Axitote te, Axikerõ roropa enahkapõko ase. Pata Ekorõ enahkapõko ase imehnõ pirixteu tõ maro porehme. Ywy Ritonõpo oturuno.
Tiro
9 Ynara tykase Ritonõpo:
— Tiro põkõ iirypyryme toehse itamurume. Morara exiryke toto wãnohnõko ase. Ahno tapoise eya xine, tõmirykõ totapose ahtao eya xine osepeme ehtohme. Tynamotokõme emero tarose eya xine Etõ pona.
10 Naeroro apoto enehpõko ase pata Tiro apuru zahkatohme, tapyi tõ jamihmãkõ zahkãko roropa mana moro pata po.
Etõ
11 Ynara tykase Ritonõpo:
— Etõ põkõ iirypyryme toehse itamurume, naeroro toto wãnohnõko ase. Tõsetapase toto takorõ tõ maro, Izyraeu tõ maro, toto pyno pyra, onypynanohpyra roropa toh nexiase. Mokaro zehno Etõ tõ exikehpyra mana, jũme sã toto se pyra toh mana.
12 Morara exiryke apoto enehpõko ase pata Temã zahkatohme, tapyi tõ jamihme exiketõ zahkãko roropa moro apoto mana Posora po.
Amõ
13 Ynara tykase Ritonõpo:
— Amõ põkõ iirypyryme toehse itamurume. Morara exiryke toto wãnohnõko ase. Tõsetaparykõ poko toto ahtao, Kireate nonory po, itamurumehxo nono apoitohme tosarykõme nohpo tõ tuahkase eya xine, poetoẽme exiketomo.
14 Morara exiryke apoto enehpõko ase pata Rapa apuru zahkatohme, mame moro apoto tapyi tõ jamihmãkõ zahkãko roropa mana moro pata po. Osetapatoh exĩko mana, kui ãko, orihnõko roropa mã toto, moro po.
15 Tuisa arõko mã toto, kowenu poetory tõ maro, imehnõ namotome toto ehtohme. Ywy Ritonõpo oturuno.