BALAN JISAS KRAIS NAKLIPU JON ENYI
Banenyi balan umu enenyi enen God nagilapu Jon umu.
1:1-8 Jon kobi nonobek yomnis umu ali natik enechi enech echudak ali nowemu enyudak balan nyanamu 7-poleib lainab God ananich elpech ali natuk Jisas Krais ananin yeul nyakih.
1:9–3:22 Jon natik Jisas Krais nanubu nohiyatik ali ananin balan nyanamu echech wolobaichi Kristen chape 7-poleilub walub uli
4:1–8:1 Jon natik iluh heven, ali natik Jisas Krais nanu ananinu Aninu God, hanu wolobaichi enselahas ali natik Jisas nokwechih 7-poleis kendelis gris douk sowechik enyudak pepa douk chodalechen uli.
8:2–11:19 Jon natik 7-poleich enselahas atin ati chasuh aluluh ali chehepichaluh
12:1–13:18 Satan eke nunu God ananich wolobaichi enselahas chulpak ali chuhiyahanu nugluki apudak atap
14:1–15:8 Jon natik Jisas natoglu kobi douk nugan sipsip umu ali nanu 3-poleich enselahas chanubu chabo echebuk elpech douk chakanu agabus God uli
16:1-21 Jon natik enech kipaichi 7-poleich enselahas. Echech atin ati chasuh malus.
17:1–19:21 God eke nubemech yowenyi echudak elpech chape wabul Babilon uli, ali Krais eke nutoglu kobi douk alman netemu chagalihwinyi hos umu ali nunaki.
20:1-15 Satan eke nunek kalabus nupeik namobuk agudak gagal gagluk gani atap uli bobigu ali God eke nunek skelimu-maguk chunatimaguk elpech iyuh
21:1-27 Nupoleibul wabul Jerusalem
22:1-6 Wolubibal abal blanu chulkwipigas lowas douk eke elpech chichah ali chupe kalbu eheh nyumneh uli.
22:7-21 Jisas Krais ananin nyatuh uli balan douk nohwalu wolobaichi elpech umu chunakmali anan
1
Balan Jon Nenyemu Nyaklimu Okwudak Buk Uli
1 Seiwak enyudak balan umu Jisas Krais nyonobechuk. Wakuli nameitu abudak nyultab enyen anyatoglu yopugunmu. God douk nakanu enyudak balan Jisas umu nuklipu chenek God ananin moul ulimu nugilapech umu chonobechuk uli echudak ahalakatimu chutoglu. Anan douk nagilapapu namudak. Anan nakagasi ananin ensel nyanamali yek Jon douk yenek God ananin moul uli ali nyaklipe enyudak balan.
2 Ali yek yatik echudak chanatimaguk julug ali yek yowoleh enyudak balan yaklipepu yopugunmu. Enyudak balan douk God ananin nyanu enyudak adulin balan Jisas Krais naklipapu-enyi.
3 Enyudak balan nyetemu okwudak buk uli douk nyaklimu echudak douk eke chutogloluli. Ali chunatimaguk elpech douk chutalih enyudak balan nebegun umu kipaichi chumneken uli, echech wosik chunehilau. Ali echebuk douk chumneken ali chuhwen dadag chugipechen uli echech chopuk douk achenehilau. Umu moneken, abudak nyultab umu echudak chunatimaguk chutoglomu douk abanaki halakati.
Balan Jon Nenyemu Nyanamu God Ananich Elpech Chape 7-poleilub Walub Uli
4-5 O ipak God ananipu elpech pape albudak 7-poleilub walub douk blape Provins Esia uli. Yek Jon yenekumepagu asudak pas ipak. Yek yakli God douk seiwak nape, ali kwali chopuk eke nupe aliga hugikuk uli nyumnah hutogloluli nugakomepu meyoh. Ali anan nugakomepu pupe dodogowipu ali ipakiluh apaluh hlulu kalbu. Ali chopuk, yakli echudak 7-poleich yopichi michich douk chape halakatimu God ananin nebenyi sia uli chunu Jisas Krais chopuk chugakomepu meyoh ali ipakiluh apaluh hlulu kalbu. Jisas Krais douk neyotu dodogowinu atunu nagipech ananin balan kalbaluli naklipapu nyanatimaguk God ananin adulin atinyi balan nakwukwihen kalbu. Ali susubati God nalik nohul anan natukemaguk iwagu ali wata naitak nape. Ali anan douk nanubu nape nebenalimu hanatimaguk nebemi king douk hape apudak atap uli.
Anan douk ulkum manubu manohwapu ali ananig butog gwotukwle ali gwokwechihapu mape fri umu enenyi enen apakin yowenyi.
6 Ali nameitu anan nenekapu mape nebepalimu wolobaichi elpech kobi douk king omimu. Ali chopuk, anan nenekapu mape pris kobi amam seiwak hape henek ofamu enechi enech echudak hoku God ulimu. Ali apak monek moulomu God douk Jisas Krais nenek lotumanaluli. Ali anan chopuk douk ananinu Aninu. Ali yek yakli nebenyi yeul nyunu nyunatimaguk strong chunubu chupemu anan atunu eheh nyumneh! Adulin atin.
7 Ipak tik! Anan eke nunali olug nunaki. Ali chunatimaguk elpech chunu echebuk douk seiwak chanu nagak uli eke chutulunu echechis nabes. Ali sunatimaguk nebesi awilas elpech douk chape apudak atap uli eke chuleponu sisahw. Aduligu atugu echudak eke chutoglu namudak ati. Adulin atin.
8 Ali nanubu nebenali dodogowinali God douk seiwak nape, ali nameitu chopuk nape, ali kwali eke nunaki uli nakli namudak, “Seiwak bawagas umu chanatimaguk enechi enech echudak wata enech chupe e wakuli yek ayalik yape. Ali kwali chopuk, ababuk nyultab chunatimaguk echudak chunak chutuhuk umu yek eke ipe.”
Jon Natik Krais Douk God Natalihanu Nakaganu Nanaki Uli
9 Yek ipakiwe saninu Jon douk yanu ipak monek pas Jisas atunaluli. Yek douk yatanuh ipak momnek nyih ali meyotu dodogowipamu musah enenyi enen hevi douk eke nyutogloma-paluli. Ali nameitu chopuk, yek eke itanuh ipak umu muwich agundak God nape nebenalimu ananich elpech umu. Yek douk yaklipech God ananin balan nyanu enyudak adulin atinyi balan umu Jisas. Douk namudak ali echech chahwe chalaweli chanaki cheyasapu yapeik enyudak ailan yeulinyumu Patmos uli.
10 Anah nyumnah douk apak isave mape monek lotumu Diginali ahi, God ananin Michin nyatoglome dodogowin atin ali nyagilape echudak yatulich kobi yonobek yomnis yatulich umu. Ali yemnek anagu nebegali nigu agabahiwemu kobi douk chehepich oluhw umu.
11 Ali enyudak elpen nyeyagwlehi uli nyaklipe nyakli, “Nyak wemu echudak douk kedeke nyutulich uli anap chup pepa ali nyunek salimumap punamu God ananich elpech chape albudak 7-poleilub walub uli. Yeguhwilub umu walub douk albudak. Efesas, Smena, Pegamam, Taiataira, Sadis blunu Filadelfia uli Leodisia.”
12 Ali yek yatanamomu itik enyudak douk nyaklipe enyudak balan uli wakuli yatik 7-poleich echudak chenekech gol uli chatau. Echech douk chenekech umu chowemu lepoguhas chetemomu.
13 Ali ananu alman neyotu olokohun umu echudak 7-poleich chenekech gol uli. Anan nalu anah louhi lupah habih heyawimaguk ananiluh yaliluh ali nasak anatu let douk chenekatu gol uli ananigu mehekag. Anan douk kobi Anudak Alman douk natoglu Aduligeinyi Elpen ulimu.
14 Ali ananim boglom douk manubu matoglu chagalihwim kobi ohilub douk blatoglu sipsip uli o kobi chagalihwisi ais umu. Ali ananis nabes saglak kobi douk nebehi nyih hanu ali haglak umu.
15 Ali ananiluh yaliluh hlaglak kobi enyudak okigwana-luhinyi kapa douk chohwalen umu bras uli douk chenyeh nebehi nyih uli nyaglak umu. Ali ananigu nigu neyagwleh nebegun kobi abal blau gwululug gwululug umu.
16 Anan nasuh 7-poleiyu unib ananin anin logul, ali anatu wanohw-itali bainat douk wanohwitu wibul wobul uli tatogloli ananitu yokwatu. Ali ananigu yamagu ganubu gaglak kobi wah hatau nyumnah toul toul uli hohiyatik umu.
17 Douk yatulunu ali yanak yabih yakus halakatimu ananiluh yaliluh kobi ananu nagak uli alman umu. Wakuli anan nowemu ananin anin lagul yek ali naklipe nakli, “Nyak kobi elgeinyu, wak! Yek douk seiwak bawagas umu chanatimaguk enechi enech echudak watak enech chupe e wakuli yek ayalik yape. Ali kwali chopuk ababuk nyultab chunatimaguk echudak chunak chutuhuk umu, yek eke ipe.
18 Yek douk wo igak uli e, wak. Yek yape uli! Seiwak yagak wakuli nameitu yape, ali chopuk eke ipe eheh nyumneh. Ali yek douk yalau nebenyi namba uli pawa umu ipe nebewelimu agundak elpech chugak umu. Umu ikli echech chunamu yowebuli wabul o chunamu yopubuli.
19 Douk namudak ali nyak wemu echudak dukwechuk nyatulich uli chunu echudak douk nameitu chape chatoglu apudak atap uli chunu echudak douk eke kwali chugikuk chutogloluli nyakip chup.
20 Ali bawogenyumu balan likuk nyonobechuk umu oudak 7-poleiyu unib douk nyatulu yahwou yekin anin lagul uli douk namudak. Oudak unib douk wonek makim umu 7-poleich enselahas douk chape chenek lukautumu God ananich elpech chape albudak 7-poleilub walub uli. Ali bawogenyumu balan umu echudak 7-poleich chenekech gol ulimu chuwemu lepoguhas umu douk nyaklimu God ananich elpech douk chape albudak 7-poleilub walub uli.”