5
Ohuna moba pepa moanmoanig fakig i afa sipsip i
1 Afa ka nangogba el misog elni pegag sime wa gafenaba afa nihiginai ningana pepa moanmoanig kehla oguiafna. Enaba ginof enanai yi ohgam gohna afa ehegam gohna enaig elegeg wa gohug guwonunbugna pakopako fenagini.
2 Afa ka higinaba Godna of wanai el kifutig el enaig wagegofna og, “Aman el so unehlana feg eso ena guwoanibna hugfo taitinam eso pepaba pigif?”
3 Afa heven wanai yi, bite nai yi, afa bite menai yi aman el mas yuhwafeg mo pepaba pigigim afa enam nangug mo.
4 Afa ka hugna enam ufwena afa mas aman yuhwafeg mo pepaba pigig nangwagba.
5 Afa ena kwamblo el bog kam sihina og, “Nofeka ufwe, so nangu, ena elbi eba Juda nai Laion afa ehe Devitna simbianinga ehe ati fagim filafeg fatig. Eba ehe yuhwafef guwonunbug hugfo taitinam eso pepaba pigif.”
6 Afa ka nanguba Sipsip Luwalig pegag sime olyi goh. Afa ena simem sambaga sambaga sis bistanafeg afa kwamblo el enam higeg fakag. Sohna sipsip ofenaiba ati wahag afa mas wahag mo. Afa ehe elegeg wa gohug anguog nafeg afa elegeg wa gohug nofug feg enaba Godna sungwag elegeg wa gohug God mungwali bitem ningitigi.
7 Afa ehe bogim el pegag sime naina ena pepa nihiginai ninganai fag.
8 Afa mahim ena pepa fanaba afa so sambaga sambaga sis bistanig i afa 24 kwamblo el i Sipsip Luwalig nai yi apaigona eso ehena unehlag wa fingi fig. Afa mungo mungo moag wanwagig wambugini afa sanda gol disni fini eba lahlag fungugni feg enaba Godna elni beten.
9 Afa ehengel mulug mwanifi enaig fatifini og;
Eba ne pepa fanam yuhwafef ogwanin hugfo aitif, asegba eba ati nem tigigbi ne wahagim afa taf sugfogum enana elim mungwali mungo muswuna, afa ahanaig ahanaig mona, afa ahanaig ahanaig lofugna, afa ahanaig ahanaig kimbig afa so wambugum God nangum wambug wambubug pugug.
10 Afa ne ehengelim esinigbi eso pris figim afa so bigelni Godum gafugafinig eso ehengel mungwali bite nangwaghiagif.
11 Afa ka nangunam higinaba of wanai el hugna enaksag fiagena afa ahanaig suwigih mo. Enag pegag simem, afa sis bistanig mi, afa kwamblo el mi enam wahigi fakana.
12 Afa so mwanifi hugna fatini og;
Ena Sipsip Luwaligim tigifatigbi wahag ehe ati yuhwafeg eba ehe nalig kigmog feg, afa mungwali gawig feg, afa mungwali anwanafig, afa kifutig feg, afa mungwali ehem ahnai skaufinigbi eso ehe sisi feba afa so bigel ehena unehlagim fingi fif.
13 Afa ka higinaba heven wanai yi, afa bite nai yi, afa bite menai yi, afa bu menai yi enag mungwali God so gafugafena enag ehengel mwanifi fatini og;
Afa el so pegag sime wa gag mi afa Sipsip Luwalig mi afa so bigel higeg eheningina unehlagim fingi fiawag gwese hufufim eba enaig eseg soma mungwali eheningim ahnai skaugfegonibi eso eheningi sisi ahfef afa eheningina kifutig gwenaig higeg gwese ahgofuf.
14 Afa sambaga sambaga sis bistanig esog, “Eba esef” afa amunai el apaiyenam eheningina unehlagim fingi fiawagig.