10
Israveel Eena Barjosa Goynka Kenin Yivaammo
1 Imbanaanato, isa woylaminte dohon anngarmanka Barjoam inin miskayno Israveel eena kenin dhaqoadettsine.
2 Barjona kesa dohoono woogintano gon konin dohonam inta kena tarjayda tarje; ko dahaannaar kesa woogintano dhesintonka dhaabhoonotehe.
3 Barjo birante tipa maaten goynam dhesima, yiam tipa hayana kenin zagonna, Barjo birante tipa maaten goynna ee hamadehe.
4 Kiristoosdar woylamin qajayna wul Barjo birante tipa kenin maatoadettsi, Kiristoos Muse yigginsa maccheane.
Dhaqinta Een Wulna Konin Nivoono
5 Yigginam toolintaka Barjo birante haapadhen tipamonsa Museyn thaapenka, “Yigginam toolea sadaka kida dee” ki hamade.
6 Kiristoosdar woylamin qajintaka haapadhen tipamonsa yin giyayse thaapadhidine:
“Hasa woylaminka ‘Tura cecinte hayne utea?’ hamaabhode.”
(Ogono Kiristoosam mia hanchota hamintane.)
7 “Way hasa woylaminka ‘Diyaanayn dohon raqinte hayne mia hanchea?’ hamaabhode.”
(Ogono Kiristoosam dembhira dhaasota hamintane.)
8 Ko dahaannaar hamin ko giye?
“Barjosa upsino hakal theedine; ogono hasa apontebee hasa woylamintebene” koda hame.
Ogono wonin giyayno Kiristoosdar woylamin qajadhen upsinone.
9 Ogonoar “Yesus Imbaane” hamayse hasa aponka hanin tarjenna, Barjo kiam dembhira kinin dhaasonam gonne hamayse hasa woylaminka hanin tiyenna, dhaqaada dhaqe.
10 Harrna hambhidianna, eedi yisa woylaminka Kiristoosdar woylam qajayse Barjo birante tipa kida maate; yisa aponkaar tarjayse kida dhaqe.
11 Ogonoar “Kidar woylamin qajea wul ooshimbhehe” hamayse Mathaap Gazante thaapadhonnane.
12 Kalaa Imbaa wo wulsa Imbaa kinin dohonna, Ayiwd eenbee Ayiwdtay hamma eenbesa shaarinte edime qolehe; kiam eelayna wulna yisa wodimmakkorra thoothi kida ime.
13 Harrna hambhidianna, “Imbasa naabenam eelea wul dhaqa ki dhaqe” hamayse thaapadhonnane.
14 Keeda kidar woylamin qajaamma hamin kiam eelana ke dame? Kisa qansima hamin kidar woylam qajana ke dame? Kisa upsinam giyea qolma hamin hayayse qansana ke dame?
15 Keam yittsadhaamma hamin kisa upsinam giyana ke dame? Ogonoar “Payyan upsinam giyaate nivayna eena hamin ke wozise!” hamayse thaapadhondettsine.
16 Ko dahaannaar Isias “Imbo, wonin giyon upsinam hayne tiyaa?” hamayse kinin giyondettsi, wul wozisen upsinam tiyadehe.
17 Ta keeda Kiristoosdar woylamin qajintanin haapadhayno qansintakane; qansintanin haapadhaynoar Kiristoossa upsinam giidhenkane.
18 Ta keeda “Kedi Kiristoossa upsinam qansadayu?” hamayse ida oyse.
“Kesa upsino peen wulir ko qansimade;
kesa dhalqinoar peensa gasante ko yeskade”
hamayse thaapadhondettsi gon kedi qansidine.
19 Pir Israveel eena Kiristoossa upsinam dhesadehe hamintaw? Dhesidine! Muse birayse
“Barjo ‘Inta bagadhon zarsinka yeam ida wooginse;
bhocchimon zarsinkaar yeam ida wacinse’ ki hamade”
hamayse ki thaapade.
20 Isiasaar wocchimbhayse,
“Barjo ‘Iam zagaamma eenana i haapadhade;
iam oysaamma eenakal may i haapadhade’ ki hamade”
hamayse ki giyade.
21 Pir Israveel eenana ko hanna,
“Barjo ‘Ee hamimina eena ikal kenin nivoadettsi
burira yedayse ibaaninka yekka isa aaninam kena i pishkade’ ki hamade”
hamayse ki giyade.