3
Mwanty angkaynteyew
1-2 Nthakenh akngerr atyetyart aney-angenh tyaty-itwew, ingwer-rnem akalty-anthaynteyewan. Angka ikwerenh akalty-anthey-angker-rnem Akngeyel rlterrk inngangkwarr court-emeleyenh. Alakenh-wety rernem arraty aney-angker-rnem anemer. Mwanty anantherran anerl-anemer, apmwel-ayeth anantherr ingwer-rnemew angkewerr. Ingwer-ingweran Akngeyel ingkerrenh ayerneyenh-wety, nthakenh-nthakenh ingkerrenh angkenhan. Rlterrk anewantherr, mwerr-angkwarr angkaynteyewan intem. Ingwerentyan apek arraty angkey-angker, rap arratyarl anem aney-angker.
3 Artwa nantew-arenyew iterrenh-arey. Ra ampwal akely ayen-penh arrernem nantew-warl arrakert-warl, rwepel arertnemel. Artwel rwep renh antwerrkerl-apaynteyew, nantew ilkwa arratyel-aynteyew.
4 Rtnwa ilkwew iterrenh-arey. Ampwal akely anteng-itwew ayntem turn-emeleyew-arelh rtnwa renh. Artwa rtnwew-artey ampwal akelyel alpemelem, rtnwa ilkwa arraty akngaynteyew kwaty alay-itwew.
5 Alenyew-anem iterrenh-arey. Irrkaty-angkwarr arrpemarl aynteyel. Akelyarlap ran, ilkwarl arlkan. Ranap angkeyew-arelharl. Ikwerel anantherr angkem ingwerek-ingwer nakelhemel, anper-then aneyew arrkernelhem. Ranap lherrm akely-apenyarl. Lherrm akely-tangkwel ampem, rap ampem ilkwanem ilkwanem, antywer-angkwarr arlpimperrem.
6 Alenyan rwa lherrm-apeny arrpemarl. Arlka kwenanap ampem, ilpertelem. Aleny ranap ahelengkw-anem irrem, ingkerrenh apmweley-angker. Rwa yanh-lkweranap arrenty ilkwewenh apmer-theyarl apetyem.
7 Atnwenth ateralth ilek-ilekew iterrenh-arey. Atnwenth ilek-ilek anantherr antwerrkemel arternpelem: ahern-areny, alker-areny, kwaty-areny. Apmer-itwew-anem atnyenerl-anemel.
8 Alenyanap arrangkw-anteyarl! Aterelerrey inngarl, rtnwem ahelengkw-apenyarl.
9-10 Alenyel anantherr mwerr-then apmwangkwarr-then angkem. Akngeyew anantherr nakemel aylelherrem, ingwer-rnemew tyel-angkemel-antey arrpemarl. Alakenharl angkeyelan apmwel-ayetharl. Akngeyelan yanh-rnem mpwarew arrpemarl. Nthakenh anantherr atherr-atherr angkey-angenh, arrangkw.
11-12 Atyenh-rnem, kwaty kwerrinpew iterrenh-arey. Kwaty irlwart arrnginp-then nthakenh ayntey-angenh kwerrinp anyent-itwew. Amern tywerrk nthakenh arlketyerr-angketyarrel aney-angenh. Amern arnwekety nthakenh alatyeyt-angketyarrel aney-angenh. Irrkaty-angkwarr nthakenh anantherr angkey-angenh atherr-atherr alenyel, arrangkw.
Akwerrng mwerr-angkwarran alakenharl aynteyel
13 Ingwerenty apek iterrem, rant akalty anper. Rap arraty anemer, ingwer-rnemel renh areyew akalty. Rap mwerr mpwaremer, ament nakelhey-angenh.
14 Artwa akaltyel ra nthakenh alharlkwey-angenh, ahelerrey-angenh-then. Nthakenh ra ilkwa aneyew arrkernelhey-angenh. Nthakenh irrtywerremel-then iley-angenh, ingwer-rnemaw akwel ikwer iterreyew akaltyew-arrpantey.
15 Artwa nhelkweranap irrwerl-arenyel alakenh akalty-anthey-angenh, arrangkw. Ranap artwa akalty-arrpanteyarl, ahern nhenh-areny-anteyarl. Arrenty ilkwelarl alakenh renh akalty-anthew. Inweng Akngey-wenhelanap nthakenh renh akalty-anthey-angenh alakenh, arrangkw.
16 Ingwerenty alharlkwey-angkerel, ingwer-rnemanap ra irrwernemarl. Ingwer-rneman ilkwa anaynteyew arrkernelhem, rernemap ilpertelem, ilek-ilek apmwa mpwaremel ingwer-rnemew.
17 Akngey-wenh-angkwarranap mwerrarl. Ikwerenh-angkwarran arratyarl: nthakenh ingwer-rnem irrwerney-angenharl, ament ingwer-angkwarr iterrey-angenharl, ahelengkw-weny, anyelk-awarr-wenyarl. Mwerrant-arey anem, athamerremel ingwer-rnemew, mwerr mpwaremel.
18 Anyentel ingwer-rnem alpemelem, mwerrant-arey akeleyt anaynteyew, mwerrarlap alakenhan. Rernemap ingkerrenh inkwerelhemel Akngey apentem arraty-angkwarr.