32
1 Jacob angkep alpenh. Angel-rnemel renh rlwatek. Jacob-el renh-rnem arek-penh angkek,
2 “Nhenh Akngey-kenh apmerarl.” Ra itnewek apmer renh itnan Mahanaim.
3 Esau apmer Seir-el anenh, apmer Edom ikwerel. Jacob-el angkakert atherr thwenek Esau-warl, apmer Seir-warl.
4 “Alakenh ayeng ngkweng awelhem. Laban-itwek ayeng anenh.
5 Aleyan atyenh tangkey-rnem-then pwelek-rnem-then yep-yep-rnem-then warrkenh artwernem-then, arelh-rnem-then. Artwa nhenh-atherr atha ngkweng-warl thweneyel, nga atyeng inkwerelhetyek.”
6 Angkakert ratherr apey-alpek, ratherr iley-alpek, “Esau nhewarl apetyeyel atningk ingwer-rnem-then.”
7 Jacob ater-anem irrek. Aterirremel-anem akngakek, atnwenth-rnem ingkerrenh artwernem-then.
8 “Esau-el anyent-ampeny atwentyan ingwer-ampeny-they ikwerety anterremarl.”
9 Ikwer-they Jacob Akngey-warl angkek, “Akngey ngenharl arrengey atyenhel apentenh, akngey atyenhel apentenh. INGKARTay, ntwa ayenh thwenek apmer-warl, atyenh-rnem aneyel-warl. Ntwa ayenh alhelek, ayenh arntarnt-aretyek, atyenh-rnem akngerriletyek.
10 INGKARTay, nga atyeng inkwerelhek, ntwa ayenh ipmey-angenh, aleth-antey arntarnt-arek. Ayeng irrertety atyenhant-akert Jordan Ilpay-angkwarr artarnpenhek. Atyenh-rnem akngerr innganem aleyant, atnwenth-rnem-then.
11 Atha ngenh ayernem, ayenh awayaty atyenh-kety Esau-kety arntarnt-ara. Ayeng ikwerety aterirreyel, ra anwenhantherr ingkerrenh-antey atwekerr. Amenheng-rnem ingkerrenh-antey.
12 Ntwa ayenh alhelek, ‘Atha ngenh arntarnt-aretyek. Atha atyenh-rnem akngerram-akngerrileyenh. Rernem akngerr innga aneyenh. Rernem akngerram-akngerrirreyenh antyarr-rnem akngerr alkerel aynteyel-apeny. Ingwer-rnemel ywarn-antey count-emileyenh antyarr-rnem-apeny.’ ” ...
Akngey-then Jacob-then intewerrenh
22 Ingwa ikwerel-antey Jacob ra akemirrek. Anew ikwerenh atherr-akert arelh warrkenh ikwerenh-atherr-akert alerikw ikwerenh 11-pel-akert.
23 Rernem Jabbok Ilpay-angkwarr artarnpenhek, atnwenth-rnem-then ikwerenh ra artarnpelhelek.
24 Kel, ament-areny ra anek. Artwa anyent ikwer-warl apetyek. Ratherr atwerrenh ingwepenhek-atwety. Ratherr intewerrenh.
25 Artwa ra ikwerant-penh arrkernelhek, Jacob antengiletyek. Ra aneny atwek, aneny ngkwern akngenhelhilek. Iytekilemel-anem apmwelek. Ratherr aleth-antey intewerrenh.
26 Artwa rap angkek Jacob ikwer-warl, “Ipmanem ayenh, ingwepenh-anem irreyel-kety.”
Jacob angkek, “Nthakenh alpey-angenh, mwerr-angkwarr atyeng angka, Akngeyel ayenh arntarnt-aretyek!”
27 Artwa ra ayernek, “Ilek itna ngan?”
Jacob ra ilelhek, “Ayengan Jacob-arl.”
28 Artwa ra ilek, “Itnan ngkwenh Jacob-weny-anemarl, ngarl Akngeyek arrkernelhenh artwernem-then. Ingkerrenhel ngenh itnew-ayntem Israel-ant-anem.” Angka ikwer-rnem-kenhel-anem Israel aynteyel, “Ratherr Akngey-then intewerrenh, antengiletyek-arrpantey.”
29 Jacob-el renh ilek, “Nganem itna itnewelha atyeng!”
Artwa ra tyernek, “Nthakenh ntwa ayenh iterl-arey-angenharl, ra mwerr-angkwarr mpwarek.”
30 Jacob-el apmer renh Peniel itnewek, angka ikwerenhel. Alakenh-anyem aynteyel, “Atharl Akngey renh arek, ra ayenh ipmek atwey-angenh.” Alakenh-anyem aleyan aynteyel itnan
31 Ingkeny kel tyerrelhek-anem. Ra iyternemel-anem alhenh, aneny ngkwern renh tyerrek-kety.
32 Alakenhaym-kety Israel-kenh-rnemel apmelerr aker aneny-penh nthakenh arlkwey-angenh atnwenth-penh.