10
1 Wũ manyii, iɖe kuɖɔɛ gɔ lobɔrɛ i wũ ɔtu ame gu wũ kayi ikparama sɔ ma Yudase aana iɖi.
2 Loawo ma kanya ɔɣɛ sɔ ma anɔ ɔrɛtɛ̃ i Ɣaa kasumu iso gbaã. Ɣɛɛ ma anɔ irɛtɛ isia i ɔri gɔ lokote iso.
3 Alasɔ maiɣe ɔri gɔ iso i Ɣaa sɛ ɔki ɔbara ɔturi bɔlɔlɔ i ɔ̃ anɔ. Ɣɛɛ ma mɔmɔ masɛ mabie ma ɔri matã so. Alasɔ maito mabie sɔ maabɔ so karɔ̃ matã Ɣaa sɔ ɔ̃ate ma ɔri gɔ iso maaki fiɛ maase bɔlɔlɔ.
4 Alasɔ Kristo nɖe Mose mmara ɔɖuɖu kawirikɔ̃. Ne ɔso ɔbiara gɔ lofɔ Kristo ɔɖe ne, ɔɖe ɔturi bɔlɔlɔa i Ɣaa anɔ.
Ɔturi Biara Aawo Ɔtã Sɔ Ɣaa Aatã Wũ Ngbã.
5 Mose ɔtsɛrɛ i ɔturi biara gɔ loase bɔlɔlɔ iki i mmara iso sɔ, “Ɔbiara gɔ loabara i mmara mɛgbe iso ne, mmara aatã wũ ngbã.”
6 Ɣɛɛ Ɔko Sekelea ɔɣɛ i ngɔ loase bɔlɔlɔ i Ɣaa anɔ iki i kafɔkaɖe iso sɔ, “Daakarɛ so sɔ, ‘Nna loakɛlɛ kato?’ ” Ne karɔ̃ nɖe sɔ, nna loaya ɔkɛlɛ kato ɔ̃akɔ Kristo ɔbɔ?
7 “Daakarɛ so sɔ, ‘Nna loakɛlɛ karɔ̃ ame?’ ” Ne karɔ̃ nɖe sɔ nna loakɛlɛ makpise aɖe ɔ̃atara Kristo ɔbɔ?
8 Ɣɛɛ nnɛ ɔte nɖe sɔ, “Ɣaa Itɔ̃me ɔbore imatã- ɔ, ipia i fɔ kanya gu fɔ ɔtu ame.” Fiɛ ne nɖe kafɔkaɖe itɔ̃me nɛ imomo boto bopɛ ne.
9 Si abusi fɔ kanya aɣɛ sɔ Yesu nɖe Bosate fiɛ afɔ aɖe i fɔ ɔtu ame sɔ Ɣaa ɔtara wũ ɔbɔrɛgu i makpise ame ne, Ɣaa to ɔ̃atã-ɔ ngbã.
10 Alasɔ fɔ ɔtu ame iɖe aafɔ aɖe fiɛ aase bɔlɔlɔ i Ɣaa anɔ, ɣɛɛ fɔ kanya aasu abusi fɔ kafɔkaɖe ate fiɛ aana iɖi.
11 Alasɔ ngbɔ matsɛrɛ i Ɔko Sekelea ame sɔ, “Ɔbiara gɔ lofɔ wũ ɔɖe ne, kunuarɛ iibakpɛ̃ wũ kunya.”
12 Nnɛgbe ɔte sɔ ne, ikpaki kuiwɛ̃ na i ma Yudase gu mma loiɖe ma Yudase ndɛ̃. Bosate nɖe bo ɔɖuɖu ɔse fiɛ ɔsɛ ɔbara mma ɔɖuɖu nsɛ masiai wũ isɛɛ.
13 Lɛ kumɛgɔ ipia i Ɔko Sekelea ame sɔ, “Ɔbiara gɔ loakpere Bosate iyere aana iɖi.”
14 Fiɛ ngɔ maifɔ maɖe ne, nda maabara fiɛ maakarɛ wũ ira? Fiɛ ngɔ iso Itɔ̃me maiɣere ma manya ne, nda maabara maafɔ wũ maɖe? Fiɛ si kuwɛ̃ iipɛ imomo ɔtã ma i ɔwi gɔ lofe ne, nda maanɔ maɣɛ?
15 Fiɛ si maipia ma katɔ̃me sɔ maɣɛ ne, nda maaɣɛ ne maɣɛ? Lɛ kumɛgɔ matsɛrɛ sɔ, “Mma nsɛgu itɔ̃me sɛɛ ngba to milɛ ɔnyɔ ala ma itɔ̃me ba ɔmɛrɛ̃.”
16 Ɣɛɛ ne, iiɖe ma ɔɖuɖu lofɔ Itɔ̃me Bielea nɛgbe. Alasɔ Yesaya ɔɣɛ sɔ, “Bosate, mabe lofɔ bo itɔ̃me maɖe?”
17 Ne ɔso ne, kafɔkaɖe sɛ kaya i itɔ̃me nɛ anɔ iso. Fiɛ itɔ̃me inɔ ɔse i Kristo itɔ̃me iɣɛ iso.
18 Ɣɛɛ ira nɛ lobie sɔ loakarɛ nɖe sɔ, ma Yudase ne, ɔnɔ mainɔ Ɣaa Itɔ̃me? Manɔ lɛ kumɛgɔ i Ɔko Sekelea ɔɣɛ sɔ,
“Manɔ ma kulu i kayiiso ɔɖuɖu,
fiɛ ma Itɔ̃me ɔki ikã kayiiso.”
19 Lobie sɔ loaledza ikarɛ sɔ mainɔ karɔ̃? Mose mɔmɔ nɖe ngɔ loɖe katɔ̃ ɔtsɛ Ɣaa Itɔ̃me kanya iɖi fiɛ ɔɣɛ sɔ, Ɣaa sɔ,
“Loatã sɔ mi anɔ aarɛtɛ i mma loiɖe ma Yudase iso.
Fiɛ loasu mma anɔ loibusi lopia mi sikpã.”
20 Fiɛ Yesaya ana ɔwe ɔtu ɔɣere ma sekelee sɔ Ɣaa sɔ,
“Maturi ma loinyɔnyɔ me ne, ma lonya me ne,
Fiɛ loɖi so lote mma loikarɛ wũ iti.”
21 Ɣɛɛ ma Yudase iso ne, Ɣaa ɔɣɛ sɔ,
“Lowarɛ wũ nrɔɔ̃ losɔ̃ ma ikpɛnɛ ɔɖuɖu sɔ si lofɔ ma. Ɣɛɛ maɖi me atsue,
alasɔ maɖe maturi ma mba atsuele
fiɛ mata maɣɛ me iso.”