Wapiyaro' Kareta
Isaan
Winɨpaino
Ekamanin
Wapiyaro' Kareta Isaan Winɨpaino esi eke ton asa'ron ku'nin pe: Imenukasa' ennin nan pori'manin pe Papa pokon pe mɨrɨ awonsi'kɨ Imu Sises Kʉrai pokon pe tʉuko'mansan pe to' e'to' pe, mɨrɨ awonsi'kɨ to' panamanin pe ennakan pe enupan nɨto' namai' serɨ si to' pokon pe e'nɨto' ma'tanʉ'nin. Serɨ enupan nɨto' esi apurɨ winɨ non eseru winɨ ɨri esi tukai', mɨrɨ pɨ' si Sises, Papa Mumu, esi'pʉ poken pʉra iyesi ka'pon pe. Kamoro si ti'sa amʉ' uya ta epika'tɨn nɨto' pe emo'kan nɨto' pe iyesi uko'man nɨto' yapai serɨ non po; mɨrɨ awonsi'kɨ to' uya kanan enupan nɨ'pʉ epika'tɨn nɨto' esi wakʉ pe rɨ iteseru e'nɨ uya mɨrɨ pe pʉra tʉron kon i'nʉnka uya rɨ ikupʉ pen ta.
Serɨ nin si enupan nɨto' esi mɨrɨ kane tawon pe mɨrɨ pɨ' imenukanin uya ekama Sises Kʉrai kuru rɨ esi'pʉ ka'pon pe tukai', mɨrɨ awonsi'kɨ ekama iya kuru tanporon kon Sises apurɨnin nan mɨrɨ awonsi'kɨ Papa i'nʉnkanin nan uya rɨ marɨ tʉtonpa kon i'nʉnkato' pe iyesi tukai'.
Iyawon Ekamanin
Ekamanin (1:1-4)
Iweyu mɨrɨ awonsi'kɨ ewarupɨ (1:5—2:29)
Papa munkɨ mɨrɨ awonsi'kɨ Makoi munkɨ (3:1-24)
I'napairon mɨrɨ awonsi'kɨ ipokena' pen (4:1-6)
Usi'nʉnkan tʉrawasooi (4:7-21)
Entakanin apurɨto' (5:1-21)
1
Uko'man Nɨto' Maimu
1 Iyepiya'tɨ si'kɨron, ina neta'pʉ, ina nene'pʉ tenu kon ke, ina nenpɨtʉ'pʉ, mɨrɨ awonsi'kɨ ina emiyatʉ na'pɨtʉ'pʉ—serɨ pɨ' ina usaurokʉ Uko'man Nɨto' Maimu pɨ'.
2 Uko'man nɨto' usenpoika'pʉ; ina uya ene'pʉ, mɨrɨpan ekama ina uya, mɨrɨ tɨwɨrɨ rɨ uko'man nɨto' pɨ' ina uya ayauro'ka kon, Ikʉipʉnʉ piyawon usenpoika'pʉ ina piya'.
3 Ina nene'pʉ, ina neta'pʉ ekama ina uya ɨpɨ'nokon; mɨrɨ pɨ' a'samʉtʉ yau e'nɨto' kon pe. Mɨrɨ awonsi'kɨ Ikʉipʉnʉ mɨrɨ awonsi'kɨ Imu, Sises Kʉrai pokon pe a'samʉtʉ yau e'nɨ'nokon.
4 Serɨ si menuka ina uya mararon pe pʉra pori' pe e'nɨto' kon pe.
Iweyu Yau Usarɨn
5 Se main, ina neta'pʉ iwinon ekama ina uya ɨpɨ'nokon: Papa esi iweyu pe; ewarupɨ pʉra kuru rɨ iyesi iyau.
6 Iyamʉtʉ pe e'nɨ ta yau e'tane ewarupɨ yau rɨ ɨtɨi'ma, kasi pe rɨ e'nɨ, i'napairon yau ɨko'mamʉi'ma pʉra rɨ.
7 E'tane iweyu yau utɨn pe iyesi yau, iweyu yau iyesi na'ne' kasa, ɨsitonpa pe a'samʉtʉ yau rɨ e'nɨ'nokon, Sises si, Imu mʉnʉ uya ukorʉka kon tanporon makoi apai.
8 Imakooi pʉra usi'tun pe iyesi yau, usenku'tɨn pe rɨ iyesi iwano' wannɨ pe rɨ, mɨrɨ awonsi'kɨ i'napairon pʉra rɨ iye'tane uyau'nokon.
9 Umakooi kon ekamasa' pe iyesi yau, ta'pʉ tʉuya awɨrɨ iyesi mɨrɨ awonsi'kɨ wakʉ pe rɨ upɨ'nokon iyesi, isentu'ma rɨ upɨ'nokon, mɨrɨ awonsi'kɨ ukorʉka iya 'nokon nɨ tanporon ipoken pʉra e'nɨto' apai.
10 Umakoitan nɨsa' pʉra iyesi ta'nokon yau, kasi ye' pe rɨ Papa kupʉ'nokon mɨrɨ, imaimu pʉra iyesi uko'man nɨto' kon yau.