Kareta Paarʉ Nennoko'pʉ
E'pe'sas Pon Kon
Ena'
Ekamanin
Kareta Paarʉ Nennoko'pʉ E'pe'sas Pon Kon Ena' esi isewankamasa' wapiya kuru, “Papa ekonekato' pɨ'…tanporo ikonekasa' amʉranʉ'to' pɨ' a'samʉtʉ ya', tanporon nɨ Epʉn pon mɨrɨ awonsi'kɨ non pon, Kʉrai si itesa' pe” (1:10). Ipan pe Papa munkɨ amʉ' ekama'po pe rɨ nɨrɨ iyesi to' uko'manto' pe se ta e'kwa pe serɨ eke kuru Papa ekonekato' esi ta pe ka'pon amʉ' enato' pe tikin nɨ, tikin nɨ e'nɨto' poro Sises Kʉrai pokon pe.
Wapiya iye'to' airɨ E'pe'sas Pon Kon yau imenukanin uya emo'ka tʉusauro'to' ipɨ' tikin nɨ e'nɨto' ite'ma pɨ' tʉusaurokʉ winɨ Papa ikʉipʉnʉ uya tʉmunkɨ ton anʉnsa', to' pɨ' isentu'masa' mɨrɨ awonsi'kɨ to' mo'kasa' iya to' makooi apai Sises Kʉrai tʉmu poro, mɨrɨ awonsi'kɨ eke kuru Papa usauro'sa' rʉ'pʉ e'ma takan pe iye'ku'sa' Wakʉ A'kwarʉ winɨ. Ipɨkɨron pe iyesi airɨ ipan pe tʉnmenuka'pʉ ennin nan ekama'po iya to' uko'manto' pe tikin nɨ to' e'to' Kʉrai yau enato' ipɨkɨrɨ pe i'nai rɨ to' uko'manto' yau a'samʉtʉ pe.
Tu'kan nɨ panton i'tuto' yai main utapurɨsa' tikin nɨ Papa munkɨ amʉ' esi enpoikanin pe tikin nɨ Kʉrai yau to' e'to': So'si esi pun esa' kasa, Kʉrai i'pai pe; mɨrɨ pe pʉra ɨutɨ tamɨsen kasa, Kʉrai itekun airo'nan tɨ' pe; mɨrɨ pe pʉra no'pʉ kasa, Kʉrai itaan'pʉ pe. Serɨ imenukasa' kareta enuku ipan pe rɨ ka'ta' ekamato' ya' imenukanin utɨ koro'tau eke rɨ wakʉ nonkasa' Papa uya winɨ usenuminkan nɨto' Kʉrai poro. Tanporon nɨ usene Kʉrai usi'nʉnkato' weyu yau, use'man nɨto', usentu'man nɨto', eke rɨ wakʉ nonkasa' mɨrɨ awonsi'kɨ esuken ɨri pʉra e'nɨto'.
Iyawon Ekamanin
Ekamanin (1:1-2)
Kʉrai mɨrɨ awonsi'kɨ so'si (1:3—3:21)
Emenna' pe uko'man nɨto' Kʉrai yau (4:1—6:20)
Iu'matʉ (6:21-24)
1
1 Paarʉ, Kʉrai Sises nennoko'pʉ itekare ekamai' Papa eseru winɨ, winɨpaino,
Wakʉ ton E'pe'sas pon kon enakan, tʉusaurokʉ'pʉ awɨron kon Kʉrai Sises yau:
2 Wakʉ nʉnonkasa' mɨrɨ awonsi'kɨ tʉusewankamai' pʉra e'nɨto' nesii ɨyenakan kon pe Papa, ukʉipʉnʉ kon mɨrɨ awonsi'kɨ Itepuru Sises Kʉrai winon.
Iya'kwarʉ Pe Pʉreman Nɨto' Kʉrai Yau
3 Apurɨpɨ'to' nesii Papa mɨrɨ awonsi'kɨ uyepuru kon Sises Kʉrai kʉipʉnʉ iwano' pe, wakʉ pe upʉremanin nʉ'pʉ kon tanporon nɨ iya'kwarʉ pe pʉreman nɨto' Epʉn po e'nɨ pata yau Kʉrai yau.
4 Apʉne pʉra uyanʉnsa' iya 'nokon pɨ' pata ekoneka rawɨrɨ wakʉ pe te'san pe mɨrɨ awonsi'kɨ ɨri pe pʉra tenu yau. Tʉusi'nʉnkato' yau
5 tʉmunkɨ pe e'nɨto' yau ku'nɨ'pʉ iya pena Sises Kʉrai poro, pori' pe te'to' mɨrɨ awonsi'kɨ teseru awɨrɨ.
6 Ikuu'pʉ iya tapurɨpɨ'to' pe, wakʉ nonkasa' tʉuya pɨ', i'nʉmʉra rɨ Tʉmu tʉni'nʉnkanʉ yau.
7 Iyau e'man nɨto' esi imʉnʉ poro, makoi pɨ' usentu'man nɨto', Papa uya wakʉ nonkasa' na'ne' awɨrɨ eke pe kuru rɨ
8 upona'nokon itʉsa' iya eke pe kuru rɨ tanporo tʉpu'ketʉ mɨrɨ awonsi'kɨ ito'ka'nʉ'to' pokon pe.
9 Mɨrɨ awonsi'kɨ ama'ai tʉnkupʉnʉ teseru pori' pe te'to' awɨrɨ koneka'pʉ iya i'tuto' kon pe, te'kuu'pʉ rʉ'pʉ Kʉrai yau.
10 Serɨ ekonekan nɨsa' e'ku'to' pe ita'ku'tɨto' weyu ton e'seposa' a'tai—tanporon nɨ Epʉn pon mɨrɨ awonsi'kɨ non pon amʉranʉ'nin pe tikin nɨ itesa', kʉrɨ rɨ kʉrɨ rɨ Kʉrai.
11 Kʉrɨ rɨ yau rɨ nɨrɨ utanʉn nɨ'pʉ'nokon pena, inkuu'pʉ iye'ku'to' pe awɨrɨ rɨ tanporon nɨ tʉrawasomanin mɨrɨ kasa iye'to' pe tawon teseru awɨrɨ,
12 ina, wapiya Kʉrai yau te'ku'to' ke iye'sa' kon, e'to' pe eke pe iku'to' apurɨpɨ'to' ku'nin pe.
13 Mɨrɨ awonsi'kɨ ɨmɨrɨ'nokon nɨ nɨrɨ esi'pʉ Kʉrai yau i'nairon maimu etasa' auya'nokon a'tai, wakʉ ɨyepika'tɨto' kon ekareei. Apurɨsa' auya'nokon a'tai, ama'kʉi'tɨ'pʉ kon a'si'to' ike ke, usauro'nɨsa' rʉ'pʉ ipɨ' Wakʉ A'kwarʉ,
14 itʉsa' uneporonʉ kon ekamanin pe kamoro Papa iwano' pe te'san e'ma pona rɨ—eke pe tesi pɨ' tapurɨpɨ'to' pe.
Tenki Tapɨtʉ Mɨrɨ Awonsi'kɨ Ɨpʉreman
15 Serɨ wenai, Itepuru Sises apurɨto' auya'nokon eta'pʉ uya si'kɨrɨ mɨrɨ awonsi'kɨ wakʉ ton i'nʉnkato' auya'nokon,
16 ereutasa' pʉra rɨ iyesi ɨpɨ'nokon tenki tapɨtʉ pɨ' mɨrɨ awonsi'kɨ ɨpona'nokon ɨpʉremato' rɨ esi uyenu yau.
17 Urɨ'nokon epuru Sises Kʉrai e'to' itese' pɨ' Papa, meruntɨ pe te'sen Ikʉipʉnʉ, ekama'po pɨ' rɨ esi ɨrepato' kon pe iya pu'ketʉ mɨrɨ awonsi'kɨ enpoikanin A'kwarʉ ke, wakʉ pe parɨ i'tunin pe ɨwesi kon pa.
18 Ɨpʉrema rɨ nɨrɨ ɨyewan kon yau ɨyenu kon uta'kwakato' pe ɨkɨ'mato' iya 'nokon ipona ɨye'ku'to' kon i'tunin pe ɨwesi kon pa, eke pe kuru rɨ meruntɨ pe ɨneporonʉ kon esi wakʉ pe te'san yau,
19 mɨrɨ awonsi'kɨ mɨrɨ kaisaron ta pokena' pen nɨ urɨ'nokon apurɨnin nan iwano' pe intʉrʉnʉ eke kuru rɨ ipana'pano. Mɨrɨ ipana'pano esi eke imeruntɨrʉ e'tʉrawasoma pe rɨ,
20 inapurɨ'pʉ Kʉrai yau i'mʉ'sa'ka'pʉ iya a'tai iyerikʉ'pʉ apai, mɨrɨpan aponontɨ tʉuya a'tai temiyatʉ enwo'netʉ winɨ Epʉn po e'nɨ pata yau;
21 ɨnnɨ rɨ tanporon nɨ esa' wannɨ pe te'sen mɨrɨ awonsi'kɨ eke ton, pana'pano mɨrɨ awonsi'kɨ eke pata esanon, mɨrɨ awonsi'kɨ tanporon eke pe te'sen ese' ese'tɨn nɨto', serɨ a'taino rɨken pen e'tane serɨ entakan pe rɨ te'sen a'taino entaino.
22 Mɨrɨpan Papa uya tanporon nɨ tʉsa' i'ta o'koi' mɨrɨ awonsi'kɨ anʉnsa' iya tanporon nɨ i'pai pe iye'to' pe so'si iwano' pe,
23 ipun pe si te'sen, kʉrɨ rɨ pe rɨ si tanporon nɨ arʉ'tɨnin tanporon winɨ rɨ.