9
1 ܡܲܠܲܐܟ݂ܵܐ ܕܚܲܡܫܵܐ ܡܚܹܐ ܠܹܗ ܫܝܼܦܘܿܪܹܗ، ܘܚܙܹܐ ܠܝܼ ܟܵܘܟ݂ܒ݂ܵܐ ܒܸܢܦܵܠܵܐ ܡ̣ܢ ܫܡܲܝܵܐ ܥܲܠܔ ܐܲܪܥܵܐ، ܘܦܝܼܫ ܠܹܗ ܝܘܼܗܒ݂ܵܐ ܐܸܠܹܗ ܩܕܝܼܠܵܐ ܕܗܵܘܬܵܐ ܥܲܡܘܼܩܬܵܐ.
2 ܘܦܬܝܼܚ ܠܹܗ ܠܗܵܘܬܵܐ ܥܲܡܘܼܩܬܵܐ، ܘܐܣܝܼܩ ܠܹܗ ܬܸܢܵܐ ܡܸܢܘܼܗ̇ ܐܲܝܟ݂ ܬܸܢܵܐ ܕܐܲܬܘܼܢܵܐ ܓܘܼܪܵܐ، ܘܚܒܹܐ ܠܗܘܿܢ ܫܸܡܫܵܐ ܘܗܵܘܵܐ ܡ̣ܢ ܬܸܢܵܐ ܕܗܵܘܬܵܐ.
3 ܘܡ̣ܢ ܬܸܢܵܐ ܦܠܝܼܛ ܠܗܘܿܢ ܩܲܡܨܹ̈ܐ ܥܲܠܔ ܐܲܪܥܵܐ، ܘܦܝܼܫ ܠܹܗ ܝܘܼܗܒ݂ܵܐ ܐܸܠܵܝܗܝ ܫܘܼܠܛܵܢܵܐ، ܐܲܝܟ݂ ܗ̇ܘ ܫܘܼܠܛܵܢܵܐ ܕܐܝܼܬ ܠܗܘܿܢ ܥܵܩܸܪ̈ܒܹܐ ܕܐܲܪܥܵܐ.
4 ܦܝܼܫ ܠܹܗ ܐܡܝܼܪܵܐ ܐܸܠܵܝܗܝ ܕܠܵܐ ܚܲܙܕܸܓܝܼ ܠܓܸܠܵܐ ܕܐܲܪܥܵܐ، ܘܠܵܐ ܠܗܸܟ̃ ܩܝܼܢܘܼܬܵܐ، ܘܐܘܼܦ ܠܵܐ ܠܗܸܟ̃ ܐܝܼܠܵܢܵܐ، ܐܸܠܵܐ ܐܲܚܟ̰ܝܼ ܠܐܵܢܝܼ ܕܡ̣ܢ ܒܢܲܝ̈ܢܵܫܵܐ ܕܠܲܝܬ ܠܗܘܿܢ ܚܵܬܡܵܐ ܕܐܲܠܵܗܵܐ ܥܲܠܔ ܩܸܨܵܝܗܝ.
5 ܦܝܼܫ ܠܗܘܿܢ ܣܘܼܦܝܹܐ ܕܠܵܐ ܩܵܛܠܝܼ ܐܸܠܵܝܗܝ، ܐܸܠܵܐ ܕܓ̰ܲܢܓ̰ܸܪܝܼ ܠܗܘܿܢ ܩܵܐ ܚܲܡܫܵܐ ܝܲܪ̈ܚܹܐ. ܘܓ̰ܘܼܢܓ̰ܵܪܵܝܗܝ ܐܲܝܟ݂ ܓ̰ܘܼܢܓ̰ܵܪܵܐ ܕܢܝܵܨܬܵܐ ܕܥܵܩܸܪܒ݂ܵܐ ܝܗܘܵܐ ܐܝܼܡܲܢ ܕܢܵܝܨܵܐ ܠܐܢܵܫܵܐ.
6 ܒܐܵܢܝܼ ܝܵܘܡܵܢܹ̈ܐ ܐܢܵܫܹ̈ܐ ܒܸܬ ܛܵܥܝܼ ܒܵܬܪ ܡܵܘܬܵܐ ܘܠܹܐ ܡܲܫ݇ܟ̰ܚܝܼ ܠܹܗ. ܒܸܬ ܫܲܗܘܸܬܝܼ ܠܸܡܝܵܬܵܐ ܐܝܼܢܵܐ ܡܵܘܬܵܐ ܒܸܬ ܥܵܪܹܩ ܡܸܢܵܝܗܝ.
7 ܐܵܢܝܼ ܩܲܡܨܹ̈ܐ ܒܸܕܡܵܝܵܐ ܝܗܘܵܘ ܠܣܘܼܣܵܘܵܬܹ̈ܐ ܗܘܼܕܪܹܐ ܠܦܠܵܫܵܐ. ܥܲܠܔ ܪܹ̈ܝܫܵܢܵܝܗܝ ܐܝܼܬ ܗܘܵܘ ܠܗܘܿܢ ܐܲܝܟ݂ ܟܠܝܼܠܹ̈ܐ ܒܕܡܘܼܬܵܐ ܕܕܲܗܒ݂ܵܐ، ܘܦܵܬܘܵܬܵܝ̈ܗܝ ܐܲܝܟ݂ ܦܵܬܘܵܬܹ̈ܐ ܕܒܢܲܝ̈ܢܵܫܵܐ،
8 ܟܵܘܣܵܝܗܝ ܐܲܝܟ݂ ܟܵܘܣܵܐ ܕܒܲܟ݂ܬܵܬܹ̈ܐ، ܘܟܹܟܵܝ̈ܗܝ ܐܲܝܟ݂ ܟܹܟܹ̈ܐ ܕܐܲܪ̈ܝܹܐ.
9 ܘܐܝܼܬ ܗܘܵܘ ܠܗܘܿܢ ܫܸܪܝܵܢܵܐ ܐܲܝܟ݂ ܫܸܪܝܵܢܵܐ ܕܦܪܸܙܠܵܐ ܥܲܠܔ ܨܲܕܪܵܝܗܝ ܘܩܵܠܵܐ ܕܓܘܼܠܦܵܢܵܝ̈ܗܝ ܐܲܝܟ݂ ܩܵܠܵܐ ܕܡܲܪ̈ܟܒ݂ܵܬܹܐ، ܕܣܘܼܣܵܘܵܬܹ̈ܐ ܪܵܒܵܐ ܒܸܪܚܵܛܵܐ ܠܦܠܵܫܵܐ.
10 ܐܝܼܬ ܗܘܵܘ ܠܗܘܿܢ ܕܘܼܢܒܹ̈ܐ ܒܸܕܡܵܝܵܐ ܠܢܸܟܣܹ̈ܐ ܕܥܵܩܸܪ̈ܒܹܐ، ܘܓܵܘ ܕܘܼܢܒܵܝ̈ܗܝ ܐܝܼܬ ܗܘܵܘ ܠܗܘܿܢ ܚܲܝܠܵܐ ܠܚܲܙܕܘܼܓܹܐ ܠܒܢܲܝ̈ܢܵܫܵܐ ܩܵܐ ܚܲܡܫܵܐ ܝܲܪ̈ܚܹܐ.
11 ܐܝܼܬ ܗܘܵܐ ܥܲܠܵܝܗܝ ܡܲܠܟܵܐ، ܡܲܠܲܐܟ݂ܵܐ ܕܗܵܘܬܵܐ، ܗ̇ܘ ܕܫܸܡܹܗ ܒܠܸܫܵܢܵܐ ܥܸܒ݂ܪܵܝܵܐ ܟܹܐ ܦܵܐܹܫ ܩܸܪܝܵܐ ܐܲܒܲܕܘܿܢ، ܐܝܼܢܵܐ ܒܠܸܫܵܢܵܐ ܝܵܘܢܵܝܵܐ ܟܹܐ ܦܵܐܹܫ ܩܸܪܝܵܐ ܐܵܦܘܿܠܘܿܢ.
12 ܘܵܝ ܩܲܕܡܵܝܵܐ ܐܙܝܼܠܔ ܠܹܗ، ܘܗܸܫ ܬܪܹܝ ܐܚܹܪ̈ܢܹܐ ܒܹܐܬܵܝܵܐ ܝܢܵܐ.
13 ܡܲܠܲܐܟ݂ܵܐ ܕܫܬܵܐ ܡܚܹܐ ܠܹܗ ܫܝܼܦܘܿܪܹܗ، ܘܫܡܝܼܥ ܠܝܼ ܚܲܕ ܩܵܠܵܐ ܡ̣ܢ ܩܲܪ̈݇ܢܵܢܹܐ ܕܡܲܕܒܚܵܐ ܕܕܲܗܒ݂ܵܐ ܕܩܲܕܡ ܐܲܠܵܗܵܐ،
14 ܒܹܐܡܵܪܵܐ ܠܡܲܠܲܐܟ݂ܵܐ ܕܫܬܵܐ ܕܐܝܼܬ ܗܘܵܐ ܠܹܗ ܫܝܼܦܘܿܪܵܐ: ”ܫܪܹܐ ܠܗܘܿܢ ܐܲܪܒܥܵܐ ܡܲܠܲܐܟܹ̈ܐ ܕܝܼܢܵܐ ܐܣܝܼܪܹ̈ܐ ܥܲܠܔ ܢܲܗܪܵܐ ܓܘܼܪܵܐ ܕܦܪܵܬ.“
15 ܘܦܝܼܫ ܠܗܘܿܢ ܫܸܪܝܹܐ ܐܵܢܝܼ ܐܲܪܒܥܵܐ ܡܲܠܲܐܟܹ̈ܐ ܕܝܼܗܘܵܘ ܗܘܼܕܪܹܐ ܠܐܵܗܵܐ ܣܵܥܲܬ ܘܠܝܵܘܡܵܐ ܘܠܝܲܪܚܵܐ ܘܠܫܹܢ݇ܬܵܐ، ܕܩܵܛܠܝܼ ܚܲܕ ܬܠܝܼܬܵܝܵܐ ܕܒܢܲܝ̈ܢܵܫܵܐ.
16 ܘܡܸܢܝܵܢܵܐ ܕܚܲܝܠܵܘܵܬܹ̈ܐ ܕܪ̈ܲܟܵܒܹܐ ܬܲܪܬܹܝ ܪܸ̈ܒܘܼ ܪܸ̈ܒܘܵܬܹܐ ܝܗܘܵܐ. ܫܡܝܼܥ ܠܝܼ ܡܸܢܝܵܢܵܐ ܕܝܼܵܝܗܝ.
17 ܣܘܼܣܵܘܵܬܹ̈ܐ ܘܪ̈ܲܟܵܒ݂ܵܝܗܝ ܕܚܸܙܝܵܝ ܠܝܼ ܓܵܘ ܚܸܙܘܝܼ ܗܵܕܟ݂ܵܐ ܝܗܘܵܘ: ܪܲܢܓܵܐ ܕܫܸܪ̈ܝܵܢܵܝܗܝ ܝܼܗܘܵܐ ܢܘܼܪܵܢܵܝܵܐ ܘܝܵܩܘܼܢܕܵܝܵܐ ܘܟܸܒܪܝܼܬܵܝܵܐ؛ ܘܪܹ̈ܝܫܹܐ ܕܣܘܼܣܵܘܵܬܹ̈ܐ ܐܲܝܟ݂ ܪܹ̈ܝܫܹܐ ܕܐܲܪ̈ܝܹܐ، ܘܡ̣ܢ ܦܘܼܡܵܝܗܝ ܒܸܦܠܵܛܵܐ ܝܗܘܵܘ ܢܘܼܪܵܐ ܘܬܸܢܵܐ ܘܟܸܒܪܝܼܬ.
18 ܚܲܕ ܬܠܝܼܬܵܝܵܐ ܕܒܢܲܝ̈ܢܵܫܵܐ ܦܝܼܫ ܠܹܗ ܩܛܝܼܠܵܐ ܒܐܲܢܹܐ ܬܠܵܬ ܡܲܚܘܵܬܹ̈ܐ ܕܢܘܼܪܵܐ ܘܕܬܸܢܵܐ ܘܕܟܸܒܪܝܼܬ، ܕܒܸܦܠܵܛܵܐ ܝܗܘܵܘ ܡ̣ܢ ܦܘܼܡܵܝܗܝ.
19 ܣܵܒܵܒ ܚܲܝܠܵܐ ܕܣܘܼܣܵܘܵܬܹ̈ܐ ܓܵܘ ܦܘܼܡܵܝܗܝ ܝܗܘܵܐ ܘܓܵܘ ܕܘܼܢܒܵܝ̈ܗܝ، ܣܵܒܵܒ ܕܘܼܢܒܵܝ̈ܗܝ ܐܲܝܟ݂ ܚܘܼܵܘܵܬܹ̈ܐ ܝܗܘܵܘ ܕܐܝܼܬ ܠܗܘܿܢ ܪܹ̈ܝܫܵܢܹܐ ܕܥܵܒ݂ܕܝܼ ܚܘܼܙܕܵܓܵܐ ܒܝܼܵܝܗܝ.
20 ܣܵܗܡܵܐ ܦܝܼܫܵܐ ܕܐܢܵܫܹ̈ܐ ܕܠܵܐ ܦܝܼܫ ܠܗܘܿܢ ܩܛܝܼܠܹܐ ܒܐܲܢܹܐ ܡܲܚܘܵܬܹ̈ܐ ܠܵܐ ܬܘܼܘܸܒ ܠܗܘܿܢ ܡ̣ܢ ܦܘܼܠܚܵܢܵܐ ܕܐܝܼܕܵܬܵܝ̈ܗܝ، ܗܵܕܟ݂ܵܐ ܕܠܵܐ ܣܵܓ݂ܕܝܼ ܗܘܵܘ ܠܫܹܐܕܹ̈ܐ ܘܠܨܵܢܲܡܹ̈ܐ ܕܕܲܗܒ݂ܵܐ ܘܕܣܹܐܡܵܐ ܘܕܢܚܵܫܵܐ ܘܕܟܹܐܦܵܐ ܘܕܩܲܝܣܵܐ، ܐܲܝܢܝܼ ܕܠܹܐ ܡܵܨܝܼ ܚܵܙܝܼ ܘܠܵܐ ܫܵܡܥܝܼ ܘܠܵܐ ܚܵܕܪܝܼ.
21 ܘܠܵܐ ܬܘܼܘܸܒ ܠܗܘܿܢ ܡ̣ܢ ܩܸܛܠܵܝ̈ܗܝ، ܘܠܵܐ ܡ̣ܢ ܚܸܪ̈ܫܵܝܗܝ، ܘܠܵܐ ܡ̣ܢ ܙܵܢܝܘܼܬܵܝܗܝ، ܘܠܵܐ ܡ̣ܢ ܓܹܢܵܒ݂ܘܼܝܵܬܵܝ̈ܗܝ.