2
ܡܫܝܚܐ ܡܨܥܝܢ
1 ܒܢܘܿܢܝܼ̈، ܒܸܟܬܵܒ݂ܵܐ ܝܘܸܢ ܐܲܢܹܐ ܐܸܠܵܘܟ݂ܘܿܢ ܕܠܵܐ ܚܵܛܹܝܬܘܿܢ، ܐܝܼܢܵܐ ܐܸܢ ܐܢܵܫܵܐ ܚܵܛܹܐ، ܐܝܼܬ ܠܲܢ ܡܸܨܥܵܝܵܐ ܠܟܸܣ ܒܵܒܵܐ، ܝܼܫܘܿܥ ܡܫܝܼܚܵܐ ܙܲܕܝܼܩܵܐ.
2 ܘܗ̇ܘ ܝܼܠܹܗ ܚܘܼܣܵܝܵܐ ܡ̣ܢ ܓܹܒܵܐ ܕܚܛܝܼܵܬܲܢ̈، ܠܵܐ ܐܲܚܟ̰ܝܼ ܒܘܼܬ ܚܛܝܼܵܬܹ̈ܐ ܕܝܼܲܢ، ܐܝܼܢܵܐ ܐܘܼܦ ܒܘܼܬ ܚܛܝܼܵܬܹ̈ܐ ܕܟܠܹܗ ܥܵܠܡܵܐ.
3 ܒܐܵܗܵܐ ܦܲܪܡܘܼܝܹܐ ܝܘܲܚ ܕܟܹܐ ܝܵܕܥܲܚ ܠܹܗ، ܐܸܢ ܢܵܛܪܲܚ ܦܘܼܩܕܵܢܘܼ̈ܗܝ.
4 ܗ̇ܘ ܕܐܵܡܹܪ: ”ܟܹܐ ܝܵܕܥܹܢܹܗ،“ ܐܝܼܢܵܐ ܠܵܐ ܢܵܛܹܪ ܦܘܼܩܕܵܢܘܼ̈ܗܝ، ܕܲܓܵܠܵܐ ܝܠܹܗ ܘܫܪܵܪܵܐ ܠܲܝܬ ܒܝܼܹܗ.
5 ܐܝܼܢܵܐ ܗ̇ܘ ܕܢܵܛܹܪ ܗܹܡܸܙܡܵܢܹܗ، ܫܲܪܝܼܪܵܐܝܼܬ ܚܘܼܒܵܐ ܕܐܲܠܵܗܵܐ ܦܝܼܫܵܐ ܝܠܹܗ ܡܘܼܟܡܸܠܵܐ ܒܝܼܹܗ. ܒܐܵܗܵܐ ܟܹܐ ܝܵܕܥܲܚ ܕܒܝܼܹܗ ܝܘܲܚ.
6 ܗ̇ܘ ܕܐܵܡܹܪ ܥܲܪܩܘܼܠܹܐ ܝܠܹܗ ܒܝܼܹܗ، ܘܵܠܹܐ ܝܠܵܗ̇ ܕܚܵܕܹܪ ܕܵܐܟ݂ܝܼ ܕܡܫܝܼܚܵܐ ܚܕܝܼܪܹܗ.
ܦܘܩܕܢܐ ܚܕܬܐ
7 ܡܘܼܚܸܒܝܼ̈، ܠܹܐ ܝܘܸܢ ܒܸܟܬܵܒ݂ܵܐ ܐܸܠܵܘܟ݂ܘܿܢ ܦܘܼܩܕܵܢܵܐ ܚܵܕܬܵܐ، ܐܸܠܵܐ ܦܘܼܩܕܵܢܵܐ ܥܲܬܝܼܩܵܐ ܕܐܝܼܬ ܗܘܵܐ ܠܵܘܟ݂ܘܿܢ ܡ̣ܢ ܫܘܼܪܵܝܵܐ. ܐܵܗܵܐ ܦܘܼܩܕܵܢܵܐ ܥܲܬܝܼܩܵܐ ܝܼܠܹܗ ܗ̇ܝ ܗܹܡܸܙܡܵܢ ܕܫܡܝܼܥܵܐ ܠܵܘܟ݂ܘܿܢ.
8 ܡ̣ܢ ܗ̇ܘ ܓܹܒܵܐ ܐܚܹܪܢܵܐ، ܦܘܼܩܕܵܢܵܐ ܚܵܕܬܵܐ ܒܸܟܬܵܒ݂ܵܐ ܝܘܸܢ ܐܸܠܵܘܟ݂ܘܿܢ، ܗ̇ܘ ܕܫܲܪܝܼܪܵܐ ܝܠܹܗ ܒܝܼܹܗ ܘܒܝܼܵܘܟ݂ܘܿܢ، ܣܵܒܵܒ ܥܒ݂ܝܼܪܹܗ ܚܸܫܟܵܐ، ܘܐܵܕܝܼܵܐ ܒܸܙܪܵܩܵܐ ܝܠܹܗ ܒܲܗܪܵܐ ܫܲܪܝܼܪܵܐ.
9 ܡ̇ܢ ܕܐܵܡܹܪ ܓܵܘ ܒܲܗܪܵܐ ܝܠܹܗ، ܐܝܼܢܵܐ ܣܵܢܹܐ ܠܐܲܚܘܿܢܘܼܗܝ، ܗܸܫ ܒܚܸܫܟܵܐ ܝܠܹܗ.
10 ܡ̇ܢ ܕܡܲܚܸܒ ܠܐܲܚܘܿܢܘܼܗܝ، ܟܹܐ ܥܲܪܩܸܠܔ ܒܒܲܗܪܵܐ ܘܠܲܝܬ ܒܝܼܹܗ ܬܘܼܪܩܵܠܵܐ.
11 ܐܝܼܢܵܐ ܗ̇ܘ ܕܣܵܢܹܐ ܠܐܲܚܘܿܢܘܼܗܝ، ܓܵܘ ܚܸܫܟܵܐ ܝܠܹܗ ܘܓܵܘ ܚܸܫܟܵܐ ܟܹܐ ܚܵܕܹܪ، ܘܠܹܐ ܝܵܕܹܥ ܠܐܲܝܟܵܐ ܝܠܹܗ ܒܹܐܙܵܠܵܐ، ܣܵܒܵܒ ܚܸܫܟܵܐ ܡܘܼܣܡܝܼܵܝ ܠܹܗ ܥܲܝܢܘܼ̈ܗܝ.
12 ܒܸܟܬܵܒ݂ܵܐ ܝܘܸܢ ܐܸܠܵܘܟ݂ܘܿܢ ܒܢܘܿܢܝܼ̈، ܣܵܒܵܒ ܦܝܼܫ ܠܗܘܿܢ ܦܘܼܚܠܹܐ ܚܛܝܼܵܬܵܘ̈ܟ݂ܘܿܢ ܒܘܼܬ ܚܵܬܸܪ ܕܫܸܡܹܗ.
13 ܒܸܟܬܵܒ݂ܵܐ ܝܘܸܢ ܐܸܠܵܘܟ݂ܘܿܢ ܒܵܒܵܘܵܬܹ̈ܐ، ܣܵܒܵܒ ܝܕܝܼܥ ܠܵܘܟ݂ܘܿܢ ܠܗ̇ܘ ܕܝܼܠܹܗ ܡ̣ܢ ܫܘܼܪܵܝܵܐ. ܒܸܟܬܵܒ݂ܵܐ ܝܘܸܢ ܐܸܠܵܘܟ݂ܘܿܢ ܥܠܲܝܡܹ̈ܐ، ܣܵܒܵܒ ܓ݂ܠܝܼܒ ܠܵܘܟ݂ܘܿܢ ܠܒܝܼܫܵܐ. ܒܸܟܬܵܒ݂ܵܐ ܝܘܸܢ ܐܸܠܵܘܟ݂ܘܿܢ ܝܵܠܹ̈ܕ݇ܐ، ܣܵܒܵܒ ܝܕܝܼܥ ܠܵܘܟ݂ܘܿܢ ܠܒܵܒܵܐ.
14 ܟܬܝܼܒ݂ ܠܝܼ ܐܸܠܵܘܟ݂ܘܿܢ ܒܵܒܵܘܵܬܹ̈ܐ، ܣܵܒܵܒ ܝܕܝܼܥ ܠܵܘܟ݂ܘܿܢ ܠܗ̇ܘ ܕܝܼܠܹܗ ܡ̣ܢ ܫܘܼܪܵܝܵܐ. ܟܬܝܼܒ݂ ܠܝܼ ܐܸܠܵܘܟ݂ܘܿܢ ܥܠܲܝܡܹ̈ܐ، ܣܵܒܵܒ ܚܲܝܠܵܢܹ̈ܐ ܝܬܘܿܢ ܘܗܹܡܸܙܡܵܢ ܕܐܲܠܵܗܵܐ ܥܲܪܩܘܼܠܹܐ ܝܠܵܗ̇ ܒܝܼܵܘܟ݂ܘܿܢ، ܘܓ݂ܠܝܼܒ ܠܵܘܟ݂ܘܿܢ ܠܒܝܼܫܵܐ.
15 ܠܵܐ ܡܲܚܸܒܝܼܬܘܿܢ ܠܕܘܼܢܝܹܐ ܘܠܵܐ ܠܡܸܢܕܝܼ ܕܓܵܘ ܕܘܼܢܝܹܐ. ܐܸܢ ܚܲܕ ܡܲܚܸܒ ܠܕܘܼܢܝܹܐ، ܚܘܼܒܵܐ ܕܒܵܒܵܐ ܠܲܝܬ ܒܝܼܹܗ.
16 ܣܵܒܵܒ ܟܠܔ ܡܸܢܕܝܼ ܕܐܝܼܬ ܒܕܘܼܢܝܹܐ، ܫܲܗܘܲܬܬܵܐ ܕܦܲܓ݂ܪܵܐ، ܘܫܲܗܘܲܬܬܵܐ ܕܥܲܝ̈ܢܹܐ، ܘܫܘܼܒ݂ܗܵܪܵܐ ܣܦܝܼܩܵܐ ܕܚܲܝܹ̈ܐ، ܠܹܐ ܝܠܹܗ ܡ̣ܢ ܒܵܒܵܐ ܐܸܠܵܐ ܡ̣ܢ ܕܘܼܢܝܹܐ ܝܠܹܗ.
17 ܕܘܼܢܝܹܐ ܘܫܲܗܘܲܬܝܵܬܘܼ̈ܗ̇ ܒܸܥܒ݂ܵܪܵܐ ܝܢܵܐ، ܐܝܼܢܵܐ ܗ̇ܘ ܕܥܵܒܹܕ ܨܸܒ݂ܝܵܢܵܐ ܕܐܲܠܵܗܵܐ ܟܹܐ ܦܵܐܹܫ ܠܥܵܠܲܡ.
ܕܠܩܘܒ݂ܠܝ̈ܐ ܕܡܫܝܚܐ
18 ܝܵܠܹ̈ܕ݇ܐ، ܣܵܥܲܬ ܐܚܵܪܵܝܬܵܐ ܝܠܵܗ̇، ܘܕܵܐܟ݂ܝܼ ܕܫܡܝܼܥܹܐ ܝܬܘܿܢ، ܡܫܝܼܚܵܐ ܕܲܓܵܠܵܐ ܒܹܐܬܵܝܵܐ ܝܠܹܗ، ܘܐܘܼܦ ܐܵܕܝܼܵܐ ܪܵܒܵܐ ܡܫܝܼܚܹ̈ܐ ܕܲܓܵܠܹ̈ܐ ܩܝܼܡܹܐ ܝܢܵܐ. ܒܘܼܬ ܐܵܗܵܐ ܟܹܐ ܝܵܕܥܲܚ ܕܣܵܥܲܬ ܐܚܵܪܵܝܬܵܐ ܝܠܵܗ̇.
19 ܡ̣ܢ ܠܟܸܣܠܲܢ ܦܠܝܼܛ ܠܗܘܿܢ، ܐܝܼܢܵܐ ܠܹܐ ܝܗܘܵܘ ܡܸܢܲܢ، ܣܵܒܵܒ ܐܸܢ ܗܵܘܝܼ ܗܘܵܘ ܡܸܢܲܢ، ܒܸܬ ܦܵܝܫܝܼ ܗܘܵܘ ܥܲܡܲܢ. ܐܝܼܢܵܐ ܦܠܝܼܛ ܠܗܘܿܢ ܡ̣ܢ ܠܟܸܣܠܲܢ ܕܦܵܝܫܵܐ ܝܕܝܼܥܬܵܐ ܕܠܹܐ ܝܗܘܵܘ ܡܸܢܲܢ.
20 ܐܝܼܢܵܐ ܐܲܚܬܘܿܢ ܦܝܼܫܹܐ ܝܬܘܿܢ ܡܫܝܼܚܹܐ ܒܝܲܕ ܩܲܕܝܼܫܵܐ، ܘܟܹܐ ܝܵܕܥܝܼܬܘܿܢ ܟܠܔ ܡܸܢܕܝܼ.
21 ܠܹܐ ܝܘܸܢ ܒܸܟܬܵܒ݂ܵܐ ܐܸܠܵܘܟ݂ܘܿܢ ܣܵܒܵܒ ܠܹܐ ܝܵܕܥܝܼܬܘܿܢ ܫܪܵܪܵܐ، ܐܝܼܢܵܐ ܣܵܒܵܒ ܟܹܐ ܝܵܕܥܝܼܬܘܿܢ ܠܹܗ، ܘܗܸܟ̃ ܕܘܼܓܠܵܐ ܠܹܐ ܐܵܬܹܐ ܡ̣ܢ ܫܪܵܪܵܐ.
22 ܡܵܢܝܼ ܝܠܹܗ ܕܲܓܵܠܵܐ ܫܒ݂ܘܿܩ ܡ̣ܢ ܗ̇ܘ ܕܣܵܪܹܒ݂ ܕܝܼܫܘܿܥ ܝܼܠܹܗ ܡܫܝܼܚܵܐ؟ ܐܵܗܵܐ ܝܠܹܗ ܕܲܠܩܘܼܒ݂ܠܵܝܵܐ ܕܡܫܝܼܚܵܐ، ܗ̇ܘ ܕܣܵܪܹܒ݂ ܠܒܵܒܵܐ ܘܠܒܪܘܿܢܵܐ.
23 ܟܠܔ ܡ̇ܢ ܕܣܵܪܹܒ݂ ܠܒܪܘܿܢܵܐ، ܠܲܝܬ ܐܸܠܹܗ ܐܘܼܦ ܒܵܒܵܐ؛ ܘܟܠܔ ܡ̇ܢ ܕܡܵܘܕܹܐ ܒܒܪܘܿܢܵܐ، ܐܝܼܬ ܐܸܠܹܗ ܐܘܼܦ ܒܵܒܵܐ.
24 ܡܸܢܕܝܼ ܕܫܡܝܼܥ ܠܵܘܟ݂ܘܿܢ ܐܲܚܬܘܿܢ ܡ̣ܢ ܫܘܼܪܵܝܵܐ، ܫܒ݂ܘܿܩܘܼܢ ܥܲܪܩܸܠܔ ܓܵܘܵܘܟ݂ܘܿܢ. ܐܸܢ ܥܲܪܩܸܠܔ ܓܵܘܵܘܟ݂ܘܿܢ ܡܸܢܕܝܼ ܕܫܡܝܼܥ ܠܵܘܟ݂ܘܿܢ ܡ̣ܢ ܫܘܼܪܵܝܵܐ، ܐܘܼܦ ܐܲܚܬܘܿܢ ܒܸܬ ܥܲܪܩܸܠܝܼܬܘܿܢ ܒܒܵܒܵܐ ܘܒܒܪܘܿܢܵܐ.
25 ܘܐܵܗܵܐ ܝܠܹܗ ܩܵܘܠܵܐ ܕܩܘܼܘܸܠܔ ܠܹܗ ܐܸܠܲܢ، ܚܲܝܹ̈ܐ ܥܵܠܡܝܼܢܵܝܹ̈ܐ.
26 ܒܸܟܬܵܒ݂ܵܐ ܝܘܸܢ ܐܲܢܹܐ ܐܸܠܵܘܟ݂ܘܿܢ ܒܘܼܬ ܐܵܢܝܼ ܕܡܲܚܠܘܼܛܵܘܟ݂ܘܿܢ ܝܼܢܵܐ.
27 ܐܝܼܢܵܐ ܐܲܚܬܘܿܢ، ܡܫܵܚܬܵܐ ܕܩܘܼܒܸܠܔ ܠܵܘܟ݂ܘܿܢ ܡܸܢܹܗ ܥܲܪܩܘܼܠܹܐ ܝܠܵܗ̇ ܒܝܼܵܘܟ݂ܘܿܢ، ܘܠܹܐ ܝܬܘܿܢ ܣܢܝܼܩܹܐ ܠܐܘܼܦ ܚܲܕ ܕܡܲܠܸܦ ܠܵܘܟ݂ܘܿܢ. ܐܸܠܵܐ ܐܲܝܟ݂ ܕܡܫܵܚܬܹܗ ܡܲܠܘܼܦܵܘܟ݂ܘܿܢ ܝܼܠܵܗ̇ ܒܘܼܬ ܟܠܔ ܡܸܢܕܝܼ، ܘܫܪܵܪܵܐ ܝܠܵܗ̇ ܘܠܵܐ ܕܘܼܓܠܵܐ، ܘܕܵܐܟ݂ܝܼ ܕܡܘܼܠܸܦܬܵܘܟ݂ܘܿܢ ܝܼܠܵܗ̇، ܥܲܪܩܸܠܘܼܢ ܒܝܼܹܗ.
ܒܢܘܢ̈ܐ ܕܐܠܗܐ
28 ܘܐܵܕܝܼܵܐ ܒܢܘܿܢܝܼ̈، ܥܲܪܩܸܠܘܼܢ ܒܡܫܝܼܚܵܐ، ܗܵܕܟ݂ܵܐ ܕܐܝܼܡܲܢ ܕܦܵܐܹܫ ܓܸܠܝܵܐ ܗܵܘܹܐ ܠܲܢ ܓ̰ܘܼܪܐܲܬ ܘܠܵܐ ܢܵܟ݂ܦܲܚ ܡܸܢܹܗ ܐܝܼܡܲܢ ܕܐܵܬܹܐ.
29 ܐܸܢ ܝܵܕܥܝܼܬܘܿܢ ܕܙܲܕܝܼܩܵܐ ܝܠܹܗ، ܐܘܼܦ ܝܵܕܥܝܼܬܘܿܢ ܟܠܔ ܡ̇ܢ ܕܥܵܒܹܕ ܙܲܕܝܼܩܘܼܬܵܐ ܦܝܼܫܵܐ ܝܠܹܗ ܝܠܝܼܕܵܐ ܡܸܢܹܗ.