22
Yi bitz yi bnixe'n tan Luwiy tan tyoẍine'n tetz Ryos
(Sal 18)
1 Yi jun bitze'j ya'stzun xcon tan Luwiy tan tak'le'n yi k'ajsbil tetz Kataj, nin tan tyoẍine'n tetz yi claxe'n i' tk'ab Saúl nin ẍchik'ab yi e' mas contr.
2 Je yol i'e'j:
“Kataj Ryos, ilu' colol wetz,
na nicy'cu'n ilu' chi jun ama'l wutz c'ub kale na incol wib ẍchik'ab incontr.
Cho'n k'uklij inc'u'l te'ju',
na ilu' colpinl wetz.
3 Na ilu' yi wutz kotx' kale na incolwit wib ẍchik'ab e' incontr.
Nin cho'n cu'n tane'nu' chi jun makbil flech.
Na tan tu' yi teru' poreru', ja chinclax.
Ni'cu'n ilu' chi jun wutz c'ub yi nim wutz tkan, kale na incolwit wib.
Na ilu' colol wetz tk'ab e'chk biyo'n.
4 Na wak' ink'ajsbil teru' Ta', na at wi'nin k'eju'.
Nin yi na injak ẍch'eybil wetz teru', na ocu' tan incolche'n ẍchik'ab yi e' incontr.
5 Na sotz inc'u'l tan quimichil yi atin cu'n.
Na chi ik yi pak'bil mar nsaj swibaj.
Nin ja chinxob tan yi ẍchamil yi tojkbil a'.
Na nsken chintx'amxij tak'un.
6 Quimichtlen tu' atine't.
Txant nin nopon ẍchixo'l alma'.
7 Mme'l tzun intzi' tan jakle'n ẍch'eybil wetz teru' Ta'.
Nin ja opon yi to'kl walma' kale atite'tu'.
Nin ja tbitu' intzi' inkul.
8 Saje'n tzun jun chin wutzile'n coblajnob.
Nin cyakil yi wuxtx'otx' nyucan ta'n.
Yucan cyakil wi munt tan yi ẍchi'chbe'n c'u'l Kataj.
9 Ej nin el tzaj sib le ju' tane'n.
Nin el tzaj k'ak' tu xtxak'ak' le stzi',
yi nxcye' tan stz'e'se'n cyakil e'chk takle'n.
10 Cwe'n tzun rit'ol yi wutz tcya'j, nintzun saj Kataj le cu'nak tzaj.
At jun c'oloj sbak', yi chin k'ek nin jak' tkan.
11 Cho'n tzun je'n tzaj i' tibaj jun querub.
Nintzun saj xicy'intz yi jun queruba'tz.
Saje'n tzun juẍp tul cyek'ek'.
12 Xcon yi tz'o'tz ta'n,
nin xcon yi sbak'a'tz ta'n yi at a' tul,
chi ik jun mantial tetz oyintzi'.
13 Ej nin te yi tetz pak'puchal,
el tzaj c'ub a'bal tu xtxak'ak' yi wi'nin lamcane'n.
14 Jilone'n tzun Katajtz, yi wi'tz Ryos, chi na ban k'ancyok yi wi'nin na jincan.
Na i' yi wi'tz Ajcaw tetz yi tcya'j tu yi wuxtx'otx'.
15 Nintzun saj c'oxol e'chk flech, yi xlitz' cu'n.
E' el tunin xit yi tetz contr bene'n tzi'n.
Tircu'n tzun e' contra'tz, e' lo'on ta'n.
16 Ej nin lajluchax yi tx'otx' yi at xe mar.
Ncha'tz ja lajluchax yi mbi at jak' tx'otx'.
Ya'stzun bantz yi toque'n Kataj tan cawse'n yi e' contr.
Xew tu' i' xconk ta'n tan chicawse'n.
17 Cwe'n tzaj tzun k'ab Ryos tan inje'n tzaj tul yi mar yi chin xe' nin.
18 Ja chinclax ta'n tk'ab yi wi'tz incontr, yi wi'nin ẍchamil,
nin ja chinclax ta'n ẍchik'ab yi e' yi wi'nin na chi'ch chic'u'l swe'j.
Wech na at cu'n mas cyetz chichamil tzinwutz wetz.
19 Ja cho'c tan impile'n te yi atin tul sotz c'u'lal.
Poro yi Wajcaw ja oc tan incolche'n.
20 Ja ne'l liwr ta'n.
Nin ja chin clax ta'n,
tan tu' yi na pek' i' swe'j.
21 Ya'stzun ban i' swe'j.
Xomcyen tu' te yi imbalajil.
Xomcyen tu' te yi skojal walma'.
22 Na ilenin ja chinxom te yi tetz tajbil.
Qui'c jun tir yi jak impaj yi ca'wl i'.
Qui'c jun tir yi jak ne'l xlaj yi tetz be'.
23 At cyakil yi ca'wl i' le inwi'.
Nin ilenin ja chinxom te'j.
24 Ja injoy puntil tan inxome'n te yi tetz tajbil.
Ej nin ilenin ja inmak wib tan banle'n e'chk takle'n cachi'.
25 Ya'stzun yi oy yi ja tak' i' swetz.
Xomcyen tu' te yi imbalajil.
Xomcyen tu' te yi ẍe'n wutane'n swutz i'.
26 Wajcaw, na el cunu' te yi yolu',
scyetz yi e' yi na che'l cu'n te chiyol swutzu'.
Chumbalaj nin na banu', scyetz yi e' yi ba'n na chiban.
27 At banl talma'u' squibaj yi e' yi qui na chijuch quil.
Ma scyetz yi e' yab, qui'c mu'ẍ tal banlu' scye'j.
28 Ilu' colol cyetz yi e' c'ulutxum.
Ma yi e' yi na cyocsaj quib nim tu cyajtza'kl, na el chik'ej tanu'.
29 Kataj ilu' txekunl tetz imbe'.
Na na oc yi tz'o'tz tanu' tetz tkan skil tzinwutz.
30 Tan tu' yi atu' tan wuch'eye'n, chinxcyek te jun c'oloj incontr.
Tan tu' yi atu' tan wuch'eye'n, ba'n nicy' tibaj chitapij tan chibiyle'n.
31 Chin tz'aknak cu'n cyakil yi na ban Kataj Ryos.
Ba'n k'ukek kac'u'l te yi suki'nt ta'n sketz.
Na na oc i' tan kacolche'n yi o' yi cho'n k'uklij kac'u'l te'j i'.
32 Qui'c junt Ryos at.
Ntin cu'n Kataj Jehová.
Na qui'c junt wutz c'ub at,
tan kacolol kib tibaj, chi tane'n kaRyosil.
33 Tan i' na jal inchamil.
Nin tan i' na no'c tetz tz'aknak cu'n.
34 Tan i' na chintz'itpun chi na ban masat,
yi na el ojkuj xo'lak e'chk wutz yi nim wutz tkan.
35 I' chusul wetz tan oyintzi'.
Nin i' na ak'on ẍchamil ink'ab,
tan kinle'n tzaj e'chk c'oxbil flech, yi brons cu'n.
36 Wajcaw, ilu' colol wetz.
Tan tu' banlu' sjalok wi'nin inxonl.
37 Ilu' nuc'ul tetz imbe', tan qui inje'n jiẍp.
38 Tan ilu' ja chinxcye' tan chitz'amle'n yi e' incontr,
yi chilo'one'n cyen wa'n, kalena's tzun nchimpakxij.
39 Puch'ij cunin nchisaj wa'n.
Nin ja chicyaj jak' wukan.
40 Ilu' mmak'on inwalor tan oyintzi'.
Tan ilu' nchimeje' yi e' incontr tzinwutz.
41 Tan ilu' nche'le't ojk incontr tzinwutz.
Ja chinxcye' tan chisotzaje'n yi e' yi ja chi'ch chic'u'l swe'j.
42 Ja chiẍch'in tan jakle'n ẍch'eybil cyetz,
poro cya'l jun mmo'c tan chicolche'n.
Ja chiẍch'in tetz Kataj,
poro qui mmo'c i' tan quich'eye'n.
43 Joq'uij cu'n nche' wulej,
nin ja chiben tan cyek'ek'.
Ja che'l inmasol chi na ban tz'is.
44 Ilu' nchincolon ẍchik'ab yi e' intanum,
yi ja cho'c tan contri'n swe'j.
Tan ilu' ja no'c tetz wi'tz bajxom squibaj e'chk nación.
Na ja cho'c wi'nin wunak yi qui wajske'n chiwutz, jak inca'wl.
45 Jalcu'n ja chiban tane'n yi wetz inca'wl.
E' awer nak, poro ja cyocsaj quib juy tzinwutz.
46 Ja chicotxcax yi e' awer naka'tz.
Wi'nin chilucnewe'n tan xo'w,
yi cyele'n tzaj le chitnumil tan yi chijatxol quib tink'ab.
47 Yi Kataj, yi ketz kaRyosil, itz' nin tera'tz.
Kak'e' bin k'ej i', na i' q'uicy'lom ketz nin i' colol ketz.
48 Ja ticy'saj c'u'l scye'j e' incontr.
Tan i' ja cho'c yi e'chk tnuma'tz jak' inca'wl.
49 Na tan tu' i' ja chinclax ẍchik'ab incontr.
Nin tan i' njale't ink'ej ẍchiwutz.
Ej nin tan tu' i' ja ne'l liwr ẍchik'ab yi e' biyol naka'tz.
50 Ta', tan cyakil yi mbanu' swe'j, tzintxole' yi balajilu' scyetz cyakil jilwutz wunak.
Nin swak'e' ink'ajsbil teru' Ta'.
51 Tan ilu' na tx'acone't yi rey yi je'nak xtxa'olu'.
Na ilenin xomij yi xtxaxl talma'u' swi'baj,
nin xomok scye'j e' inxonl sbne' opon tunintz,”
stzun Luwiy bantz tul yi tetz bitz.