Samuel pachisa jimaja nunú agagbau
2 Samuel
David apu wajas inamjamu
1
(1—8)
David Saúl jakamun dekaamu
1 Saúl jakamtai pujusa, David Amalec aents aidaujai maania depetuk wakitki yaakat Siclag jegauwai. Nunik nuwi jimag tsawan pujusui.
2 Nunik pujai kampatum tsawanta duwi, makichik aents Saúla suntaji wake besemag dekapeak, jáanchjin japiki ichig nugka yukukuntun buuken yukumag nugkak wajasa David pujamunum yaakat Siclag jegauwai. Nunik jegá Davitan eme anentus tikishmag tsuntsuma nijayin nugka antig pujusui.
3 Nunitai David niina iniak:
“¿Tuwiyamea miname?” tau.
Tama nii ayaak:
“Suntag Israel aents aidau batsatun filisteo aidau jeteam maaninakui tupikakmajai”, tau.
4 Tutai David iniak:
“Tujash wajukawagmae nunú wait aneasam wamak ujatkata”, tau.
Tama nii ayaak:
“Israel aents aidautin depetamkagmatai, kuashtati pisagmaji. Tuja jinuidaushkam asagmae. Untsu Saúlak niina uchiji Jonatágjai mai jakame”, tiuwai.
5 Tutai David iniak:
“¿Wajuk amesh dekame Saúl niina uchiji Jonatágjai jakaush?” tau.
6 Tama nii ayaak:
“Wika tuke aneasan niimkun muja Guilboanum wekaemajai. Nuniai suntag filisteo aidau caballonum, carronum aatus Saúlan jegantattak shimutiagmae. Nuninai Saúlak niina nagkijin achimak wajame.
7 Nunik wajau ayampa niimsatakama waituk untsugkui, aikmajai.
8 “Tusa aika ai: ‘¿Amesh yaitpa?’ tujutkui: ‘Wika Amalec aentsuitjai’, timajai.
9 Tai nii chichagtak: ‘Wait aneasam mantuata, jakatag takunush jamain dekapeatsjai’, timae.
10 “Tujutkui jeganta diikman ashí jaka tepakui, tsagaumainchau asamtai maamjai. Dutikan atsejutaijin patakumtaijijai jujukin juwi itaajai, apujuh”, tiuwai.
11 Nuna David antuk wake besemag dekapeak jáanchjin japiki ichigkui, tuja tikich aents niijai batsatushkam jáanchjin japiki ichigkajui.
12 Nunikag Saúl niina uchiji Jonatánjaí jakau asamtai, buutuinak wake besemag batsatu. Tuja nuigtushkam Tuke Pujuun suntaji Israel aents aidau jinawagbaun anentaimtusag buutuidau. Nuninak yujumka yutsuk ijagmawag batsataig etsa akaikiuwai.
13 Nuna nagkankag, David nunú aents chichama etsejak taun iniak:
“¿Amesh tuwiyampaitpa?” tau.
Tama nii ayaak:
“Wika Amalec aentsuitjai, nuniayatkun Israel aents aidaujai pujajai”, tau.
14 Tutai David senchi untsumak chichajak:
“¿Amesh wajukeakmea ishamtsukesh Tuke Pujuu apu ati tusa etegkamush Saúlash maamume?” tau.
15 Tusa tamawaik, niina aentsji aidaunmayan makichik untsuka itan, anú aents maata tusa inajui. Tusa tima mauwai.
16 Dutika mautai David chichaak:
“Tuke Pujuu apu ati tusa etegkamu maamujum etsegtuma wekaesam, jutika maam ame. Amek amina utugchatjuminig mantamname”, tiuwai.
Saúl Jonatágjai jakamtai buutuinak wake besemag batsamsagbau
17 Saúl niina uchiji Jonatágjai jakamunum David wake besemag pujus kantamauwai.
18 Nunú kantamtain ashí Judá wegantunmaya aidau jintintuatajum tusa inamjauwai. Duka papii Jasher tutainum agagbau aajakui. Duka aatus tawai:
19 “¡Israel aents aidauwah,
“Amina imanjumea nunú mujanum tsainkae!
¡Wajukaya aents wajiu
aidaush imanikash jinawaje!
20 Nunú pachisjum yaakat
Gadnum etsegkaigpajum,
tuja yaakat Ascalógnumashkam etsegkaigpajum,
nuna antukag filisteo nuwa
pegkegchaun takau aina
nunú, shiig aneenak nantsemawainum.
21 “Guilboa mujajiya nuwig,
ataktu awagkig yumik yutugchatnai,
nuigtush sajattanakesh sajatkashtinai.
Tuja nunú mujanmak aents aidauk ataktuk
jinashtin ainawai, wagki nunú mujanum
Israel aents wajiu aidaun makichkish
ayamjumamainchau ijinawaja nuadui.
Israel aents aidaun
wajiujig nunú mujanum megkaekae.
Nunú mujanum Saúla maaniaku ejamataiji
winchamtin aajakua duka bushapaje.
22 Saúla puyagjig, Jonatágka puyagjijai
shiwag dekas wajiu aidau numpen
wiyajijai maatug waketin ayi.
23 ¡Saúlak Jonatágjai mina kumpag
shiig aneetaig ainawai!
¡Ukukuin nagkaesau amaimainchau,
leónka senchijin nagkaesau ainawai!
Iwaku pujusash kanakchajua nunisag
jainakush mai jakaje.
24 “Israel nuwa aidauwah,
atumek jáanch shiig pegkeg
yamakaitkau lino apagbaun,
nuigtu nugkutai orojai najanamun
Saúl amasmatai, nugku ayujum nunú
anentaimtusjum buuttajum.
25 ¡Chah, aents kakajam aidaush wajukaya
imanikash maaniamunmash jinawaje!
¡Jonatágnashkam mujanum maawaje!
26 Jonatágkah, amek mina
yatsugjai betek ayume.
Nuadui aminí anentaimkun,
¡Shiig senchi wake besemag dekapeajai!
¡Ame minak shiig kuitamjukuitme!
¡Wi anentaimsamak,
ame mina kuitamjukuitam duka
nuwa anenken nagkaesauwai!
27 ¡Chah, aents kakajam aidaush wajukaya
imanikash maaniamunmash jinawaje!
¡Shiwag aidau, iinia suntag
maanitan yacha aidaun amukaje!”
Tusa David juna aatus kantamauwai.