96
Yamajam kantamtai ii apuji kantamjamu
1 Ashí nugkanmaya aents aidautijum
yamajam kantamtai
Tuke Pujuu kantamjuatajum.
2 Tuke Pujuu kantamjakjum,
niina daaji pegkegnum chichagtajum.
Tuja Apajuíyai uwemtikagtinuk tusajum
kashi kashinig etsegtajum.
3 Apajuí imanjiya nunú,
niina pegkegmajijai pachisjum
ashí nugka múun aidaunum etsegkatajum.
4 Wagki Tuke Pujuuwai dekas múuntak,
ima nigki eme anentsa kantamjam amainuk.
Niyai tikich apajuímtai aina
nuna nagkaesau ishamain.
5 Tikich aents aidaun apajuímtaiji aina duka
wainak ainawai;
tuja Tuke Pujuuwai nayaimpin najanauk.
6 ¡Apajuín tsaaptinjiya duka jiin utsumakui!
¡Nii pujamujiya nuwig niina senchiji,
pegkegmajiya nujai awai!
7 Ashí nugkanmaya aidautijum:
“Ameketme senchigtinum,
ameketme pegkegmamek”,
tusajum Tuke Pujuu ememattajum.
8 Tuke Pujuu anentag susatin jukijum,
nii jega nuna agájin ikaunmajum,
tikishmaja pujusjum Apajuí etsagjatajum.
9 Apajuí jee pegkegma nuwi
wayajum etsagjatajum.
¡Ashí nugkanmaya aidauk
amina ishamjamainak kujaitnume!
10 Ashí aents nugkanmaya aidau chichagkujum:
“¡Tuke Pujuuwai iina apujiya duka!
Nugkanak jasa buchittsuk asatnun nii najanauwai,
tuja ashí aents aidaunak
nii inak betek diyakui.
11 ¡Nayaim aidaush, tuja nugkashkam
shiig aneastinme!
¡Tuja nayantsashkam,
tikich namak múun aidaujai
shiig aneenak uuttinme!
12 ¡Tuja nugkashkam,
nunú nugkanum batsamin aidaujaí
shiig aneastinme!
¡Tuja numi ikam ayaushkam shiig aneenak,
13 juju nugka juwi inamjatin
mina nuna emtin pampaitnume!
¡Tuke Pujuu dekas
iina nugken inamjatatus taattawai!
Nunik taa aents aidau takasbaujin
diijus etegjattawai.”