LIBRO II
42
(Salmos 42—72)
Wi jinta niimjamua duka Apajuíyai
Coré uchiji aidau kantamawagbau
1 Japa senchi kitamak uwagtatus yumin egama numamtuk
wika Apajuíjuh, amina egajame.
2 Apajuí pujuta sukagtina nuna wainkatasan,
aents kitakai waitiak yumin egamaina
numamtuk egajai.
¿Wajutik wisha ataktush
Apajuí jee pegkegma nuwish wayatja? tusan
anentaima pujajai.
3 Nuadui tsawaish,
tuja kashish buutú pujajai,
nuniai aents aidau inintuinak:
“¿Amina Apajuígmesha?” tujutuinawai.
4 Nuwi anentaimkunuk
wake besemag dekapeajai.
Wi yaunchuk aents aidaun yajuakan
Apajuí jee pegkegma nuwi emai,
shiig aneasag Apajuín emematuinak
untsumki shimuyanum nuna anentaimjai.
¡Yajauwajah ijunja Apajuí emematbau!
5 Iman aish ¿wagkanuk wisha mijaktaja?
Wi puyatjumainuk atsawai.
Apajuí uwemtikagtina nuwig
kajintsan anentaimtatjai,
nuniakun ima niinak ememattatjai.
6 Shiig aneasa pujuschamin
wake besemag dekapeajai,
nuniakun muja Hermón
tuja muja Misar tutainum
namak Jordágka nujinchi jinagbaunum
pujusan aminí senchi anentaimjai.
7 Tuja ame najankamu aidau
mujanum wajasa antam,
namaka nujinchi chichijam
tuna detau aidau senchi uutak,
ishamain wajama imanik
wi waitiamua duka minitjawai.
8 Tujash kashi kashinig
Tuke Pujuu niina anenkega duwi minak yaintui;
nuadui wishakam
Apajuí mina pujutan suja nuna emematkun
kashi kantamtanak mijattsujai,
nuniakun segatnashkam segatskek idaitsujai.
9 Apajuí mina ayamjutna nuna chichagkun:
“¿Wagka minash kajimatjukiume?
¿Wagkanuk wisha mina shiwag aintuinakuish,
wake besemjash wekaetaja?” tajai.
10 Mina shiwag aidau dushiktuinak:
“¿Amina Apajuígmesha?”
tusa aju ajumag inintuinawai.
Imatjutiagtai mina ukunchig najautuinawai.
11 Tuja ¿wagkanuk wisha mijaktaja?
Wi puyatjumainuk atsawai.
Apajuí uwemtikagtina nuwig
kajintsan anentaimtatjai,
nuniakun ima niinak ememattatjai.
¡Niyai mina Apajuíg uwemtijinuk!