4
Tuke Pujuu ashí nugkanum inamjatin
1 Tuke Pujuu jee pegkejam awa nunú mujak,
tikich muja aidaun nagkaesau dekas muja shiig múun atinai.
Nunú mujanum ashí aents tikich nugkanmaya aidau
shiig kuashat kauniagtinai.
2 Kuashat aents nugka muunnumia aidau kaunainak:
“¡Minitajum muja Tuke Pujuunua nuwi wakagmi,
nunika Jacopa Apajuíjiya nuna jeen jegawagmi,
awi Tuke Pujuu niina chichame umiktin agagbauwa nuna
jintinjamamtai, iish nunú antuka umikagmi!” tiagtinai.
3 Tuke Pujuu aents nugka muunnumia aidaunak,
tuja atushtanmaya aidaunashkam suwimkan susattawai.
Tuja utugchat ataishkam nii epegkeatnai.
Nuadui dita aidauk puyagjinak
ajak ajakmaku takatain najankagtinai,
untsu nagki aidaunak trigo tsupitain najankagtinai.
Dutikawaju asag nugka muunnumiagkesh
tikichjai maaniauk makichkish atsutnai.
Tuja maaniatag tusa uminku
suntagmaebaushkam atsustinai.
4 Nuadui ashí aents aidauk ishamkagtutsuk
maki makichik dita uva ajakbaujin, higo ajakbaujin
nuna wakentin bikintunum shiig agkan
ayamainak batsamsatnai.
¡Nunak dekas Tuke Pujuu ashí senchigtina nunú aatus tawai!
5 Tuja tikich aents aidauk
dita apajuímtaiji aidaun umijuinawai;
dita núninakuish, iik Tuke Pujuu iina Apajuíjiya nunú
atakea duish tuke umigkatin ainaji.
6-7 Tuja junashkam Tuke Pujuu chichaak:
“Mina aentsug aidauk
wi suwimak susam waituidau asag,
uwigjai betek yawekag, shutusag wainak yujawai.
Tujash dukap atsuk ataktu yajuakan ijumjattajai.
Nunú tsawan jegamtai,
ujumak iwaku batsatun yajuaka ijumjan,
ataktu shiig kuashat senchigtin awajsatnaitjai.
Dutikan wi dita apuji wajasan
mina jegag pegkegma nuwi pujusan inamjatnaitjai.
8 Muja Siógkah, ame yaakat Jerusalén mina
aneetaijua nunú ejakam kuitamin ayume,
nuadui ataktu yaunchuk aayum iman wajastatme.
¡Ame atatme mina aentsug aina nuna
dekas yaaktaji shiig múun!” tawai.
9-10 “¿Wagka tujash Jerusalégka amesh
nuwa uchin najaimak buutama imanikmesh buutme?
Amek wainkamek buutmaitsume,
amina apugmik pujawai,
tuja apu chichagkagtin aidaushkam batsatui.
Dekas buuttag takumek, amina aentsjum aidau
ukugmakiag ikam ajanum batsatun,
babilonianmaya aidau achijag yajuakagtina nunú
anentaimsam buutta.
Dutikawagmataish, wi ditanak ayamjukan
uwemtikjan agkanmitkawagtinaitjai.
11 “Kuashat aents nugka muunnumia aidau
amina shiwagmatjamainau asag chichainak:
‘¡Utusag Jerusalégkan tsaikanum tusa wakegaji!’ tuinawai.
12 Tujash nunú aents aidauk Apajuísh wajinak dutikatag tawa nunak shiig dekainatsui,
Apajuí ditanak trigo tsupija ijumja jigkatiama
numamtuk awajkatta nuna
ditak dekainachu asa tuu yujawai.
13 ¡Pai Jerusalégkah!
¡Nantakta, nunikam dekegka tsaikta!
Wagki Apajuí chichaak:
‘Wi aminak depetmakti tusan toro senchia iman,
kachuji jiju hierro katsugma ibau,
nuigtush nanchiki bronce katsugma iman awajsattagme.
Dutika ai depetkam dita wajiji kasamka ijumtai aina nunú
ashí yajutkam mina sujustinaitme,
wagki ashí nugka duka midau ainawai’, tawai Apajuí”,
tiuwai Miqueas.