3
Haoqnao naosaq khe aqn aqyanq bhai tsaol-aq yaq nail neema lavqkhoel-ai khalhai pevq lal nail ganl
1 Haoqnao naosaq-u phao, haq dee aoq deedee nail aqyanq kev lee nail ngaol dai, heeq kivq thaq-ai yaoq.
2 Khul khi mail dai ngal-aq neq, tsaol-aq yaq niailhai pevq lal nail ngaol. Yovqgavq nail aqmaol bhai gaiq-a nail, phul bhai neekhaol jiav nail neema aol nail, khal ge movq-ail ge nail, neema eeq nail, yovqgavq nail aqmaol bhai yovqgavq thaqeeq nail, aqbhu aqma nail daoq maq naldaiq nail, yu nail geeqlaoq bhai maq noeq nail nee ovqtavq, maq meeq maq haol nail tsaol-aq pevq lal nail ngaol.
3 Al ovqtavq, yu bhai maq gaiq-a nail, yu nail oeqbal bhai maq phaiq bhiq nail, yu nail haoqnaol phao nee ge doil nail, yovqgavq nail neema bhai maq gaq lai nail, mao-ail haqeiv nail khi aqmeeq phaq bhai neejiav jiav nail tsaol-aq iqsanl pevq lal nail ngaol.
4 Aqyu juq neq, saljial maq ivq nail, khul teevq phaq-ail maq saol-nvq dai nl nail, neema eeq deedee nail, Miqyail bhai maq gaiq-a mail, miltsaq phao lavqkhiq tsail lal nail juq bhai gaiq-a nail tsaol-aq iqsanl pevq lal nail ngaol.
5 Aqyu juq neq, lavqniil phao taivq-ail Miqyail bhai ev nail aol thaoq nail ngaol. Lavqkhoel phao neq, aol al bhai tavq nail bhaqaoq teevq peivq-ail maq aol nail tsaol-aq ngaol. Alheel nail tsaol-aq bhai gail jao jao yaoq.
6 Aqyu juq nail lavqkhoel bhai teevq pav ganav juq neq, yu nail ilkhaol bhai aol lai khi, neenoeq neekha maq aol nail yaqmai-aq juq bhai aqyu juq nail aqlavq lavqkhoel bhai aol lee dai, jalmul mul nail ngaol. Yaqmai-aq al juq neq, oeqbal maodai phi khi, aqsivq haqjoil phao nee tavq nail neekhaol sil nail mee nia phaq aqyu juq bhai hel-aivq nail ngaol.
7 Aqyu juq neq, khaq mao iqsanl, yu saol bhiq nail bhai saol oil khi ngaol-aoq, maldil tsaq nail daoq bhai, maq heeq nia lal-ail.
8 Yaqneiq khi Yaqbheiq, Molseiq-i mail cavq nail daoq bhai lav tsoiq deedee nail khe-ai, jalmul mul nail tsaol-aq al juq iqsanl maldil tsaq nail daoq bhai lav tsoiq deedee nail ngaol. Aqyu juq nail saol-nvq nia nail neema gaol li cevq dai pevq-ail khi, aqyu juq nail neema thaqtsaol nail phaq bhai laonqdaiq-u phao, sunq-ail nail ngaol.
9 Aqyu juq neq al bhai dee lai nail ngaol. Khul khi mail dai ngal-aq neq, tsaol-aq al nvq gaq neenoeq neekha maq aol ail dai bhaqlaoq kheq dai dov lal-a nail khe-ai, tsaol-aq niil juq neenoeq neekha maq aol nail iqsanl, tsaol-aq iqsanl nail sivtavq bhai bhaqlaoq kheq dai, dov lal nail ngaol.
Tilmolseiq bhai Paolluv-i mail saol bhiq-a nail ganl
10 Naol ngaq nail ganl heeq nia nail ngaol. Ngal cavq nail cov nail, ngal nl nail hal nail, ngaq nail noeqthunq nail, ngal neema thaqtsaol nail, ngal neenoeq heelma ma dai noeq nail, ngal goil nail gaiq-a nail khi ngal oltsaol nail, naol niil juq bhai heeq nia nail ngaol.
11 Ngal khoeq nail jiovq nail phaq khi haq nail aoq nail phaq bhai ya daq nail ngaol dai iqsanl, naol heeq nia nail ngaol. Aqdil-aoq meenq, Ilgaolnil meenq khi, Luldaqlal meenq, meenq al juq nail lavqkhoel bhai jaol-u phao, ya daq deedee-a nail ngaol. Thailhai ngaol-aoq, khoeq lavq jiovq lavq nail al juq iqsanl nail lavqkhoel-ai, Heeqphaq Yeiqsul ngaq bhai bhi jel-ail lavq-a nail ngaol.
12 Maldil dai ge haq neq, Yeiqsul Khali bhai juq juq-ail Miqyail bhai ev nail tsaol-aq iqsanl mail, khoeq nail jiovq nail bhai ya daq nail ngaol.
13 Haqeiv nail tsaol-aq khi goiqbhaoq khoiqbhaoq bhaoq nail tsaol-aq teevq pov nee teevq pov gaoq haqeiv jaiq lal nail ngaol. Aqyu juq yu bhai hevq bheel-aivq khi yu iqsanl aqyu juq bhai hevq bheel-aivq nail ngaol.
14 Thailhai ngaol-aoq, naol ya saol khi neema thaqtsaol nail phaq bhai ivqdao dai, nieivq thaiq-ai thaq yaoq. Khul khi mail dai ngal-aq neq, naol khaq sil gaq bhai saol oil-a nail dai, naol heeq kivq nail ngaol.
15 Al ovqtavq, naol neq, yaqkhaq yaquv-ail jiav-u nee mail, meeq nail haol nail Jalliq bhai heeq nia nail ngaol. Jalliq al neq, Yeiqsul Khali bhai neema thaqtsaol nail ngel-i mail, naol hevqkovq nail phaq ya dai, neenoeq neekha bivq nia nail ngaol.
16 Miqyail-i mail bhi noeq dov-a nail ngel-i mail, Jalliq iqsanl mail gevq dov-ai thaq nail ngaol. Jalliq neq, cavq bhiq cov bhiq nail, oeqbal phaodaiq bhiq nail, gaoq bhi meeq lal nail phaq khi, aqmeeq aqhaol dai, doevq nia nail haqbhoil ganl tsoiq nail ngaol.
17 Al bhaqda nee, Miqyail nail tsaol-aq, yaoq phaq yaoq-ao nee bhee lovq nail tsaol-aq pevq nail nee ovqtavq, aqmeeq phaq yaoq phaq yaoq-ao nee nl nail dai khi, lainq-ai thaq nail tsaol-aq pevq lal nail ngaol.