21
Nqtavq aqsivq khi miltsaq aqsivq nail ganl
1 Aq-u phao, ngal nqtavq aqsivq khi miltsaq aqsivq bhai ya moel-a nail ngaol. Khul khi mail dai ngal-aq neq, nqtavq aqlil khi miltsaq aqlil neq, peiv ail-aoq nail ngaol. Iqyaq iqma iqsanl, maq jiav yaoq-aol.
2 Aq-u phao, meeq nail haol nail Yeiqlulsaqlaiq meenq aqsivq Miqyail jaol nail nqtavq kovtavq nee yavq kha lee thailthaiq nail bhai, ngal ya moel-a nail ngaol. Meenq al meenq neq, maol ail nail yaqmai-aq yaqnoil khe-ai, aqmeeq-ai lainq-ai thaq nail ngaol.
3 Doiqbev bev ma nee mail, kav deedee nail aqthel gul dov-ai leevq nail bhai, ngal ya gaiq-a nail ngaol. Aqthel al neq, niailhai gul nail ngaol: “Heldaiq dei-eiq. Miqyail nail jaol duq tsaol-aq jaol nail bha jiav lee khi, aivq tsaol-aq yaq nee mail jaol nail ngaol. Aqyu juq neq, Miqyail nail tsaol-aq pevq khi, Miqyail iqsanl, aqyu juq nee mail jaol nail ngaol.
4 Aivq aqyu juq nail maivbhil iqsanl mail siv bhiq nail ngaol. Sil nail phaq maq jiav yaoq-aol. Noeqhaq nail phaq, nioilkhaoq khaoq nail phaq, nal nail goel nail phaq, niil juq iqsanl maq jiav yaoq-aol. Khul khi mail dai ngal-aq neq, iqmoeq-u phao jiav-a nail juq peivq gil ail-aoq nail ngaol” dai, ge nail ngaol.
5 Doiqbev bev ma bhai jaoldeel-nvq thaq nail gaq ge nail: “Heldaiq. Ngal yaoq phaq yaoq-ao nee aqsivq lav phal-aoq nail ngaol” dai, ge nail ngaol. Aivq teevq pov gaoq ge nail: “Niil juq gevq thaq-ai yaoq. Khul khi mail dai ngal-aq neq, daoq niil juq neq, maldil tsaq khi saljial ivq nail daoq pevq nail ngaol” dai, ge nail ngaol.
6 Al ovqtavq, aivq teevq pov gaoq ge nail: “Gil-aoq naol. Ngal neq, Aqlaqphal khi Aolmeiqgal ngaol. Iqmoeq ilmoeq khi haoqnao naosaq khe gaq iqsanl pevq nail ngaol. Ulcuvq khal moevq nail tsaol-aq bhai, aqdoevq bhi doevq lal nail ulcuvq eelbev nee dov lee-a nail ulcuvq ngal aqnieivq-ail bhi daol naol.
7 Gaq lai-a nail tsaol-aq jaiqbhoil niil juq ya nail ngaol. Ngal aivq nail Miqyail pevq khi, aivq ngaq nail yaq pevq nail ngaol.
8 Thailhai ngaol-aoq, geesil nail neema aol nail tsaol-aq, neema maq thaqtsaol nail tsaol-aq, aqjiivq aqcavq phaq nl nail tsaol-aq, tsaol-aq bhai heivq-a nail tsaol-aq, khaqmiq sev nail tsaol-aq, neivq bhai laol nail sail nail tsaol-aq, thaoqphaoq aqma maolkhoel bhai uqhuq thaoq nail tsaol-aq khi, goiqbhaoq bhaoq nail tsaol-aq iqsanl mail, miqjaq khi miqjal jalheel tovq nail ngaqkha bhai ya daq nail ngaol. Al neq, nvq pov teevq pov sil nail phaq pevq nail ngaol” dai, ngaq bhai ge lavq-a nail ngaol.
Yeiqlulsaqlaiq meenq aqsivq nail ganl
9 Aq-u phao, haoqnao naosaq khe khoeq nail jiovq nail sivq phaq teevq bhee aol nail, iqlaoq sivq heeq tsiq-nq thaq nail nqtavq gaqkhoel sivq gaq nail lavqkhoel khe teevq gaq lee khi: “Lal yaoq. Yaolyaq nail khaqma pevq nail yaqmai-aq yaqnoil ngal naoq bhai cavq naq lavq bhel” dai, ngaq bhai ge lavq-a nail ngaol.
10 Aivq ngaq bhai Aqhaqlal Miqyail nail lavqkhoel nee eeq dee moe deedee nail gaoqjaoq bhai hel-aivq lavq-a nail ngaol. Aq-u phao, Miqyail jaol nail nqtavq kovtavq nee yavq kha lee thailthaiq nail meeq nail haol nail Yeiqlulsaqlaiq meenq, ngaq bhai cavq naq lavq-a nail ngaol.
11 Meenq al meenq neq, Miqyail nail seiqleiq khaoqsail teevq bhee aol nail ngaol. Meenq al meenq nail aqbhaq bhaq nail neq, aqphoiq phoiq deedee nail sainl khe-ai pevq khi, phaoq daiq khe-ai aqbhaq mee nia phaq aol nail neltsaiq deel sainl khe-ai iqsanl, dul nail ngaol.
12 Meenq al meenq neq, eeq dee moe deedee nail khainl jiav khi, govkhoiq tsel-nvq khoiq daol nail ngaol. Govkhoiq al tsel-nvq khoiq bhai, nqtavq gaqkhoel teevq khoiq bhai teevq gaq lovq nail ngaol. Lolgov bhai neq, Ilsaqleiqlal nail jeq-e tsel-nvq jeq-e nail aqmil gevq-ai thaq nail ngaol.
13 Govkhoiq al juq neq, nlma dovkhoeq phao hail khoeq, pultavq phao hail khoeq, pul-nvq phao hail khoeq khi, nlma ga khoeq phao hail khoeq daol nail ngaol.
14 Khainl al bhai, iqmoeq ilmoeq kaovq-a nail lovmav tsel-nvq heeq jiav nail ngaol. Lovmav al juq bhai Yaolyaq nail gaqkhoel tsel-nvq gaq nail aqmil gevq-ai thaq nail ngaol.
15 Ngaq bhai daoq ge tsaoq lavq-a nail nqtavq gaqkhoel al gaq, meenq bhai maqkhaiq, khainl bhai maqkhaiq, khainl nail lolgov juq bhai maqkhaiq, tsa daiq nail haqbhoil heel nail lunl aqkhaoq aol nail ngaol.
16 Meenq al meenq neq, liq phaoq liq khoel ngaol. Nqtavq gaqkhoel al gaq, heel nail lunl aqkhaoq al-i mail meenq al meenq bhai tsa daiq-u phao, teevq hinl liq yal lal bhee nail ngaol. Heelma phao, laiqma phao, daqmoe phao iqsanl teevq gaq kheel ngaol.
17 A bhai nee ngal-aq, aivq khainl bhai tsa daiq-u phao, tsaol-aq nail lavqcav nee saol-nvq haq neq, teevq yal liq tsel liq cav moe nail ngaol. Tsaol-aq nail lavqcav khi nqtavq gaqkhoel nail lavqcav neq, teevq gaq kheel ngaol.
18 Meenq al meenq nail khainl neq, neltsaiq deel sainl-i mail kaovq-ai thaq nail ngaol. Meenq neq, haoltaiv deel heel-i mail kaovq-ai thaq khi, phaoqdaiq khe-ai haoltaiv deel ngaol.
19 Meenq nail khainl daoqthaoq bhai kaovq-ai thaq nail lovmav al juq neq, aqphoiq mao-ail phoiq nail sainl mee nia phaq-i mail kaovq-ai thaq nail ngaol. Iqmoeq ilmoeq khe heeq neq, neltsaiq deel sainl ngaol. Nvq heeq teevq heeq neq, aqpheel pheel nail sainl ngaol. Hail heeq teevq heeq neq, phulleq deel sainl ngaol. Liq heeq teevq heeq neq, aqniul niul nav nav nail sainl ngaol.
20 Ngaq heeq teevq heeq neq, gevq lavq yaovq deel nail sainl ngaol. Kovq heeq teevq heeq neq, aqnel nel deel sainl ngaol. Sivq heeq teevq heeq neq, aqheel heel nel nel nail sainl ngaol. Eivq heeq teevq heeq neq, aqniul niul heel heel nail sainl ngaol. Goiq heeq teevq heeq neq, heel tsaiq deel nail sainl ngaol. Tsel heeq teevq heeq neq, aqheel heel niul niul nail sainl ngaol. Tsel teevq heeq teevq heeq neq, aqnel bhai boivq boivq kheq nail sainl ngaol. Tsel-nvq heeq teevq heeq neq, aqnel bhai aqpheel kheq nail sainl ngaol.
21 Khainl lolgov tsel-nvq gov neq, laoq pav laol pav nail sainl tsel-nvq heeq-i mail lav sav-ai thaq nail ngaol. Lolgov teevq gov bhai neq, laoqpav laolpav nail sainl teevq heeq ngaol. Meenq al meenq nail gaoltsi bhai daol nail gailkhaol neq, haoltaiv deel heel-i mail lav sav-ai thaq khi phaoqdaiq khe-ai haol nail ngaol.
22 Meenq al meenq nail lavqkhoel-ai uqhuq thaoq nail ilkhaol il ma jiav nail bhai, ngal maq moel-al. Khul khi mail dai ngal-aq neq, iqsanl nail kovtavq bhai uvthaiq nail bhaqaoq eeq nail Heeqphaq Miqyail khi Yaolyaq neq, meenq al meenq nail uqhuq thaoq nail ilkhaol il ma pevq nail ngaol.
23 Meenq al meenq nail lavqkhoel bhai nlma nail aqbhaq khi bhala nail aqbhaq maq loq-ail. Khul khi mail dai ngal-aq neq, Miqyail nail seiqleiq khaoqsail meenq al meenq bhai aqbhaq bhaq khi, Yaolyaq neq, meenq al meenq nail phalmanq pevq nail ngaol.
24 Jeq-e jaq-a iqsanl mail aqbhaq al nail lavqkhoel bhai tsao nail ngaol. Miltsaq khe heeqphaq juq, meenq nail lavqkhoel bhai yovqgavq nail seiqleiq khaoqsail yovqgavq oil lavq nail ngaol.
25 Meenq al meenq nail khainl lolgov juq neq, teevq n n lao-ail maq pheethaiq-ail. Al ovqtavq, a bhai neq, nqkivq maq kivq lai-ail.
26 Jeq-e jaq-a iqsanl nail seiqleiq khaoqsail khi aqyu juq nail aqphoiq kav nail phaq, aqyu juq meenq al meenq nail lavqkhoel bhai oil lavq nail ngaol.
27 Aqjiivq aqcavq khul phaq maqkhaiq, meenq al meenq bhai maq ya oil bhoel laivq-ail. Aqjiivq aqcavq phaq nl-a nail tsaol-aq khi goiqbhaoq bhaoq-a nail tsaol-aq khul gaq maqkhaiq, meenq al meenq bhai maq ya aol lai-ail. Yaolyaq nail aqdoevq bhi doevq nail haoqgavq phaldoiq lavqkhoel bhai aqmil gevq bhoel-ai thaq nail tsaol-aq taivq-ail, ya aol lai nail ngaol.