17
Mao-ail eeq nail maimaqlal gaq bhai yalkhaq dal-a nail ganl
1 Aq-u phao, heel iqlaoq sivq heeq aol nail nqtavq gaqkhoel sivq gaq nail lavqkhoel khe teevq gaq lee khi, “Lal yaoq. Ulcuvq maodai nail kovtavq-ai jaoldeel-nvq thaq nail mao-ail eeq nail maimaqlal gaq bhai yalkhaq dal bhiq thailthaiq nail, ngal naoq bhai cavq naq lavq bhel.
2 Miltsaq kovtavq khe jaol nail heeqphaq juq aivq nee mail bheeq-a nail ngaol. Miltsaq yaq juq iqsanl mail khaqmiq sev dai, aivq nail jilpheeq daol bol laivq thaq nail ngaol” dai, ngaq bhai ge lavq-a nail ngaol.
3 A bhai nee ngal-aq, nqtavq gaqkhoel al gaq ngaq bhai, Aqhaqlal Miqyail nail lavqkhoel nee tsaol-aq maq jaol nail haqtsoiq haqyal bhai hel-aivq lavq-a nail ngaol. A bhai yaqmai-aq teevq gaq haqeiv nail jaiqyaq neltsaiq deel teevq maol bhai jeeq-nq thaq nail bhai, ngal yaq moel-a nail ngaol. Haqeiv nail jaiqyaq al maol neq, uqhuq sivq huq khi uqkheel tsel kheel covq nail ngaol. Aqmaol maol lao-ail Miqyail bhai khal ge movq-ail ge nail aqmil juq, gevq-ai thaq nail ngaol.
4 Yaqmai-aq al gaq neq, nel nav nav nail khi neltsaiq deel aqgaq aqdoi doi-nq khi, heel sainl khi laoqpav laolpav nail sainl goe-nq thaq nail ngaol. Aivq neq, yu nee mail bheeq nail leel nail bhai tavq lai nail aqjiivq aqcavq phaq khi maq heldaiq nul nail phaq teevq bhee aol nail heel maiqgaoq tsiq-nq thaq nail ngaol.
5 Aivq nail neeqthel bhai oil-uvq-ai thaq nail daoqceevq bhao nail aqmil niailhai gevq-ai thaq nail ngaol:
“aqmil dov nail
Bhaqbhulloq meenq neq,
maimaqlal juq nail
aqma pevq khi
miltsaq kovtavq khe
aqjiivq aqcavq juq nail
aqma ngaol” dai,
gevq-ai thaq nail ngaol.
6 Yaqmai-aq al gaq, Miqyail nail tsaol-aq juq nail aqsivq maqkhaiq, Yeiqsul nail haqbhoil salkhil khanq nail juq nail aqsivq maqkhaiq daol bov-a nail bhai, ngal ya moel-a nail ngaol. Ngal aivq bhai ya moel-u phao, noeq-u maq dov dai, pevq ail-a nail ngaol.
7 Aq-u phao, nqtavq gaqkhoel al gaq ngaq bhai ge lavq-a nail: “Naol khul khi noeq-u maq dov dai, pevq ail nail-aiq. Yaqmai-aq al gaq nail ganl maqkhaiq, uqhuq sivq huq khi uqkheel tsel kheel nail ganl maqkhaiq, aivq-i mail jeeq-nq thaq nail haqeiv nail jaiqyaq al maol nail ganl maqkhaiq, oil tsail-ai thaq nail al, ngal naoq bhai ge daiq lavq bhel dei-eiq.
8 Naoq-i mail moel thailthaiq nail haqeiv nail jaiq yaq al maol neq, milnee uqnee jaol khi ngaol-aoq niil aq-il maq jaol yaoq-aol. Aivq neq, mao-ail maq maoq lal mail, mao-ail navq nail khaqduq nee dov lal khi ngaol-aoq, ya luq ya seil-ail nail ngaol. Nqtavq khi miltsaq teivq-u nee mail, aqdoevq bhi doevq nail haoqgavq phaldoiq lavqkhoel-ai aqmil maq gevq bhoel-ai thaq nail miltsaq kovtavq bhai jaol nail tsaol-aq, haqeiv nail jaiqyaq al maol bhai ya moel-u phao, noeq-u maq dov dai, pevq-ail nail ngaol. Khul khi mail dai ngal-aq neq, milnee uqnee jaol khi ngaol-aoq, niil aq-il maq jaol mail, yaqhao gaoq jaol lal nail ngel-i mail ngaol.
9 Ganl niil heeq kivq dai, neenoeq neekha ya aol nail ngaol. Uqhuq al sivq huq neq, yaqmai-aq al gaq-i mail jaoldeel-nvq thaq nail gaoqjaoq sivq jaoq ngaol. Heeqphaq sivq gaq iqsanl ngel nail ngaol.
10 Thailhai ngaol-aoq, ngaq gaq neq, sil-aoq nail ngaol. Teevq gaq neq, niil aq-il uvthaiq thailthaiq nail ngaol. Teevq gaq neq, maq dov lal haq-al. Aivq dov lal-u phao, teevq yanq taivq-ail ya jaol-ail teevq-eel ngaol.
11 Milnee uqnee jaol khi ngaol-aoq, niil aq-il maq jaol nail, haqeiv nail jaiqyaq al maol neq, eivq gaq teevq gaq ngaol. Aivq neq, al sivq gaq bhai tavq nail ngaol. Aivq iqsanl, ya luq ya seil-ail nail ngaol.
12 Naoq-i mail ya moel-a nail uqkheel al tsel kheel neq, milkhaoq bhai maq ya uvthaiq haq nail heeqphaq tsel gaq ngaol. Aqyu juq neq, haqeiv nail jaiqyaq al maol nee mail naqli teevq lavq bhee dai, heeqphaq nail alyaq ya nail ngaol.
13 Heeqphaq al juq, neema teevq heeq taivq-ail tavq khi, haqeiv nail jaiqyaq al maol nail aqlavq lavqkhoel-ai yovqgavq nail bhaqaoq khi yovqgavq nail alyaq av bhiq nail ngaol.
14 Aqyu juq Yaolyaq bhai genl dev nail ngaol. Dev-u phao, Yaolyaq aqyu juq bhai dev gaq nail ngaol. Khul khi mail dai ngal-aq neq, aivq neq, uvthaiq nail juq nail kovtavq bhai uvthaiq nail gaq pevq khi, heeqphaq nail kovtavq bhai heeqphaq iqsanl, pevq nail ngaol. Aivq nee mail jaol nail tsaol-aq juq neq, khul-ai thaq nail tsaol-aq, tsel dov-ai thaq nail tsaol-aq khi, saljial ivq nail tsaol-aq neq, aivq nee mail teevq gaq khe-ai gaq lai nail ngaol” dai, ngaq bhai ge lavq-a nail ngaol.
15 Nqtavq gaqkhoel al gaq ngaq bhai teevq pov gaoq ge lavq-a nail: “Naoq-i mail ya moel-a nail maimaqlal al gaq-i mail jaoldeel-nvq thaq nail ulcuvq al neq, jeq-e jaq-a juq, tsaol-aq munl munl ma juq, milkhaoq juq khi daoq mee nia phaq ge nail tsaol-aq juq ngaol.
16 Naoq-i mail ya moel-a nail uqkheel al tsel kheel khi haqeiv nail jaiqyaq al maol neq, maimaqlal al gaq bhai neejiav jiav lal nail ngaol. Aqyu juq aivq khe khal jiav nail iqsanl bhai oil gil bhiq khi, maoldeq lavqnel-ail bhi jaol nail ngaol. Aqyu juq aivq nail haqjoil jaq khi, aivq bhai miqjaq-i mail kheqpoiv nail ngaol.
17 Khul khi mail ngal-aq neq, aqyu juq Miqyail neema tsaq nail khe-ai nl lal dai, Miqyail aqyu juq nail neema bhai bhi noeq dov-a nail ngaol. Bhi noeq dov-a nail al neq, aivq nail daoq bhee lal-u phao kev dai, neema teevq heeq taivq-ail tavq tavq-ail, haqeiv nail jaiqyaq al maol nail aqlavq lavqkhoel-ai yovqgavq nail aqyaq yovqgavq av bhiq-a nail ngaol.
18 Naoq-i mail ya moel-a nail yaqmai-aq al gaq neq, miltsaq kovtavq khe heeqphaq juq bhai uvthaiq nail meenq meenq ma ngaol” dai, ge lavq-a nail ngaol.