15
Yu nail haqbhoil meeq dai nl yaoq
1 Ngadao gaq kav nail juq, yovqgavq nail neekhaol sil dai taivq-ail maq nl mail, gaq bhaq nail tsaol-aq nail gaq bhaq nail phaq bhai ol bhiq nail tsaq nail ngaol.
2 Ngadao nail aqjail bhai jaol nail juq meeq lal jaq lal, eeq lal heel lal dai, ngadao yaoq gaq yaoq-ao nee noeq kev nail tsaq nail ngaol.
3 Khul khi mail dai ngal-aq neq, Khali iqsanl, aivq nail neekhaol sil dai taivq-ail maq nl-al. Jalliq lavqkhoel bhai gevq-ai thaq nail khe-ai, “Naoq bhai khal ge movq-ail ge nail juq, aqyu juq-i mail khal ge movq-ail ge nail daoq al, ngal iqsanl ya daq-a nail ngaol” dai, gevq-ai thaq nail ngaol.
4 Milnee uqnee khe khal gevq-ai thaq nail juq, ngadao bhai cavq lavq cov lavq nail dai khi, gevq-ai thaq nail ngaol. Ngadao oltsaol nail bhai maqkhaiq, Jalliq lavqkhoel khe gaq bhiq lavq-a nail phaq ya nail bhai maqkhaiq, noeqthunq nail phaq ya nail ngaol.
5 Yeiqsul Khali neema tsaq nail khe-ai, nuljuq teevq gaq nee teevq gaq neema teevq dao bhai tavq lai dai, Miqyail nuljuq bhai hevq daiq bhiq dei-eiq. Aivq neq, oltsaol khi gaq bivq lavq nail Miqyail ngaol.
6 Alhai hevqdaiq lavq-a nail neq, nuljuq neema teevq dao bhai tavq khi ngadao nail Heeqphaq Yeiqsul Khali nail Aqbhu Miqyail bhai teevq gaq khe-ai, tsiqeeq nia nail haqbhoil ngaol.
Yu nail jeq-e jaq-a bhai lavqkhiq tsail nail geeqlaoq daoq cavq bhiq ail-a nail ganl
7 Khali nuljuq bhai hav bhoel-a nail khe-ai, nuljuq teevq gaq nee teevq gaq hav bhoel yaoq. Hav bhoel haq neq, Miqyail nail seiqleiq khaoqsail dov lal nail ngaol.
8 Miqyail-i mail ge-ai thaq nail juq, maldil tsaq nail ngaol dai, dov lal dai, Yuldav nail tsaol-aq juq nail haqbhoil Khali neq, yaqkav jiovq lee-a nail ngaol dai, ngal ge nail ngaol. Milnee uqnee Miqyail-i mail aqmil dov nail aqphiq aqbhal bhai ge bhiq-a nail saljial al juq bhai, aivq bhi bhee lal-a nail ngaol.
9 Al ovqtavq, Miqyail gaoq haq gaiq-a nail ngel-i mail, yu nail jeq-e jaq-a aivq bhai bhi tsiqeeq nail dai, Khali nl lee-a nail ngaol. Jalliq lavqkhoel bhai gevq-ai thaq nail khe-ai,
“Alheel ngel-i mail,
yu nail jeq-e
jaq-a nail lavqkhoel
ngal naoq bhai
tsiqeeq khi,
naoq nail aqmil bhai
aqthel gul gul-ail
tsiqeeq naol” dai,
gevq-ai thaq nail ngaol.
10 Teevq pov gaoq ge nail:
“Yu nail jeq-e jaq-a juq-ol,
aivq nail tsaol-aq nee mail
teevq gaq khe-ai
lavqkhiq tsail yaoq” dai,
gevq-ai thaq nail ngaol.
11 Teevq pov gaoq ge-ai haq nail:
“Yu nail jeq-e jaq-a
iqsanl mail
Heeqphaq Miqyail bhai
tsiq eeq yaoq.
Miltsaq yaq iqsanl mail
aivq bhai tsiq
eeq dei-eiq” dai,
gevq-ai thaq nail ngaol.
12 Ilsaqyal iqsanl gaoq ge nail:
“Yeiqsail nail
daoqtsail bhai
bhoenaiq naiq
lal nail ngaol.
Yu nail jeq-e jaq-a bhai
uvthaiq nail dai khi,
aivq doevq
lee nail ngaol.
Yu nail jeq-e jaq-a
aivq nail lavqkhoel
noeqthunq duq
ya lal nail ngaol” dai,
gevq-ai thaq nail ngaol.
13 Noeqthunq nail phaq bivq lavq-a nail Miqyail neq, nuljuq neema thaqtsaol nail lavqkhoel lavqkhiq tsail nail phaq khi neesal-ovq nail yaoq phaq yaoq-ao nee bhi bhee lal dei-eiq. Alhai bhi bhee lal nail neq, Meeqnail Haolnail Aqhaqlal nail bhaqaoq bhaqda nee, nuljuq noeqthunq nail lavqkhoel bhai bhi bhee lal nail haqbhoil ngaol.
Paolluv-i mail daoq cavq cavq nail ganl
14 Ngaq nail aqivq jaqbheq juq-ol, nuljuq aqmeeq phaq teevq bhee aol nail tsaol-aq ngaol dai, ngal neema thaqtsaol naol. Nuljuq neq, neenoeq neekha yaoq phaq yaoq-ao nee heeq nia nail tsaol-aq khi teevq gaq nee teevq gaq cavq bhiq cov bhiq nia nail tsaol-aq ngaol dai iqsanl, ngal neema thaqtsaol nail ngaol.
15 Thailhai ngaol-aoq, ngal daolcoev dai, nuljuq jaol nail bha haoqgavq niil gevq bhoel-ai lavq-a nail ngaol. Ganl teevq pav ganav juq nuljuq bhai gaoq cavq pov bhiq nail ngaol. Khul khi mail ngal alhai ge nail dai ngal-aq neq, Miqyail aivq nail geeqlaoq eeljaol bhaqda nee, ngaq bhai khul lavq-a nail ngaol.
16 Yu nail jeq-e jaq-a nail haqbhoil Yeiqsul Khali nail yaqkav bhi jiovq nail dai khi, khul lavq-a nail ngaol. Miqyail nail lavqkhiq tsail nail geeqlaoq daoq cavq bhiq nail Philma bhi jiovq nail dai khi iqsanl, khul lavq-a nail ngaol. Alhai bhiq jiovq lavq nail neq, jeq-e jaq-a iqsanl mail, Meeqnail Haolnail Aqhaqlal-i mail bhi meeq bhi haol lal-a nail, Miqyail neema tsaq nail laol bhiq nail phaq bhi pevq lal nail haqbhoil ngaol.
17 Alheel ngel-i mail, Miqyail nail ganl nl nail lavqkhoel, Yeiqsul Khali bhaqda nee ngal neema eeq duq jiav nail ngaol.
18-19 Khul khi mail dai ngal-aq neq, yu nail jeq-e jaq-a naldaiq nia lal dai, Khali ngaq bhai juq khi nl-a hal-a nail juq taivq-ail ngal maldil dai, ge nail ngaol. Aqyu juq naldaiq nia lal dai, daoq ge nail lavqkhoel nee maqkhaiq, ganl nl nail lavqkhoel nee maqkhaiq, bhiq heeq bhiq moel nail phaq khi noeq-u maq dov nail phaq nail lavqkhoel nee maqkhaiq, Miqyail nail Aqhaqlal nail bhaqaoq lavqkhoel nee ngal nl-a nail ngaol. Alheel ngel-i mail, ngal Yeiqlulsaqlaiq meenq nee mail Illulli milkhaoq bhai kev dai, doi doi dai, Khali nail ganl lavqkhiq tsail nail geeqlaoq daoq aqmeeq-ai cavq bhiq-a nail ngaol.
20 Ngal yu-i mail iqmoeq ilmoeq kaovq-ai thaq nail ilkhaol nee maq kaovq dal laiq dai, Khali nail aqmil bhai maq ya gaiq daiq-a nail tsaol-aq juq jaol nail bhai taivq-ail, lavqkhiq tsail nail geeqlaoq daoq cavq bhiq ail naol dai, noeqceiv-ai thaq nail ngaol.
21 Jalliq lavqkhoel bhai gevq-ai thaq nail khe-ai,
“Aivq nail ganl
yu maq cavq bhiq daiq
khi ngaol-aoq,
aqyu juq ya
moel nail ngaol.
Aivq nail ganl
maq ya gaiq daiq
khi ngaol-aoq,
aqyu juq ya heeq
nia nail ngaol” dai,
gevq-ai thaq nail ngaol.
Paolluv Lolmav meenq bhaq lai naol dai, noeq-ai thaq nail ganl
22 Ganl al bhaqda nee, ngal nuljuq jaol nail bha maq ya lal-al.
23 Thailhai ngaol-aoq, niil aq-il milkhaoq niil juq nail lavqkhoel bhai ganl nl duq maq jiav-aoq nail ngaol. Al ovqtavq, ngal nuljuq jaol nail bha lal movq nail meeq nia kovq bhee lal-aoq nail ngaol.
24 Alheel ngel-i mail, ngal Saqbheiq milkhaoq bhai lai-u phao, nuljuq jaol nail bha iqsanl nalga lal naol dai, noeq nail ngaol. Aq-u phao, nuljuq nee teevq yanq jaol khi jaq tavq daol tavq nail lavqkhoel nee gaq oil gaq haq neq, nuljuq-i mail ngaq bhai tsaojao-ai lavq khi Saqbheiq milkhaoq bhai hevq ha-ail lavq dai iqsanl, ngal noeqthunq nail ngaol.
25 Thailhai ngaol-aoq, niil aq-il Yeiqlulsaqlaiq meenq bha jaol nail Miqyail nail tsaol-aq bhai ngal phul iqmoeq bivq-ai lavq nail ngaol.
26 Khul khi mail dai ngal-aq neq, Maqgeiqdaolnil milkhaoq khi Aqgaqyal milkhaoq bhai jaol nail Khali yaq munl, Yeiqlulsaqlaiq meenq bha jaol nail haq nail aoq nail Miqyail nail tsaol-aq juq bhai bivq nail dai khi, aqyu juq neema tsaq nail lavqkhoel nee, phul danq lavq-a nail ngaol.
27 Aqyu juq-i mail neema tsaq nail lavqkhoel nee danq lavq-a nail phul al juq neq, gailjiov khaoq nail teevq phaq ngaol. Khul khi mail dai ngal-aq neq, aqhaqlal phao Yuldav nail tsaol-aq nail geeqlaoq bhai yu nail jeq-e jaq-a ya-a nail ngaol. Alheel ngel-i mail, aqsivq haqjoil phaoq khe nlmaoq juq Yuldav nail tsaol-aq bhai danq bhiq nail tsaq nail ngaol.
28 Ngal alhai nl ail khi, aqyu juq bhai danq-ai lavq-a nail niil juq av bhiq-ail ceevq haq neq, Saqbheiq milkhaoq bha lai nail pha thao-ail, nuljuq jaol nail bha lal naol.
29 Ngal nuljuq jaol nail bha lal-u phao, Khali nail geeqlaoq teevq bhee aol nail lavqkhoel nee ngal lal naol dai, heeq kivq naol.
30 Aqivq jaqbheq juq-ol, ngadao nail Heeqphaq Yeiqsul Khali bhaqda nee maqkhaiq, Aqhaqlal Miqyail nail goil nail gaiq-a nail phaq bhaqda nee maqkhaiq, ngal nuljuq bhai niailhai hal nail ngaol. Ngaq nail haqbhoil Miqyail bhai geeqlaoq hal tsao deedee lavq yaoq.
31 Yuldav milkhaoq lavqkhoel khe Khali bhai neema maq thaqtsaol nail tsaol-aq nail aqlavq lavqkhoel nee ngal ya jel-ail dai, geeqlaoq hal yaoq. Yeiqlulsaqlaiq meenq bha jaol nail Miqyail nail tsaol-aq, ngaq-i mail bivq lai-a nail phul al juq bhai neekhaol sil dai iqsanl, geeqlaoq hal yaoq.
32 Al ovqtavq, Miqyail neema tsaq haq neq, lavqkhiq teevq tsail nuljuq jaol nail bha lal kev khi, nuljuq nee ngal gaqnaq ya naq dai, ngaq-ai nee mail teevq gaq khe-ai, Miqyail bhai geeqlaoq hal tsao lavq yaoq dai, nuljuq bhai hal nail ngaol.
33 Neesal bhi ovq nail Miqyail nuljuq iqsanl nee mail jaol dei-eiq. Aqmiq.