13
Yeiqsul-i mail yaqlaol juq nail aqkhil tsiq bhiq-a nail ganl
1 Bhaqsaqkhaq bhaoqaiq maq kev lal nail iqmoeq-u n-gaol, aivq miltsaq niilniai nee gaoq ail khi, Aqbhu Miqyail jaol nail bha ya kovq lai nail aqyanq tsaq lal-aoq nail ganl, Yeiqsul heeq nia nail ngaol. Miltsaq kovtavq-ai jaol nail aivq bhai neema thaqtsaol nail tsaol-aq juq bhai aivq gaiq-a khi, haoqnao naosaq-u n-gaol kev dai, gaiq-a nail ngaol.
2 Yeiqsul khi aivq nail yaqlaol juq aoqkivq jaq thailthaiq nail ngaol. Silmoq Ilsaqgaqliqoq nail yaqyov Yuldav nail neema lavqkhoel bhai, Yeiqsul bhai gaoq jaq movq nail neema, neivq heeqphaq-i mail oil bhoel bhiq gaq-ai thaq nail ngaol.
3 Aqbhu Miqyail-i mail, Yeiqsul bhai bhaqaoq teevq bhee bivq-ai thaq nail ganl Yeiqsul heeq nia nail ngaol. Aivq Aqbhu Miqyail jaol nail bha nee lee khi, Aqbhu Miqyail jaol nail bha ya kovq lai nail ganl iqsanl, heeq nia nail ngaol.
4 Alheel ngel-i mail, aivq kovqkhail nee thulphaol lal khi, kovtavq khe phailkhaoq heelma loev khi, aqjiovq bhai lavqsiv pheethaiq-a nail ngaol.
5 A bhai nee ngal-aq, maiqgaoq thailphail phail ma bhai, ulcuvq hoel bhoel khi, yaqlaol juq nail aqkhil tsiq bhiq khi, aqjiovq bhai pheethaiq-ai thaq nail lavqsiv-i mail siv gee bhiq-a nail ngaol.
6 Silmoq Bheiqtuvluv jaol nail bha kev ail-u phao, niailhai ge nail ngaol: “Heeqphaq-ol, naol ngaq nail aqkhil bhai tsiq lavq nail dai khi laiq” dai, Silmoq naldaiq nail ngaol.
7 Yeiqsul ge nail: “Ngal nl thailthaiq nail ganl niilniai, niil aq-il naol maq gov heeq nia-ail haq-al. Thailhai ngaol-aoq, yaqhao heeq kivq lal nail ngaol” dai, ge bhiq-a nail ngaol.
8 Bheiqtuvluv ge nail: “Naoq-i mail ngaq nail aqkhil bhai teevq thal-iq maq bhiq tsiq-ail” dai, ge bhiq-a nail ngaol.
Yeiqsul ge nail: “Naoq nail aqkhil bhai ngal maq ya tsiq bhiq haq neq, naol ngaq-ai nee maq tavq-ail” dai, ge kovq bhiq-a nail ngaol.
9 Aq-u phao, Silmoq Bheiqtuvluv ge nail: “Heeqphaq-ol, thailhai phal-iq neq, ngaq nail aqkhil taivq-ail maq ngel dai, aqlavq khi uqhuq iqsanl tsiq lavq yaoq” dai, ge bhiq-a nail ngaol.
10 Yeiqsul ge nail: “Aqmaol jiivq gaq-a nail tsaol-aq, aqhaol ngel-i mail, aqkhil maq ngel nail neq, tsiq nail maq loq-ail. Nuljuq nail lavqkhoel khe teevq gaq maq ngel nail neq, iqsanl aqhaol ngaol” dai, ge bhiq-a nail ngaol.
11 Khul gaq aivq bhai gaoqjaq nail ganl bhai, Yeiqsul heeq nia nail ngel-i mail, “Nuljuq nail lavqkhoel khe, teevq gaq maq ngel nail neq iqsanl, aqhaol ngaol” dai, ge nail ngaol.
12 Yeiqsul aqyu juq nail aqkhil tsiq gaq gil-u phao, phailkhaoq heelma gaoq doi kovq khi, aivq nail jaol duq bhai aoq jaoq gaoq jaoq lai khi, niailhai ge nail ngaol: “Nuljuq bhai ngaq-i mail nl bhiq-a nail niil, nuljuq gov heeq lal-ail laiq.
13 Nuljuq ngaq bhai, saqlaq-ol, Heeqphaq-ol, dai khul nail ngaol. Nuljuq alhai khul nail, tsaq nail ngaol. Khul khi mail dai ngal-aq neq, ngal neq, nuljuq-i mail khul nail khe-ai, nuljuq nail saqlaq khi Heeqphaq pevq nail ngaol.
14 Nuljuq nail Heeqphaq khi nuljuq nail saqlaq pevq nail ngal neq, nuljuq nail aqkhil bhai tsiq bhiq gaq-ao nail ngaol. Alheel ngel-i mail, nuljuq iqsanl teevq gaq nee teevq gaq aqkhil ya tsiq bhiq nail ngaol.
15 Nuljuq ngaq bhai heldaiq khi nl tsao nia dai, ngal nuljuq bhai nl dai bhiq gaq-ao nail ngaol.
16 Ngal nuljuq bhai maldil dai, ge lavq bhel. Yaqkav neq, yovqgavq nail ilheel nee maqtsil maq eeq-ail. Khoel-ai leevq nail bhai ya daq-a nail gaq iqsanl, khoel nail gaq nee maqtsil maq eeq-ail.
17 Niil aq-il ganl niil juq, nuljuq heeq nia gil-aoq nail ngaol. Heeq kivq-a nail khe-ai, nl haq neq, nuljuq khadai geeqlaoq eeq nail ngel-ail.
18 Nuljuq iqsanl nail ganl, ngal ge thailthaiq nail maq ngel. Ngaq-i mail tsel dov-ai thaq nail tsaol-aq bhai, ngal heeq kivq naol. Thailhai ngaol-aoq, Jalliq lavqkhoel bhai gevq-ai thaq nail, ‘Ngaq-ai nee mail jaltsoiq maiqgaoq teevq gaoq bhai tavq khi jaq nail gaq, ngaq bhai gaoqjaq nail ngaol’ dai, ge-ai thaq nail daoq al daoq ya bhee lal nail ngaol.
19 Ganl al maldil pevq lal-u phao, ngaq-i mail ge nail khe-ai, ngal neq, Meiqsilya ngel lao thaq nial dai, nuljuq heeq nia dai, maq pevq lal-u phao nee mail, nuljuq bhai ge bhiq-ai thaq nail ngaol.
20 Ngal nuljuq bhai maldil dai, ge lavq bhel. Ngaq-i mail khoel gai-aivq-a nail tsaol-aq bhai hav nail gaq neq, ngaq bhai hav nail khe-ai dul khi, ngaq bhai khal hav nail tsaol-aq, ngaq bhai khoel-ai leevq-a nail gaq bhai iqsanl, hav nail khe-ai dul nail ngaol” dai, ge bhiq-a nail ngaol.
Yu aivq bhai gaoqjaq naol dai, Yeiqsul ge nail ganl
21 Yeiqsul alhai ge gaq-u phao, aivq nail neema haqaoq nl deedee nail lavqkhoel, niailhai bhaqlaoq kheq dai, ge dov bhiq-a nail ngaol: “Ngal nuljuq bhai maldil dai, ge lavq bhel. Nuljuq nail lavqkhoel khe teevq gaq, ngaq bhai yu nail aqlavq lavqkhoel bhai av bhiq nail ngaol” dai, ge bhiq-a nail ngaol.
22 Yaqlaol juq teevq gaq nee teevq gaq heldaiq heldaiq-ail, “Aivq khaq sil gaq bhai ge movq nail meeq” dai, kalkav-ai kav lai-a nail ngaol.
23 Yeiqsul mailma-ail gaiq-a nail yaqlaol teevq gaq, Yeiqsul bhai laiq dal khi iqthaiq nail ngaol.
24 Silmoq Bheiqtuvluv-i mail yaqlaol al gaq bhai aqlavq dao bhiq khi, “Khaq sil gaq bhai ge movq nail-aiq dai, teevq pov naldaiq daiq yaoq” dai, ge bhiq-a nail ngaol.
25 Yaqlaol al gaq, Yeiqsul jaol nail phao gaolgai khi, “Heeqphaq-ol, khaq sil gaq bhai ge movq nail-aiq” dai, naldaiq-a nail ngaol.
26 Yeiqsul ge nail: “Ngal khaqmul oil khi jaltsoiq bhai thaoqsoil khi bivq naol. Ngaq-i mail bivq nail al gaq neq, ngaq-i mail ge nail al gaq ngaol” dai, ge bhiq-a nail ngaol. A bhai nee ngal-aq, aivq khaqmul oil khi, jaltsoiq bhai thaoqsoil khi, Silmoq Ilsaqgaqliqoq nail yaqyov Yuldav bhai bivq-a nail ngaol.
27 Khaqmul al bhai Yuldav oil gaq-al ngal neq, neivq Saqdaq aivq nail lavqkhoel bhai aol lai-a nail ngaol. “Naoq-i mail nl nail dai khi, lainq-ai thaq nail phaq bhai lavqtsail mail nl-ail yaoq” dai, Yeiqsul aivq bhai ge bhiq-a nail ngaol.
28 Khul khi mail Yeiqsul aivq bhai alhai ge bhiq nail meeq dai, kovqkhail bhai aoq jaoq jaoq nail tsaol-aq yaoq juq yaoq neq, maq heeq nia-ail.
29 Yuldav neq, phul baivluvq aqheel thaoq-nq thaq nail gaq ngel-i mail, Yeiqsul aivq bhai khoel khi, Bhaoqaiq lav sav nail lavqkhoel bhai yuq nail phaq maq ngel haq neq, haq yaq aoq yaq bhai bivq nail teevq phaq ganav bhi ul ail nail khul-il dai, yaqlaol teevq gaq ganav juq, noeq nail ngaol.
30 Yuldav neq, khaqmul al khoeq oil khi dov ail-a nail ngaol. Yanq al yanq neq, hul-iq tsilma ngaol.
Daoq aqsivq teevq daoq bivq-a nail ganl
31 Yuldav dov ail jel-u phao, Yeiqsul ge nail: “Niil aq-il Tsaol-aq nail Yaqyov seiqleiq khaoqsail ya-aoq nail ngaol. Miqyail iqsanl aivq bhaqda nee seiqleiq khaoqsail ya-a nail ngaol.
32 Aivq bhaqda nee Miqyail seiqleiq khaoqsail ya nail phal-iq neq, Miqyail iqsanl, Yaqyov bhai seiqleiq khaoqsail bivq nail ngaol. Aivq teevq pov taivq-ail alhai nl nail ngaol.
33 Ngaq nail yaq juq-ol, ngal nuljuq nee mail maodai maq ya jaol yaoq-aol. Nuljuq ngaq bhai halpov nail ngaol. Yuldav nail tsaol-aq nail aqivq juq bhai ngaq-i mail ge bhiq-a nail daoq al, ngal nuljuq bhai gaoq ge lavq bhel. Ngal lai nail jaol duq bhai nuljuq maq lal nia-ail.
34 Niil aq-il, ngal nuljuq bhai daoq aqsivq teevq daoq bivq-ail ceevq naol. Teevq gaq nee teevq gaq gaiq-a yaoq. Ngal nuljuq bhai gaiq-a nail khe-ai, nuljuq teevq gaq nee teevq gaq ya gaiq-a nail ngaol.
35 Nuljuq teevq gaq nee teevq gaq gaiq-a nail phaq aol haq neq, nuljuq ngaq nail yaqlaol nial dai, tsaol-aq iqsanl mail heeq nia nail ngaol” dai, Yeiqsul ge bhiq-a nail ngaol.
Yeiqsul bhai maq heeq kivq-ail dai, Bheiqtuvluv jil nail ganl
36 Silmoq Bheiqtuvluv ge nail: “Heeqphaq-ol, naol khaq bha lai nail-aiq” dai, ge bhiq-u phao, Yeiqsul ge nail: “Ngaq-i mail lai nail dai khi, lainq-ai thaq nail bhai naol niil aq-il nee mail maq tsaothel lavq nia ail haq-al. Thailhai ngaol-aoq, yaqhao neq, tsaothel lavq kivq naol” dai, ge bhiq-a nail ngaol.
37 Bheiqtuvluv ge nail: “Heeqphaq-ol, khul khi mail, ngal naoq nail haoqnao niil aq-il nee mail maq tsaothel lavq kivq nail-aiq. Ngal naoq nail haqbhoil sildan tseq naol” dai, ge bhiq-a nail ngaol.
38 Yeiqsul ge nail: “Naol ngaq nail haqbhoil maldil sildan tseq naol laiq. Ngal naoq bhai maldil dai, ge lavq bhel. Yavphoil maq doil lal nail gaiqlaq bhai, ngaq bhai maq heeq kivq-ail dai, hail pov bhee dai, naol jil nail ngaol” dai, ge bhiq-a nail ngaol.