2
Gaqkhoel juq Paolluv bhai hav-a nail ganl
1 A bhai nee ngal-aq, tsel liq kovq bhee lal-u phao, ngal Tiltuv bhai hevq khi, Bhaqnaqbhal nee mail Yeiqlulsaqlaiq meenq bha gaoq lai-a nail ngaol.
2 Miqyail ngaq bhai phaodaiq lavq-a nail ngel-i mail, lai-a nail ngaol. Aqivq aqtsu juq nee aqtsi tsu dai, thaoqphuq khi, Yuldav nail tsaol-aq maq ngel nail juq bhai, lavqkhiq tsail nail geeqlaoq daoq cavq ail-a nail ganl, ngal ge bhiq-a nail ngaol. Ngaq-i mail nl jel lavq-a nail phaq khi niil aq-il nl thailthaiq nail phaq bhai aqnieivq-ail maq bhiq pevq-ail movq-i mail, alhai ge bhiq-a nail ngaol.
3 Ngaq-ai nee mail jaol nail Tiltuv neq, Heiqlaqsal tsaol-aq ngaol-aoq, aivq bhai bavkov uqjaq oev bhiq yaoq dai, yu maq ge-ail.
4 Yeiqsul Khali bhaqda nee ngadao juq-i mail ya-a nail jel-ail nail phaq bhai khoiq heldaiq khi, ngadao juq bhai aoldaoq kovqdaoq bhai juq khi, aqyu juq nail kov-uvq bhai bhi jaol nail dai khi, tsaol-aq teevq pav ganav juq, nvjuq nail lavqkhoel bhai aqtsi tsu dai aol khoiq lal-a nail ngaol. “Nvjuq neq, nuljuq nail aqivq jaqbheq ngaol” dai, aqyu juq ge khi ngaol-aoq, maldil aqivq jaqbheq maq ngel-ail.
5 Lavqkhiq tsail nail geeqlaoq daoq nail maldil tsaq nail phaq nuljuq nail lavqkhoel bhai ivq dai, nvjuq aqyu juq nail daoq bhai teevq peivq-ail maq hav bhoel-ail.
6 Aqivq aqtsu bhi jiovq-ai thaq nail tsaol-aq al juq iqsanl, ngaq nail haqbhoil teevq-eel nul neq, thoi dai dai-ail bheeq-n nail dai, maq noeq-ail. Khul khi mail dai ngal-aq neq, Miqyail neq, tsaol-aq yaq bhai, lavqniil phao taivq-ail heldaiq khi dal nail maq ngel-ail. Aqivq aqtsu al juq neq, ngal cavq nail juq nee maqtsil, aljaiq khul teevq phaq-ail maq ge laoq lavq-al.
7 Al ovqtavq, Yuldav nail tsaol-aq bhai lavqkhiq tsail nail geeqlaoq daoq cavq bhiq yaoq dai, Miqyail Bheiqtuvluv bhai av bhiq-a nail khe-ai, yu nail jeq-e jaq-a bhai lavqkhiq tsail nail geeqlaoq daoq cavq bhiq yaoq dai, Miqyail ngaq bhai av lavq-a nail ngaol dai, aqyu juq heldaiq moel-a nail ngaol.
8 Khul khi mail dai ngal-aq neq, “Yuldav nail tsaol-aq nail haqbhoil ganl nl yaoq” dai, Bheiqtuvluv bhai alyaq bivq-a nail Miqyail, “Yu nail jeq-e jaq-a nail haqbhoil ganl nl yaoq” dai, ngaq bhai iqsanl, alyaq bivq lavq-a nail ngaol.
9 Ngaq bhai bivq lavq-a nail geeqlaoq bhai aqyu juq ya moel-u phao, Yaqkov, Bheiqtuvluv khi Yaolhaq, aqyu juq Bhaqnaqbhal nv-nvq gaq bhai aqlavq cavq lavq-a nail ngaol. Alhai khi lavq-a nail al neq, aqtsaoq tsaoq nail dai, ge movq nail ngaol. Aqyu juq neq, yu nail sivtavq bhai neema ivqdao dai aol nail aqivq jiovq nail juq ngaol. Nv-nvq gaq yu nail jeq-e jaq-a jaol nail bha ail nail bhai maqkhaiq, aqyu juq neq, Yuldav nail tsaol-aq jaol nail bha ail nail bhai maqkhaiq, maoqbhaoq nl tsaq-a nail ngaol.
10 Aqyu juq nail munl lavqkhoel khe, haq nail aoq nail tsaol-aq juq bhai thaq nioilpeivq lavq dei-eiq dai, aqyu juq nv-nvq gaq bhai hal-ail teevq-eel ngaol. Alhai nl nail neq, ngal iqsanl neema kev deedee nail ngaol.
Paolluv Aqdil-aoq meenq bhai jaol-u phao, Bheiqtuvluv bhai khaq-a nail ganl
11 Teevq pov, Bheiqtuvluv Aqdil-aoq meenq bhai kev lee-u phao, aivq-i mail nl nail teevq peivq-ail maq tsaq nail phaq bhaqlaoq kheq dai, dov lal-a nail ngel-i mail, ngal aivq bhai yu nail sivtavq nee khaq-a nail ngaol.
12 Khul khi mail dai ngal-aq neq, Yaqkov nail tsaol-aq juq maq kev lee-u phao neq, Bheiqtuvluv yu nail jeq-e jaq-a nee mail kovqkhail aoq jaoq jaoq thailthaiq nail ngaol. Thailhai ngaol-aoq, tsaol-aq al juq kev lee-u phao, Yuldav nail tsaol-aq maq ngel nail juq bhai iqsanl, bavkov uqjaq bhiq oev movq nail juq bhai geesil nail ngel-i mail, yu nail jeq-e jaq-a nee pav ail khi, aqtsaoq iqsanl maq tsaoq-ail jaol nail ngaol.
13 Yuldav nail tsaol-aq Khali yaq yaoq juq yaoq iqsanl, aivq khe-ai maq ngel nail phaq nl nail ngaol. Alheel ngel-i mail, Bhaqnaqbhal iqsanl aqyu juq khe-ai nl nail ngaol.
14 Aqyu juq lavqkhiq tsail nail geeqlaoq daoq maldil tsaq nail lavqkhoel bhai daolcoev dai, maq jaol nail bhai ngal ya moel-u phao, ngal aqyu juq iqsanl nail sivtavq bhai Bheiqtuvluv bhai niailhai ge bhiq-a nail ngaol: “Naol Yuldav nail tsaol-aq pevq khi ngaol-aoq, Yuldav nail tsaol-aq nail aol maq thaoq-ail, yu nail jeq-e jaq-a nail aol thaoq nail bhai, yu nail jeq-e jaq-a Yuldav nail tsaol-aq nail aol ya thaoq nail ngaol dai, khul khi mail aqyu juq bhai khoel nail-aiq” dai, ge bhiq-a nail ngaol.
Neema thaqtsaol nail bhaqda nee, tsaq nail daol nail tsaol-aq pevq lal nail ganl
15 Ngadao juq neq, doevq lee-u nee Yuldav nail tsaol-aq ngaol. Yu nail jeq-e jaq-a oeqbal yaq maq ngel-ail.
16 Ngadao Yuldav nail tsaol-aq pevq khi ngaol-aoq, Aoldaoq Kovqdaoq bhi nl lavq nail khe-ai nl-a nail ngel-i mail, tsaq nail daol nail tsaol-aq pevq lal nail maq ngel-ail. Yeiqsul Khali bhai neema thaqtsaol nail ngel-i mail taivq-ail pevq lal-a nail ngaol dai, ngadao juq heeq kivq nail ngaol. Ngadao juq iqsanl Khali bhai neema thaqtsaol nail ngel-i mail, tsaq nail daol nail tsaol-aq pevq lal dai, Yeiqsul Khali bhai neema thaqtsaol nail ngaol. Khul khi mail dai ngal-aq neq, aoldaoq kovqdaoq bhi nl lavq nail khe-ai nl-a nail ngel-i mail, tsaol-aq teevq gaq iqsanl tsaq nail daol nail tsaol-aq maq pevq lal nia-ail.
17 Khali bhaqda nee tsaq nail daol nail tsaol-aq pevq lal dai, ngadao juq halpov thailthaiq-u phao, ngadao juq oeqbal yaq ngaol dai, dov lal haq neq, Khali neq, oeqbal nail haqbhoil ganl nl nail gaq laiq. Maq ngel-ail dei-eiq.
18 Ngaq-i mail peiv ha-a nail aoldaoq kovqdaoq bhai ngal gaoq lav meeq-ail nul neq, ngal neq, aoldaoq kovqdaoq bhai nl bheeq-a nail tsaol-aq teevq gaq ngaol.
19 Khul khi mail dai ngal-aq neq, ngal Miqyail phao aqdoevq doevq kivq dai, aoldaoq kovqdaoq bhai juq khi, aoldaoq kovqdaoq phao sil-a nail ngaol.
20 Ngal Khali nee mail lavqyavq kovtavq bhai tavq heivq-a nail ngaol. Alheel ngel-i mail, niil aq-il ngal aqdoevq doevq nail neq, ngal doevq nail maq ngel-ail. Khali ngaq nail lavqkhoel bhai aqdoevq doevq nail ngaol. Niil aq-il ngal aqsivq haqjoil phao aqdoevq doevq nail neq, Miqyail nail Yaqyov bhai neema thaq tsaol khi doevq nail ngaol. Aivq neq, ngaq bhai gaiq-a khi, ngaq nail haqbhoil aivq nail aqmaol laol bhiq-a nail ngaol.
21 Ngal Miqyail nail geeqlaoq eeljaol bhai aqnieivq-ail maq bhiq pevq-ail. Aoldaoq kovqdaoq bhaqda nee tsaq nail daol nail tsaol-aq pevq lal-ail nul neq, Khali sil-a nail neq, aqnieivq ngaol.