6
Aqbhu aqma khi yaq juq doevq tavq nail ganl
1 Yaq juq-ol, Miqyail neema tsaq nail khe-ai, yovqgavq nail aqbhu aqma nail daoq naldaiq yaoq. Nuljuq alhai nl nail tsaq nail ngaol.
2 “Naoq nail aqbhu aqma bhai ev yaoq” dai, ge nail aoldaoq kovqdaoq niil daoq bhai naldaiq nail tsaol-aq juq bhai, Miqyail nail geeqlaoq bivq nail haqbhoil saljial jaq-ai thaq nail Aoldaoq Kovqdaoq iqmoeq khe daoq ngaol.
3 “Alhai ev haq neq, naol yaoq phaq yaoq-ao nee nail lavqkhoel bhai bhao lee ya lee khi, miltsaq kovtavq bhai aqdoevq doevq-u phao, yeel bhao yeel ya nail ngaol” dai, ge-ai thaq nail ngaol.
4 Aqbhu juq-ol, naoq nail yaq juq neema phail lal dai, thaq nl bhiq. Miqyail neema tsaq nail khe-ai, cavq bhiq cov bhiq khi, tsu eeq bhiq yaoq.
Yaqkav juq khi ilheel juq doevq tavq nail ganl
5 Yaqkav juq-ol, Khali nail daoq naldaiq nail khe-ai, miltsaq kovtavq bhai jaol nail yovqgavq nail ilheel nail daoq bhai neema daolcoev dai, geesil khi ev nail lavqkhoel nee naldaiq yaoq.
6 Ilheel ya moel dai taivq-ail nl hal khi, tsaol-aq neekhaol sil dai taivq-ail nl nail hal nail phaq thaq bhi pevq. Khali nail yaqkav pevq nail ngel-i mail neema kev nail lavqkhoel nee Miqyail neema tsaq dai nl yaoq hal yaoq.
7 Nuljuq yaqkav jiovq khi, ya nl thailthaiq nail ganl juq bhai, tsaol-aq yaq nail ganl nl bhiq nail khe-ai maq ngel nail, Miqyail nail ganl nl bhiq nail khe-ai lavqkhiq tsail tav dai, nl bhiq yaoq.
8 Yaqkav maqkhaiq, yaqkav maq ngel nail juq maqkhaiq, yovqgavq-i mail aqmeeq phaq nl-ai thaq nail khe-ai, Yeiqsul kovpavq bivq lavq naol dai, heeq kivq duq yaoq.
9 Ilheel juq-ol, alhai dul dai, nuljuq iqsanl yaqkav juq nail haqbhoil aqmeeq phaq nl bhiq yaoq. Aqyu juq bhai geesil lal heeq phaq-ail thaq nl bhiq. Nuljuq maqkhaiq, nuljuq nail yaqkav juq maqkhaiq, iqsanl mail teevq gaq khe-ai, nqtavq kovtavq khe jaol nail al gaq nail yaqkav pevq nail ngaol dai, heeq kivq yaoq. Aivq neq, yaoq gaq yaoq-ao nee bhai maivphaoq eeq nail nil nail maq tsel pav-ail.
Miqyail nail genl dev nail khen kha-ao
10 Haoqnao naosaq khe daoq neq, niailhai ngaol. Heeqphaq Yeiqsul nail lavqkhoel nee maqkhaiq, aivq nail gaq kav deedee nail bhaqaoq lavqkhoel nee maqkhaiq, gaq kav lal yaoq.
11 Neivq heeqphaq jalmul mul lal nail phaq bhai nuljuq gaq lai kivq dai, Miqyail-i mail bivq lavq-a nail khen kha-ao iqsanl mail doi yaoq.
12 Khul khi mail dai ngal-aq neq, ngadao neq, tsaol-aq yaq bhai genl dev nail maq ngel-ail. Maq moel kivq nail, uvthaiq nail juq nee maqkhaiq, bhaqaoq eeq nail juq nee maqkhaiq, niil yeel nail lavqkhoel aqnav-i mail uvthaiq nail juq bhai maqkhaiq, nqtavq miltsaq nail gaiqlaq bhai jaol nail neivq juq bhai maqkhaiq, genl dev nail ngaol.
13 Alheel ngel-i mail, haqeiv nail aqn aqyanq kev lee-u phao, nuljuq jaol ivq kivq khi, iqsanl mail nl gil khi ivqdao dai thulphaol kivq dai, Miqyail-i mail bivq lavq-a nail khen kha-ao iqsanl mail doi-nq thaq yaoq.
14 Maldil tsaq nail phaq jiovqpavq pavq nail khe-ai pavq khi, tsaq nail daol nail phaq doeqdaq duq khe-ai doi yaoq.
15 Neesal-ovq nail lavqkhiq tsail nail geeqlaoq daoq bhai, saiqnaov tsaoq nail khe-ai tsaoq-nq khi jaol yaoq.
16 Al ovqtavq, neivq Saqdaq-i mail bev-aivq lavq nail miqjaq tovq nail heeqnav maqtsoe bhai lav miv kivq dai, doeqdaq duq aqlavq bhai khaq mao iqsanl nieivq thaiq-ai thaq nail khe-ai, neema thaqtsaol nail phaq bhai khaq mao iqsanl nieivq thaiq-ai thaq yaoq.
17 Hevqkovq nail phaq pevq nail hail nail uqtsaoq tsaoq khi, Aqhaqlal Miqyail-i mail bivq lavq-a nail thaoma pevq nail Miqyail nail daoq bhai tuv thaiq-ai thaq yaoq.
18 Al juq iqsanl, Miqyail tsaojao-ai lavq dai, geeqlaoq hal nail lavqkhoel nee doi yaoq. Aqhaqlal Miqyail nail lavqkhoel khaq mao iqsanl geeqlaoq hal yaoq. Al ovqtavq, gaq maq bhaq mail aqgeel geel dai jaol khi, geeqlaoq hal yaoq. Miqyail nail tsaol-aq juq nail haqbhoil khaq mao iqsanl, geeqlaoq hal yaoq.
19 Ngal geesil nail neema maq aol dai, lavqkhiq tsail nail geeqlaoq daoq bhai tavq lai nail oil-uvq-ai thaq nail phaq, bhaqlaoq kheq dai cavq bhiq kivq dai, ngaq nail haqbhoil iqsanl geeqlaoq hal tsao yaoq.
20 Ngal geeqlaoq daoq al daoq nail haqbhoil jiqdan pevq nail ngel-i mail, thaonq bhai aol thailthaiq nail ngaol. Ngal geeqlaoq daoq al daoq cavq bhiq heeq phaq-ail tsaq nail khe-ai, geesil nail neema maq aol dai, cavq bhiq kivq dai iqsanl, ngaq nail haqbhoil geeqlaoq hal tsao yaoq.
Haoqnao naosaq khe daoq
21 Ngal khalhai nl thail hal thailthaiq nail ganl, nuljuq ya heeq kivq dai, ngal gaiq-a nail jaqbheq Duljil, nuljuq jaol nail bha lal kev-u phao, yaoq phaq yaoq-ao nee ge lavq naol. Aivq neq, Miqyail nail ganl nl nail lavqkhoel-ai, saljial ivq nail teevq gaq ngaol.
22 Nvjuq khalhai pevq nail bhai nuljuq ya heeq nia dai maqkhaiq, aivq nuljuq nail neema bhai gaq bhi kav lal dai maqkhaiq, ngal aivq bhai nuljuq jaol nail bha bhi lee naol.
23 Aqivq jaqbheq Khali yaq juq nail kovtavq bhai neesal-ovq nail phaq jiav dei-eiq. Al ovqtavq, Aqbhu Miqyail khi mail Heeqphaq Yeiqsul Khali-i mail bivq lavq-a nail goil nail gaiq-a nail phaq khi mail neema thaqtsaol nail phaq iqsanl jiav dei-eiq.
24 Ngadao nail Heeqphaq Yeiqsul Khali bhai khaq mao iqsanl, maq peivq maq boev-ail dai, gaiq-a nail tsaol-aq iqsanl nail kovtavq bhai geeqlaoq eeljaol jiav dei-eiq.