4
Miltsaq iqlaoq nail lavqkhoel bhai aol nail aqphoiq kav nail ganl
1 Miqyail nail geeqlaoq eeljaol bhaqda nee nvjuq bhai ganl niil bhi nl lavq-a nail ngel-i mail, nvjuq nail neema gaq maq bhaq-ail.
2 Nvjuq ganl niil nl-u phao, haqsil heeq phaq-ail tsaq nail oil-uvq-ai thaq nail phaq, teevq thal-iq nl naol dai, maq noeq-ail. Goiqbhaoq bhaoq nail maqkhaiq, Miqyail nail daoq bhai aqdeq bhiq deq-ail dai maqkhaiq, nvjuq nl naol dai iqsanl, maq noeq-ail. Maldil tsaq nail phaq bhai bhaqlaoq kheq dai phaodaiq bhiq nail lavqkhoel nee, Miqyail nail sivtavq-ai tsaol-aq iqsanl nail heeq nia nail neema bhai tsaq dai, nl nail ngaol.
3 Nvjuq-i mail cavq nail lavqkhiq tsail nail geeqlaoq daoq bhai he pheeq-ai thaq nail ngel haq neq, luq-ail seil-ail nail tsaol-aq nail haqbhoil taivq-ail he pheeq-ai thaq nail ngaol.
4 Miqyail pevq nail Khali nail seiqleiq khaoqsail bhaq dov nail lavqkhiq tsail nail geeqlaoq daoq neq, neema maq thaqtsaol nail tsaol-aq bhai maq ya bhaq bhiq dai, miltsaq niilniai uvthaiq nail gaq pevq nail neivq Saqdaq aqyu juq nail neema bhai navtsee dai, bhi pevq ail-a nail ngaol.
5 Nvjuq neq, yovqgavq nail ganl yovqgavq cavq nail cov nail maq ngel-ail. Yeiqsul Khali neq, Heeqphaq ngaol dai, cavq bhiq nail nee ovqtavq, Yeiqsul nail haqbhoil nvjuq nuljuq nail yaqkav pevq nail ganl cavq bhiq cov bhiq nail ngaol.
6 “Aqnav nail lavqkhoel bhai aqbhaq bhaq dov lal nail ngaol dei-eiq” dai, ge-ai thaq nail Miqyail neq, ngadao nail neema bhai aqbhaq bhaq lavq-a nail ngaol. Alheel ngel-i mail, Khali nail maivphaoq nee mail bhaq dov lee-a nail Miqyail nail seiqleiq khaoqsail bhai ngadao ya moel khi ya heeq kivq dai, aqbhaq bhaq lavq thailthaiq nail ngaol.
7 Aqphoiq phoiq deedee nail nlmaoq pevq nail seiqleiq khaoqsail al, miltsaq iqlaoq nail lavqkhoel bhai aol nail khe-ai, ngadao juq neq, miltsaq iqlaoq kheel teevq-eel ngaol. Alheel ngel-i mail, eeq deedee nail bhaqaoq al neq, nvjuq nail lavqkhoel nee dov lal-a nail maq ngel-ail. Miqyail nee mail dov lal-a nail ngaol dai, yu ya heeq nia nail ngaol.
8 Nvjuq yaoq phaq yaoq-ao nee lav tsoiq lal nail bhai ya daq khi ngaol-aoq, laol thaiq-ai lavq nail maq ngel-ail. Noeq-u maq dov khi ngaol-aoq, noeqthunq nail phaq ya-ai haq nail ngaol.
9 Khoeq lavq jiovq lavq nail bhai ya daq khi ngaol-aoq, Miqyail maq khaonq ha lavq-ail. Deeq tsuq lavq nail bhai ya daq khi ngaol-aoq, sil nail bhai kev dai, ya daq-a nail maq ngel-ail.
10 Yeiqsul nail aqdoevq doevq nail phaq nvjuq nail lavqkhoel bhai bhaqlaoq kheq dai dov lal dai, Yeiqsul nail sil nail phaq nvjuq nail aqmaol lavqkhoel bhai khaq mao iqsanl phi-nq thaq nail ngaol.
11 Khul khi mail dai ngal-aq neq, Yeiqsul nail doevq nail phaq neq, sil nia nail nvjuq nail aqmaol lavqkhoel-ai bhaqlaoq kheq dai dov lal nia dai, nvjuq aqdoevq doevq-u phao, Yeiqsul nail haqbhoil sil dai khaq mao iqsanl av bhiq nail bhai ya daq nail ngaol.
12 Alheel ngel-i mail, nvjuq nail lavqkhoel-ai sil nail phaq ganl nl nail ngaol. Thailhai ngaol-aoq, nuljuq nail lavqkhoel bhai neq, doevq nail phaq ganl nl nail ngaol.
13 “Ngal neema thaqtsaol nail ngel-i mail,
ge-ai thaq nail ngaol” dai,
Jalliq lavqkhoel bhai gevq-ai thaq nail khe-ai, nvjuq iqsanl alhai neema thaqtsaol khi ge nail ngaol.
14 Heeqphaq Yeiqsul bhai bhi doevq kovq lal-a nail gaq, nvjuq bhai iqsanl Yeiqsul nee mail bhi doevq kovq lal khi, nuljuq nee mail teevq gaq khe-ai, aivq nail sivtavq bhai nvjuq bhai bhi jaol lavq nail ngaol dai, nvjuq heeq kivq nail ngaol.
15 Al juq iqsanl mail nuljuq nail haqbhoil ngaol. Khul khi mail dai ngal-aq neq, Miqyail nail geeqlaoq eeljaol teevq n nee teevq n mao lal nail khe-ai, aivq bhai tsiqeeq nail tsaol-aq mao lal nail ngel-i mail, aivq seiqleiq khaoqsail ya nail ngaol.
16 Alheel ngel-i mail, nvjuq neema maq cov-ail. Nvjuq aqsivq haqjoil phao luq-ail seil-ail khi ngaol-aoq, aqhaqlal phao teevq n nee teevq n aqsivq pevq lal thailthaiq nail ngaol.
17 Niil teevq yanq nail lavqkhoel nvjuq-i mail ya daq nail juq neq, mao-ail nil mao-ail phai nail ngaol. Niil juq neq, mao-ail eeq mao-ail bhaq nail nqmaq maqluv halyeel ivq nail seiqleiq khaoqsail nvjuq nail haqbhoil nl lavq nail ngaol.
18 Nvjuq neq, moel lal nail juq bhai heldaiq nail maq ngel-ail. Maq moel lal nail juq bhai heldaiq nail ngaol. Moel kivq nail juq neq, teevq yanq taivq-ail jiav nail ngaol. Thailhai ngaol-aoq, maq moel kivq nail juq neq, nqmaq maqluv halyeel jiav nail ngaol.