6
Tsaol-aq sivq gaq bhai tsel dov-a nail ganl
1 Yanq al yanq nail lavqkhoel yaqlaol juq mao lal thailthaiq nail ngaol. Aq-u phao, Heiqlaqsal daoq ge nail Yuldav nail tsaol-aq juq neq, Heiqbhail tsaol-aq juq bhai daoq mao nail ngaol. Khul khi mail dai ngal-aq neq, yaoq n yaoq n nee mail jaqjaq daoldaol bhoil bhiq-u phao, aqyu juq nail miqtsiq miqma juq aqmeeq-ai maq ya nail ngel-i mail ngaol.
2 Aq-u phao, gaqkhoel tsel-nvq gaq yaqlaol juq iqsanl bhai khul jil khi ge bhiq-a nail: “Nvjuq Miqyail nail daoq cavq nail niil khaonq-ail ceevq khi, jaqjaq daoldaol bhoil bhiq nail neq, maq tsaq-ail.
3 Alheel ngel-i mail, aqivq jaqbheq juq-ol, nuljuq nail lavqkhoel bhai tsaol-aq sivq gaq tsel dov yaoq. Aqyu juq neq, aqmil aqmeeq dov nail tsaol-aq, Aqhaqlal Miqyail teevq bhee aol nail tsaol-aq khi mail, neenoeq neekha teevq bhee aol nail tsaol-aq ya pevq nail ngaol. Nvjuq aqyu juq bhai jaqjaq daoldaol bhoil bhiq nail ganl niil bhi nl naol.
4 Nvjuq neq, khaq mao iqsanl geeqlaoq hal hal-ail daoq cavq daoq cov cov naol” dai, ge bhiq-a nail ngaol.
5 Aqyu juq ge nail bhai munl al munl neema tsaq khi, tsaol-aq niil juq bhai tsel dov-a nail ngaol. Neema thaqtsaol nail neema teevq bhee aol khi, Meeqnail Haolnail Aqhaqlal iqsanl teevq bhee aol nail Saqteiqphaq khi mail Pillilpuv, Bhaolkhaoq, Nilgaqnaoq, Tilmoq, Bhaqmeiqnal khi mail, Aqdil-aoq meenq bhai jaol nail Nilgaolla, niil juq ngaol. Nilgaolla neq, yu nail jeq-e pevq khi, jel lal-u phao, Yuldav nail tsaol-aq nail aol thaoq-a nail ngaol.
6 Aqyu juq tsaol-aq al sivq gaq bhai gaqkhoel juq nail sivtavq bhai hel lavq-a nail ngaol. Gaqkhoel juq geeqlaoq hal khi, aqyu juq nail kovtavq bhai aqlavq bavq dav bhiq-a nail ngaol.
7 Miqyail nail daoq gaiq doi ail khi, Yeiqlulsaqlaiq meenq lavqkhoel bhai yaqlaol juq maodai mao lal khi Philma juq mee nia gaq iqsanl, neema thaqtsaol lal-a nail ngaol.
Saqteiqphaq bhai nieivq-a nail ganl
8 Saqteiqphaq neq, geeqlaoq eeljaol khi mail bhaqaoq teevq bhee aol khi, yu nail sivtavq bhai mao-ail eeq nail noeq-u maq dov nail phaq khi mail bhi heeq bhi moel nail phaq nl-a nail ngaol.
9 Aq-u phao, Khulleiqniq milkhaoq, Aqleiqsaqdul milkhaoq, Gillilciv milkhaoq khi mail Aqsil-aq milkhaoq bhai jaol nail bhuq ail-a nail Yuldav nail tsaol-aq nail uqhuq thaoq nail ilkhaol bhai tavq nail tsaol-aq juq, tsaoq thul lal khi, Saqteiqphaq nee mail jil pheel jil lul jaq-a nail ngaol.
10 Thailhai ngaol-aoq, aivq nail lavqkhoel bhai aol nail neenoeq neekha khi mail Aqhaqlal Miqyail bhaqda nee, aivq ge nail daoq bhai aqyu juq maq jil gaq nia-ail.
11 Aq-u phao, aqyu juq tsaol-aq teevq pav ganav juq bhai maoqbhaoq khoiq nl bhiq khi, niailhai bhi ge-a nail ngaol: “Tsaol-aq niil gaq neq, Molseiq bhai iqsanl, Miqyail bhai iqsanl, khal ge movq-ail ge nail bhai, nvjuq ya gaiq-a nail ngaol” dai, ge bhiq-a nail ngaol.
12 Milkhaoq yaq juq, aqivq aqtsu juq khi mail aoldaoq kovqdaoq cavq nail cov nail juq Saqteiqphaq bhai neema phail lal dai, aqyu juq mee nia phaq ge ge-ail gaq bhiq-a nail ngaol. A bhai nee ngal-aq, aqyu juq Saqteiqphaq bhai nieivq khi, maoqbhaoq nl nail munl munl ma nail sivtavq bhai hel-aivq-a nail ngaol.
13 Aqyu juq neq, maq tsaq nail salkhil khanq nail tsaol-aq juq bhai khul thaq-ai thaq nail ngaol. Salkhil khanq nail tsaol-aq al juq ge nail: “Tsaol-aq niil gaq neq, meeq nail haol nail uqhuq thaoq nail ilkhaol il ma bhai khi mail aoldaoq kovqdaoq nail ganl bhai khaq mao iqsanl, khal ge movq-ail ge nail ngaol.
14 Naqsaqlail meenq yaq Yeiqsul neq, uqhuq thaoq nail ilkhaol il ma niil il bhai peiv ha khi, Molseiq-i mail nvjuq bhai bhi thaoq khal leevq lavq-a nail aol bhai iqsanl, lav phal naol dai, aivq ge nail bhai nvjuq ya gaiq-a nail ngaol” dai, ge bhiq-a nail ngaol.
15 Aq-u phao, maoqbhaoq nl nail munl munl lao-ail, Saqteiqphaq bhai aqmeeq-ai heldaiq-u phao, aivq nail maivphaoq nqtavq gaqkhoel nail maivphaoq khe-ai dul nail bhai, ya moel-a nail ngaol.