3
المَشْلُولْ يِتْشْفَى
1 نْهَارْ مِالنْهَارَاتْ، مْشَى بُطْرُسْ ويُوحَنَّا لِلْهَيْكِلْ فِي وَقْتْ صْلَاةْ الثْلَاثَة مْتَاعْ العْشِيَّة.
2 وكَانْ بَحْذَا بَابْ الهَيْكِلْ الِّي يِتْسَمَّى بَابْ جْمِيلْ، رَاجِلْ مَشْلُولْ مِلِّي تُولِدْ، يْجِيبُوهْ النَّاسْ كُلْ يُومْ ويْحُطُّوهْ غَادِي ويُقْعُدْ يُطْلُبْ فِي الصَّدْقَة مِنْ عَنْدْ النَّاسْ الدَّاخْلِينْ.
3 ووَقْتِلِّي شَافْ بُطْرُسْ ويُوحَنَّا دَاخْلِينْ لِلْهَيْكِلْ، طْلَبْ مِنْهُمْ صَدْقَة.
4 يَاخِي خَزْرُولُوا بُطْرُسْ ويُوحَنَّا بِالڨْدَا وقَالُّو بُطْرُسْ: «أُخْزْرِلْنَا!».
5 خْزَرِّلْهُمْ، مَاشِي فِي بَالُو بِشْ يَاخِذْ مِنْهُمْ حَاجَة.
6 يَاخِي قَالُّو بُطْرُسْ: «لَا عَنْدِي فُضَّة ولَا ذْهَبْ، آمَا الِّي عَنْدِي نَعْطِيهُولِكْ: بْإِسْمْ يَسُوعْ المَسِيحْ النَّاصْرِي قُومْ وامْشِي!».
7 وشَدُّو مِنْ يِدُّو اليْمِينْ وقَوْمُو. وبِالوَقْتْ رَجْعِتْ القُوَّة فِي سَاقِيهْ وقْدَامُو.
8 ونَڨِّزْ ووْقِفْ وبْدَا يِمْشِي. ودْخَلْ مْعَاهُمْ لِلْهَيْكِلْ وهُوَّ يِمْشِي ويْنَڨِّزْ وطَايِرْ مِالفَرْحَة ويِحْمِدْ فِي اللَّهْ.
9 والحَاضْرِينْ الكُلْ شَافُوهْ يِمْشِي ويِحْمِدْ فِي اللَّهْ.
10 وعَرْفُوهْ الِّي هُوَّ الرَّاجِلْ المَشْلُولْ الِّي مِسْتَانِسْ يُقْعُدْ يُطْلُبْ قُدَّامْ بَابْ جْمِيلْ مْتَاعْ الهَيْكِلْ، يَاخِي بِهْتُوا وتْعَجْبُوا مِلِّي صَارْلُو.
بُطْرُسْ يُخْطُبْ فِي الهَيْكِلْ
11 وفِي الوَقْتْ الِّي كَانْ فِيهْ الرَّاجِلْ المَشْلُولْ شَادِدْ جْنَبْ بُطْرُسْ ويُوحَنَّا فِي أَقْوَاسْ الهَيْكِلْ المَعْرُوفَة بْأَقْوَاسْ سُلَيْمَانْ، تْلَمُّوا عْلِيهُمْ بَرْشَة نَاسْ وكَانُوا بَاهْتِينْ.
12 وَقْتِلِّي شَافْ بُطْرُسْ هَاذَا، قَالِلْهُمْ: «يَا بَنِي إِسْرَائِيلْ، عْلَاشْ بَاهْتِينْ مِلِّي صَارْ؟ وعْلَاشْ تُخْزْرُولْنَا تْقُولِشْ عْلِينَا أَحْنَا بْقُدْرِتْنَا وَلَّا بِالتَّقْوَى مْتَاعْنَا رَدِّينَا الرَّاجِلْ هَاذَا يِمْشِي؟
13 رَاهُو إِلَاهْ إِبْرَاهِيمْ وإِسْحَاقْ ويَعْقُوبْ، إِلَاهْ جْدُودْنَا، هُوَّ الِّي مَجِّدْ خَادْمُو يَسُوعْ، الِّي إِنْتُومَا سَلَّمْتُوهْ لِلْمُوتْ ونْكَرْتُوهْ قُدَّامْ بِيلَاطُسْ رَغْمِلِّي كَانْ يْحِبْ يْسَيْبُو.
14 إِنْتُومَا نْكَرْتُوا القُدُّوسْ الصَّالَحْ، وطْلَبْتُوا مِنْ بِلَاطُسْ بَاشْ يْسَامَحْ وَاحِدْ قَاتِلْ.
15 قْتَلْتُوا مَنْبَعْ الحَيَاةْ، آمَا اللَّهْ قَوْمُو مِالمُوتْ، وأَحْنَا شْهُودْ عْلَى هَاذَا.
16 والرَّاجِلْ هَاذَا الِّي تْشُوفُوا فِيهْ ولِّي تَعْرْفُوهْ رَجْعِتْلُو صَحْتُو عْلَى خَاطِرْ إِيمَانَّا بْإِسْمْ يَسُوعْ. الإِيمَانْ بْيَسُوعْ هُوَّ الِّي عْطَاهْ الصَّحَّة الكَامْلَة قُدَّامْكُمْ الكُلْ.
17 «آنَا نَعْرِفْ يَا خْوَاتِي، الِّي جَهْلْكُمْ هُوَّ الِّي خَلَّاكُمْ إِنْتُومَا وشْيُوخْكُمْ تِتْصَرْفُوا هَكَّا مْعَ المَسِيحْ.
18 آمَا هَكَّا، تَمِّمْ اللَّهْ الِّي وْحَى بِيهْ مِنْ قْبَلْ لِلأَنْبِيَاءْ الكُلْ، الِّي المَسِيحْ بِشْ يِتْعَذَّبْ.
19 مَالَا تُوبُوا وإِرْجْعُوا لِلَّهْ بَاشْ يِغْفْرِلْكُمْ ذْنُوبْكُمْ.
20 وتْجِيكُمْ أَيَّامَاتْ الفْرَجْ مِنْ عَنْدُو، ويَبْعْثِلْكُمْ مَرَّة أُخْرَى يَسُوعْ المَسِيحْ الِّي اخْتَارْهُولْكُمْ مِنْ قْبَلْ.
21 آمَا تَوَّا، لَازْمُو يُقْعُدْ فِي السْمَاء حَتَّى يْجِي الوَقْتْ الِّي يِتْصَلَّحْ فِيهْ كُلْ شَيْ، كِيمَا وْحَى اللَّهْ لِلأَنْبِيَاءْ الصَّالْحِينْ، مِنْ قْدِيمْ الزْمَانْ.
22 ومُوسَى قَالْ: "الرَّبْ إِلَاهْكُمْ بِشْ يِبْعْثِلْكُمْ نَبِيْ كِيفِي مِنْ بِينْ خْوَاتْكُمْ. إِسْمْعُوا كْلَامُو فِلِّي يْقُلْكُمْ عْلِيهْ الكُلْ.
23 آمَا الِّي مَا يِسْمَعْشْ كْلَامُو رَاهُو بِشْ يِتِمْحَى مِالشَّعْبْ".
24 وزَادَا الأَنْبِيَاءْ الكُلْ، مِنْ صَمُوئِيلْ حَتَّى لِلِّي جَاوْ بَعْدُو، تْنَبْؤُوا عَالأَيَّامْ هَاذِي.
25 وإِنْتُومَا وْلَادْ الأَنْبِيَاءْ هَاذُومَا ووْلَادْ العَهْدْ الِّي عَمْلُو اللَّهْ مْعَ جْدُودْنَا، وَقْتِلِّي قَالْ لْإِبْرَاهِيمْ: "بِشْ نْبَارِكْ شْعُوبْ الأَرْضْ الكُلْ عْلَى طْرِيقْ ذِرِّيتِكْ".
26 واللَّهْ قَيِّمْ خَادْمُو وبْعَثْهُولْكُمْ لِيكُمْ إِنْتُومَا الأُولَانِينْ، بَاشْ يْبَارِكُّمْ ويْخَلِّي كُلْ وَاحِدْ فِيكُمْ يِرْجَعْ عَالشَّرْ الِّي يَعْمِلْ فِيهْ».