25
“Heeqphaq Gailsaq jaol nail bha bhi ail lavq yaoq” dai, Paolluv hal nail ganl
1 Heeqphaq Bheiqthul milkhaoq al khaoq bhai kev lee-a nail hail n bhee lal-u phao, Gailsaqlil meenq nee mail Yeiqlulsaqlaiq meenq bha lai-a nail ngaol.
2 Aq-u phao, Philma juq khi Yuldav tsaol-aq nail aqivq aqtsu Paolluv nail ganl heeqphaq Bheiqthul bhai, yalkhaq ge lai-a nail ngaol.
3 Aqyu juq nail maivphaoq bhai heldaiq khi, Paolluv bhai Yeiqlulsaqlaiq meenq bha teevq pov bhi hevq ha lal nail haqbhoil, hal nail ngaol. Gailphail bhai lovq khi, Paolluv bhai heivq nail haqbhoil, aqyu juq lainq gil-ai thaq nail ngaol.
4 Thailhai ngaol-aoq, Bheiqthul ge nail: “Paolluv bhai Gailsaqlil meenq nail thaonq bhai laol-ai thaq nail ngaol. Ngal iqsanl, maq maoq lal mail, a bhai kovq ail nail ngaol.
5 Tsaol-aq al gaq-i mail nl laiq thaq nail phaq jiav nail phal-iq neq, nuljuq nail aqivq aqtsu juq ngaq-ai nee mail lee khi, yalkhaq ge lee yaoq” dai, ge bhiq-a nail ngaol.
6 Bheiqthul Yeiqlulsaqlaiq meenq bha goiq n tsel n bhee dai, gaoq jaol khi, Gailsaqlil meenq bha kovq ail-a nail ngaol. Yaoq n yaoq aivq yalkhaq dal nail doiqbev bhai jaoldeel khi, Paolluv bhai bhi hel lavq-a nail ngaol.
7 Paolluv kev lal-u phao, Yeiqlulsaqlaiq meenq nee mail lee-a nail Yuldav nail tsaol-aq juq aivq nail teevq jaoq thulphaol khi, aivq laiq deedee nail ganl mee nia phaq ge nail ngaol. Thailhai ngaol-aoq, aqyu juq-i mail ge nail al juq neq, salkhil maq jiav-ail.
8 A bhai nee ngal-aq, Paolluv ge kovq bhiq-a nail: “Yuldav nail tsaol-aq nail aoldaoq kovqdaoq bhai maqkhaiq, uqhuq thaoq nail ilkhaol il ma bhai maqkhaiq, Lolmav milkhaoq bhai maqkhaiq, ngaq-i mail nl bheeq-ai thaq nail teevq phaq iqsanl, maq jiav-ail” dai, ge bhiq-a nail ngaol.
9 Thailhai ngaol-aoq, Bheiqthul neq, Yuldav nail tsaol-aq nail sivtavq bhai aqmil ya movq nail ngel-i mail, Paolluv bhai ge bhiq-a nail: “Naol Yeiqlulsaqlaiq meenq bha lai khi, ngaq nail sivtavq bhai ganl niil ganl nee yalkhaq dal movq-ail laiq” dai, naldaiq bhiq-a nail ngaol.
10 Paolluv ge nail: “Heeqphaq Gailsaq nail yalkhaq dal nail doiqbev sivtavq bhai ngal thulphaol thailthaiq nail ngaol. Ngaq bhai niilniai yalkhaq ge nail tsaq nail ngaol. Naol heeq nia nail khe-ai, Yuldav nail tsaol-aq juq nail kovtavq bhai ngaq-i mail nl laiq-a nail khul teevq phaq iqsanl maq jiav-ail.
11 Ngal sil heeq phaq-ail tsaq nail laiq nail phaq nl thaq nail nul neq, al bhai bhi jel-ail lavq yaoq dai, ngal maq hal-ail. Thailhai ngaol-aoq, aqyu juq ngaq nail kovtavq bhai oeqbal halpov nail thoil maq tsaq haq neq, tsaol-aq teevq gaq iqsanl, aqyu juq nail aqlavq lavqkhoel bhai ngaq bhai maq av bhiq nia-ail. Heeqphaq Gailsaq jaol nail bha yalkhaq bhi dal-ail lavq yaoq dai, ngal hal nail ngaol” dai, ge bhiq-a nail ngaol.
12 Aq-u phao, Bheiqthul neq, aivq bhai neenoeq needul bivq nail juq nee mail maoqbhaoq nl khi, niailhai ge kovq bhiq-a nail ngaol: “Heeqphaq Gailsaq-i mail yalkhaq bhi dal-ail lavq yaoq dai, naol hal nail ngel-i mail, naoq bhai Gailsaq jaol nail bha bhi lai naol” dai, ge bhiq-a nail ngaol.
Heeqphaq Aqgilpav khi Bheiqlaqnil nail sivtavq bhai Paolluv bhai hel-aivq-a nail ganl
13 Mao-ail maq maoq lal mail, heeqphaq Aqgilpav khi mail aivq nail al-ivq Bheiqlaqnil, Bheiqthul bhai hav nail dai khi, Gailsaqlil meenq bhai lee-a nail ngaol.
14 Aqyu nvq mail a bhai mee nia n jaol kel lavq-u phao, Bheiqthul-i mail Aqgilpav bhai Paolluv nail ganl niailhai ge bhiq-a nail ngaol: “Heeqphaq Peiqlil-i mail niilniai thaonq bhai laol-ail ceevq-a nail tsaol-aq teevq gaq jaol nail ngaol.
15 Ngal Yeiqlulsaqlaiq meenq bha lal-u phao, Philma juq khi mail Yuldav tsaol-aq nail aqivq aqtsu juq aivq nail ganl ngaq bhai ge lavq khi, aivq bhai yalkhaq dal ceiv khi heivq yaoq dai, ngaq bhai hal nail ngaol.
16 Thailhai ngaol-aoq, ngal aqyu juq bhai niailhai ge bhiq-a nail ngaol: ‘Nvjuq Lolmav tsaol-aq nail aol neq, niailhai jiav nail ngaol: Oeqbal thaq nail bhai ya daq thailthaiq nail gaq, oeqbal thaq nail tsaol-aq juq nee jaol khi, oeqbal thaq nail ganl al maq ge daiq bhiq-u kev dai, khul gaq bhai maqkhaiq yu nail aqlavq lavqkhoel bhai maq av bhiq-ail’ dai, ge bhiq-a nail ngaol.
17 Aqyu juq niai kev lee-u phao, lavqtsail mail yaoq n yaoq yalkhaq dal nail doiqbev bhai jaoldeel lai khi, tsaol-aq al gaq bhai bhi hel lavq nail haqbhoil, ngal daoq bivq-a nail ngaol.
18 Aivq bhai yalkhaq ge movq nail juq thul lal khi ge nail ngaol. Thailhai ngaol-aoq, ngaq-i mail noeq-ai thaq nail laiq nail phaq teevq phaq iqsanl, maq ge dol lavq-al.
19 Aqyu juq ge nail al neq, aqyu juq nail uqhuq thaoq nail aolsaolkovq nail ganl khi, sil jel-a nail Yeiqsul dai khul nail gaq nail ganl nee taivq-ail jil pheeljaq nail ngaol. Yeiqsul al gaq doevq nail ngaol dai, Paolluv ge nail ngaol.
20 Ganl al juq bhai khalhai peivtsel heeq meeq dai, ngal maq noeq duq kivq nail ngel-i mail, ‘Yeiqlulsaqlaiq meenq bha lai khi, yalkhaq ge lai naol laiq’ dai, Paolluv bhai naldaiq-a nail ngaol.
21 Thailhai ngaol-aoq, aivq bhai aqmeeq-ai lovqphail lavq khi, heeqphaq Gailsaq-i mail yalkhaq bhi dal ail lavq yaoq dai, hal nail ngel-i mail, heeqphaq Gailsaq jaol nail bha maq hevq ha ail-u kev dai, aivq bhai aqmeeq-ai lovqphail nail haqbhoil daoq bivq-ai thaq nail ngaol” dai, ge bhiq-a nail ngaol.
22 Aqgilpav ge nail: “Ngal iqsanl, tsaol-aq al gaq daoq ge nail bhai, gaiq movq-ail nial” dai, ge bhiq-a nail ngaol. “Niaohao ya gaiq nail ngaol” dai, Bheiqthul ge kovq bhiq-a nail ngaol.
23 Yaoq n yaoq, Aqgilpav khi Bheiqlaqnil aqyu nvq mail, seiqleiq khaoqsail teevq bhee aol nail lavqkhoel nee teevq gaq khe-ai, genl dev nail juq bhai uvthaiq nail aqivq juq khi, meenq lavqkhoel bhai jaol nail aqivq aqtsu juq nee mail, yalkhaq dav nail haol lavqkhoel bhai, aol lai-a nail ngaol. Aq-u phao, Bheiqthul-i mail daoq bivq khi, Paolluv bhai bhi hevq bhoel lavq-a nail ngaol.
24 Aq-u phao Bheiqthul ge nail: “Heeqphaq Aqgilpav khi mail niai jaoldeel-nvq thaq nail tsaol-aq juq-ol, niil gaq bhai heldaiq daiq. Ngal Yeiqlulsaqlaiq meenq bha jaol-u phao maqkhaiq, niai jaol-u phao maqkhaiq, niil gaq neq, aqdoevq doevq nail maq geel-nvq-ail dai, Yuldav nail tsaol-aq aivq nail ganl, mailma-ail ge nail ngaol.
25 Thailhai ngaol-aoq, aivq bhi sil nail haqbhoil yalkhaq dal kivq dai, aivq-i mail nl bheeq thaq nail teevq phaq iqsanl, ngal maq halpov moel kivq nail nee ovqtavq, eeq deedee nail heeqphaq Gailsaq nail sivtavq bhai, yalkhaq bhi dal-ail lavq yaoq dai, Paolluv ngaq bhai hal nail ngel-i mail, aivq bhai bhi hevq ha lai nail haqbhoil, ngal noeqceiv-ai thaq nail ngaol.
26 Thailhai ngaol-aoq, heeqphaq Gailsaq jaol nail bha aivq nail ganl khul teevq phaq-ail gevq bhiq nail phaq maq jiav-il. Alheel ngel-i mail, aivq bhai peivtsel gaq-u phao, aivq nail ganl ngal haoqgavq gevq bhiq kivq dai, duq lal nail haqbhoil nuljuq nail sivtavq bhai taivq-ail maqtsil heeqphaq Aqgilpav nail sivtavq bhai, aivq bhai hel lavq-a nail phaq pevq nail ngaol.
27 Khul khi mail dai ngal-aq neq, thaonq bhai aol nail tsaol-aq teevq gaq ganav bhai bhi ail-u phao, yu aivq nail kovtavq bhai oeqbal thaq nail ganl, haoqgavq aqmeeq-ai maq gevq bhoel bhiq haq neq, teevq peivq-ail maq tsaq-ail dai, ngal noeq nail ngaol” dai, Bheiqthul ge bhiq-a nail ngaol.