21
Paolluv Yeiqlulsaqlaiq meenq bha ail-a nail ganl
1 Nvjuq aqyu juq nee pav-ail gaq-u phao, laovq jeeq khi Gaolsav eeljaol laol-n bhai daolcoev dai, ail-a nail ngaol. Yaoq n yaoq Laolduv eeljaol laol-n bhai ail kev khi, a bhai nee ngal-aq, Bhaqdaqlal meenq bhai ail-a nail ngaol.
2 Philnilsav milkhaoq bhai ail nail laovq teevq laovq bhai thaoqphuq khi, jeeq khi ail-a nail ngaol.
3 Gulbhaqlul eeljaol laol-n moel lal nail bhai ail kev-u phao, pul-nvq phao Sulliv milkhaoq phao ail-a nail ngaol. Laovq al laovq Dullu meenq bhai yalkav bavq dov nail ngel-i mail, nvjuq a bhai naq-a nail ngaol.
4 Aqivq jaqbheq Khali yaq juq bhai a bhai ya moel khi, aqyu juq nee mail sivq n jaol-a nail ngaol. Aqhaqlal Miqyail bhai juq nail lavqkhoel nee, Paolluv bhai, “Yeiqlulsaqlaiq meenq bha thaq lai” dai, aqyu juq ge nail ngaol.
5 Thailhai ngaol-aoq, nvjuq aqyu juq nee mail sivq n jaol khi, iqmoeq phao ail-a nail ngaol. Aqyu juq khi aqyu juq nail miqsaol yovyaq iqsanl mail, meenq nee mail iqyaq iqma laol dai bha kev dai, nvjuq bhai hevq ha lee khi, nvjuq iqsanl mail a bhai peevqceevq kovdoiq doiq khi geeqlaoq hal-a nail ngaol.
6 A bhai nee ngal-aq, teevq gaq nee teevq gaq geeqlaoq eeq daoq cavq-ail ceevq khi, nvjuq laovq lavqkhoel bhai aol ail-u phao, aqyu juq neq, ilkhaol phao kovq lai-a nail ngaol.
7 Dullu meenq nee laovq jeeq khi Bhaqdaolleiq meenq bhai nvjuq ail kev-a nail ngaol. A bhai jaol nail aqivq jaqbheq Khali yaq juq bhai thaoqphuq khi, aqyu juq nee mail teevq n jaol-a nail ngaol.
8 Yaoq n yaoq gaoq dov ail khi, Gailsaqlil meenq bhai ail kev-a nail ngaol. Pillilpuv dai khul nail lavqkhiq tsail nail geeqlaoq daoq cavq bhiq nail gaq nail ilkhaol bhai nvjuq yavq-a nail ngaol. Yeiqlulsaqlaiq meenq lavqkhoel bhai ganl bhi tsaojao-ai nail haqbhoil tsaol-aq sivq gaq bhai tsel dov-u phao, aivq iqsanl aol nail ngaol.
9 Aivq neq, Miqyail nail haqbhoil gedan nail kovpavq ya khi maq maol ail haq nail yaqmiq liq gaq jaol nail ngaol.
10 Yuldav milkhaoq bhai jaol nail, Aqgaqbhul dai khul nail, Miqyail nail haqbhoil gedan nail gaq kev lee-u phao, nvjuq a bhai jaol-a nail neq, maoq lal-aoq nail ngaol.
11 Nvjuq jaol nail bha aivq lee khi, Paolluv nail jiovqpavq oil khi, yovqgavq nail aqkhil aqlavq bhai pheethaiq khi niailhai ge nail ngaol: “Jiovqpavq niil nail aqheel bhai, Yeiqlulsaqlaiq meenq bha jaol nail Yuldav nail tsaol-aq juq niailhai pheethaiq khi, yu nail jeq-e nail aqlavq lavqkhoel bhai av bhiq nail ngaol dai, Meeqnail Haolnail Aqhaqlal ge nail ngaol” dai, ge bhiq-a nail ngaol.
12 Daoq al daoq bhai nvjuq ya gaiq-u phao, nvjuq khi a bhai jaol nail tsaol-aq juq Paolluv bhai: “Yeiqlulsaqlaiq meenq bha thaq ail-oq” dai, hal-a nail ngaol.
13 Thailhai ngaol-aoq, aivq ge nail: “Khul khi mail, nuljuq nioil nioil-ail khi ngaq nail neema tsaoq pav ail-u khe-ai, nl lavq nail-aiq. Yeiqlulsaqlaiq meenq bha yu-i mail bhi pheethaiq nail nee maqtsil, Heeqphaq Yeiqsul nail haqbhoil a bhai sildan nail bhai kev dai, ngal lainq-ai thaq nail ngaol” dai, ge bhiq-a nail ngaol.
14 Nvjuq aivq bhai maq ge phaoq kivq nail ngel-i mail, “Miqyail neema tsaq nail khe-ai pevq lal dei-eiq” dai, ge khi aqtsi tsu dai, jaol-a nail ngaol.
15 A bhai micil tsaq dai jaol gaq-u phao, nvjuq yalkav lainq khi, Yeiqlulsaqlaiq meenq bha ail-a nail ngaol.
16 Gailsaqlil meenq bhai jaol nail yaqlaol teevq pav ganav juq nvjuq nail haoqnao tsaothel leevq khi, nvjuq-i mail yavq lai nail Maqnaqsoq dai mil-ai thaq nail gaq nail ilkhaol bhai, nvjuq bhai hevq ha lal lavq-a nail ngaol. Aivq neq, Gulbhaqlul eeljaol laol-n bhai jaol khi, yaqlaol pevq lal-a nail, maoq lal-aoq nail ngaol.
Yaqkov jaol nail bha Paolluv nalga ail-a nail ganl
17 Nvjuq Yeiqlulsaqlaiq meenq bha ail kev-u phao, aqivq jaqbheq Khali yaq juq, nvjuq bhai lavqkhiq teevq tsail hav lavq-a nail ngaol.
18 Yaoq n yaoq Paolluv nvjuq aqivq aqtsu juq nail lavqkhoel bhai aol nail Yaqkov jaol nail bha nalga ail-a nail ngaol. Aq-u phao, Khali yaq munl nail kovtavq bhai aqivq aqtsu jiovq nail al juq iqsanl mail, a bhai jil lee-a nail ngaol.
19 Paolluv aqyu juq bhai daoq tsaoq phuq khi, aivq bhai juq khi Miqyail yu nail jeq-e jaq-a juq nail haqbhoil khalhai nl khalhai hal-a nail ganl, teevq phaq gil haq teevq phaq dai, ge bhiq-a nail ngaol.
20 Aivq alhai ge daiq bhiq gaq-u phao, aqyu juq iqsanl mail Miqyail bhai tsiqeeq nail ngaol. Thailhai ngaol-aoq, aqyu juq Paolluv bhai niailhai ge bhiq-a nail ngaol: “Jaqbheq Paolluv-ol, neema thaqtsaol nail tsaol-aq pevq lal-a nail Yuldav nail tsaol-aq khadai meel-nvq gaq jaol khi, aqyu juq iqsanl aoldaoq kovqdaoq bhai khadai dai-ail neema kev nail dai, naol heeq nia nail ngaol.
21 Yu nail tsaoljeq nail milkhaoq juq nail lavqkhoel bhai khal jaol nail Yuldav tsaol-aq juq bhai, Molseiq nail aoldaoq kovqdaoq bhai khaonq dai, naol cavq bhiq cov bhiq-a nail bhai, aqyu juq ya gaiq-a nail ngaol. Al ovqtavq, aqyu juq nail yaq juq bhai bavkov uqjaq maq oev bhiq mail, Yuldav nail tsaol-aq nail aolsaolkovq bhai maq tsaothe mail doevq nail haqbhoil iqsanl, naol cavq bhiq cov bhiq-a nail ganl, aqyu juq ya gaiq-a nail ngaol.
22 Naol niai kev lee-aoq nail ganl, aqyu juq ya gaiq-ao nail neq, aqduq bhao nail ngaol. Khalhai khi heeq” dai, ge bhiq-a nail ngaol.
23 Aqyu juq gaoq ge nail: “Nvjuq naoq bhai niailhai bhi nl movq-ail nial. Daoqma saljial jaq thailthaiq nail tsaol-aq liq gaq niai jaol nail ngaol.
24 Aqyu juq nee mail lai khi, aqmaol haol lal nail aol nl lai yaoq. Aqyu juq uqhuq tsailkheel he ha nia dai, aqyu juq nail haqbhoil aqphoiq bivq yaoq. Alhai nl gaq haq neq, naoq nail ganl yu mail khal ge nail khe-ai maq ngel lao thaq-il dai, yaoq gaq yaoq-ao nee heeq nia nail nee ovqtavq, naol iqsanl Molseiq nail Aoldaoq Kovqdaoq bhai tsaothe khi doevq nail bhai aqyu juq ya moel nail ngaol.
25 Neema thaqtsaol lal-a nail yu nail jeq-e jaq-a nail haqbhoil maoqbhaoq nl khi, aqyu juq bhai haoqgavq niailhai gevq bhiq jel-aoq nail ngaol. Thaoqphaoq aqma maolkhoel bhai danq bhiq-a nail jaqjaq daoldaol jaq nail maqkhaiq, aqsivq jaq nail maqkhaiq, phee heivq thaq nail haqjoil jaq nail maqkhaiq, khaqmiq sev nail maqkhaiq, niil juq lao nail tsaq nail ngaol” dai, aqyu juq Paolluv bhai ge bhiq-a nail ngaol.
26 A bhai nee ngal-aq, Paolluv tsaol-aq al liq gaq bhai khul khi, yaoq n yaoq aqyu juq nee mail aqmaol lav haol nail aol nl lai-a nail ngaol. Uqhuq thaoq nail ilkhaol il ma nail lavqkhoel bhai aivq aol lai khi, aqyu juq aqmaol lav haol nail aol nl gil nail aqn ge bhiq-a nail ngaol. Aq-u n-gaol kev lal haq neq, yaoq gaq yaoq-ao nee nail haqbhoil laol bhiq nail phaq jiav nail ngaol.
Uqhuq thaoq nail ilkhaol il ma nail lavqkhoel bhai Paolluv bhai nieivq-a nail ganl
27 Aqmaol lav haol nail aol nl-a nail sivq n bhee lal-aiq nail khi-u phao, Aqsil-aq milkhaoq nee lal-a nail Yuldav nail tsaol-aq juq, uqhuq thaoq nail ilkhaol il ma nail lavqkhoel bhai Paolluv bhai ya moel-a nail ngaol. Aqyu juq tsaol-aq munl munl ma bhai neema lav phail khi, Paolluv bhai nieivq ail-a nail ngaol.
28 Aqyu juq gul khi ge nail: “Ilsaqleiqlal nail tsaol-aq juq-ol, tsaojao-ai lee yaoq. Tsaol-aq niil gaq khaq bhai maq bhao ail doi khi, Ilsaqleiqlal nail tsaol-aq maqkhaiq, Molseiq nail aoldaoq kovqdaoq maqkhaiq, uqhuq thaoq nail ilkhaol il ma niilniai maqkhaiq, neejiav jiav lal dai, cavq cavq-ail tsao nail ngaol. Niil thal khe pov neq, uqhuq thaoq nail ilkhaol il ma nail lavqkhoel bhai kev dai, yu nail jeq-e hevq bhoel lavq khi, meeq nail haol nail jaol duq niil dao bhai lav jiivq lav cavq lal thaq nail ngaol” dai, gul-a nail ngaol.
29 Eilpheilsu meenq bhai jaol nail Daqlolbheiq dai mil-ai thaq nail teevq gaq, Paolluv nee mail meenq lavqkhoel bhai tsao nail bhai iqmoeq-u n-gaol, aqyu juq moel-ai thaq nail jiav nail ngel-i mail, Paolluv-i mail aivq bhai uqhuq thaoq nail ilkhaol il ma lavqkhoel bhai hel lavq thaq nail khul-il dai, noeq khi alhai ge nail phaq pevq nail ngaol.
30 Meenq meenq lao-ail suqsaq lal khi, tsaol-aq munl munl lao-ail tsaol lavq khi, Paolluv bhai nieivq thaiq khi uqhuq thaoq nail ilkhaol il ma nail lavqniil phao hevq dol leevq-a nail ngaol. A bhai nee ngal-aq, uqhuq thaoq nail ilkhaol il ma nail lolgov bhai teevq pov taivq-ail lolgov ngaoq pheeq-a nail ngaol.
31 Tsaol-aq munl munl ma al juq Paolluv bhai heivq nail dai khi, laijai nail ngaol. Aq-u phao, Yeiqlulsaqlaiq meenq meenq lao-ail suqsaq thailthaiq nail ganl, Lolmav genl dev nail teevq hinl gaq bhai heldaiq nail aqivq gaq jaol nail bha gaiq kev lai-a nail ngaol.
32 Genl dev nail teevq hinl gaq nail aqivq al gaq, genl dev teevq yal gaq nail aqivq juq khi genl dev yaq juq hevq khi, teevq pov taivq-ail tsaol-aq munl munl ma jil lai thaq nail dao bhai tsaol-aivq-a nail ngaol. Aivq genl dev yaq juq hevq khi lee-a nail bhai tsaol-aq al juq ya moel-u phao, Paolluv bhai dee thailthaiq nail nee, naq lai-a nail ngaol.
33 Genl dev nail teevq hinl gaq nail aqivq al gaq Paolluv jaol nail bha ail khi, aivq bhai nieivq khi hailcav nvq deeq oil khi, pheethaiq yaoq dai, daoq bivq-a nail ngaol. A bhai nee ngal-aq, “Tsaol-aq niil gaq khaq sil gaq. Aivq khul khi thaq nail-aiq” dai, naldaiq-a nail ngaol.
34 Tsaol-aq munl al munl teevq gaq teevq phaq gul gul-ail suqsaq nail ngel-i mail, genl dev nail teevq hinl gaq nail aqivq al gaq maq naldaiq heeq nia-ail khi, Paolluv bhai genl dev nail juq jaol nail ilkhaol bhai hel-aivq nail haqbhoil, aivq nail tsaol-aq juq bhai daoq bivq-a nail ngaol.
35 Paolluv thaoqjoe pavqteivq bhai lai kev-u phao, tsaol-aq munl al munl aivq bhai deeq nail dai khi, mailma-ail laijai nail ngel-i mail, genl dev nail juq-i mail aivq bhai tsiq khi ail-a nail ngaol.
36 Tsaol-aq munl al munl, “Aivq bhai heivq yaoq” dai, gul gul-ail, aivq nail haoqnao tsaothel lavq-a nail ngaol.
Paolluv tsaol-aq munl munl ma bhai daoq ge tsaoq nail ganl
37 Genl dev nail juq Paolluv bhai genl dev nail juq jaol nail ilkhaol lavqkhoel bhai hevq bhoel laivq nail khi-u phao, Paolluv genl dev nail teevq hinl gaq nail aqivq al gaq bhai ge bhiq-a nail: “Ngal naoq bhai daoq ge tsaoq movq-il.” Aqivq al gaq ge nail: “Naol Heiqlaqsal daoq iqsanl, heeq nia lao thaq-il laq.
38 Thailhai phal-iq neq, milgaol sinqgaol khe milkhaoq bhai pheeq khi, yu bhai heivq nail tsaol-aq liq hinl gaq hevq khi haqaiq mildai haqtsoiq haqyal bha dov-ai thaq nail Iljiltuv tsaol-aq al gaq, naol maq ngel lao thaq-il laq” dai, ge bhiq-a nail ngaol.
39 Paolluv ge nail: “Ngal neq, Gillilciv milkhaoq Daqsul meenq bhai doevq lee-a nail Yuldav nail tsaol-aq pevq khi, eeq nail meenq al meenq nail milkhaoq yaq pevq nail ngaol. Tsaol-aq thoil juq bhai daoq teevq pov bhi ge tsaoq lavq yaoq” dai, ge bhiq-a nail ngaol.
40 Aqivq al gaq Paolluv bhai, “Daoq ge tsaoq nail ya naol” dai, ge bhiq-a nail ngaol. Aq-u phao, Paolluv thaoqjoe kovtavq bhai thulphaol khi, tsaol-aq al juq bhai aqtsi tsu dai jaol nail haqbhoil, aqlavq dao bhiq-a nail ngaol. Aqyu juq aqtsi tsu dai jaol-u phao, aivq Heiqbhail daoq ge khi, niailhai ge bhiq-a nail ngaol: