Gaqkhoel
Gevq-a nail gaq
Haoqgavq niil keiv neq, khaq sil gaq-i mail gevq-a nail dai, aqmil maq gevq-ai thaq khi ngaol-aoq, milnee uqnee khe Khali yaq juq, Lulkavq-i mail gevq-a nail ngaol dai, noeq nail ngaol. Lulkavq neq, Gaqkhoel Paolluv nail ganl nl tsaoq ngaol. Paolluv, Lulkavq bhai ngadao mao-ail gaiq-a nail jagaq coev nail saqlaq dai, khul nail ngaol. Lulkavq maq ngel nail neq, Jalliq gevq-a nail yaoq gaq yaoq-ao nee Heiqbhail nail tsaol-aq ngaol. Lulkavq neq, Heiqlaqsal tsaol-aq ngaol. Heiqlaqsal daoq mao-ail heeq nia nail juq, Lulkavq haoqgavq khi Gaqkhoel haoqgavq bhai yuq-ai thaq nail daoq bhai tsiq ceiv daiq-u phao, maodai dul lai nail dai, ge nail ngaol.
Gevq-a nail aqyanq khi aqduq
Gevq-a nail aqyanq neq, A.D. 63 kovq niidai bhai gevq-a nail ngaol. Teevq gaq ganav neq, 70 kovq bhai gevq thaq nail jao-aq dai iqsanl, noeq nail ngaol. Thailhai ngaol-aoq, Gaqkhoel haoqgavq Paolluv Lolmav meenq nail thaonq bhai bhi laol-a nail ganl bhai haoqnao naosaq gevq-ai thaq nail ngaol. Paolluv thaonq bhai 61 kovq bhai bhi laol khi, thaonq lavqkhoel bhai 2 kovq bhee dai jaol khi, dov lal-a nail ngaol. Yanq al yanq bhai, Lulkavq Lolmav meenq bhai jaol khi gaqkhoel haoqgavq gevq thaq nail jao-aq dai, jemao teevq pav noeq nail ngaol. Khul khi mail dai ngal neq, Gaqkhoel haoqgavq lavqkhoel 64 kovq bhai Lolmav nail heeqphaq Neiqlol Khali yaq bhai mailma-ail khoeq bhiq jiovq bhiq-a nail ganl khi, 67 kovq bhai Paolluv bhai lav heivq-a nail ganl iqsanl maq gevq bhoel-ai thaq nail nee ovqtavq, 70 kovq bhai Yeiqlulsaqlaiq meenq peiv-ail leivq ail-a nail ganl iqsanl maq gevq bhoel-ai thaq-al.
Khaq sil gaq bhai gevq bhiq-a nail
Lulkavq haoqgavq khe-ai, Gaqkhoel nail haoqgavq iqsanl, Thaolphilluv bhai gevq bhiq-a nail ngaol.
Khul bhai noeqthunq khi gevq-a nail
Haoqgavq niil keiv neq, Heeqphaq Yeiqsul khanqsil khi gaoq doevq kovq lal khi mail, aivq nail gaqkhoel juq bhai juq khi ganl bhi nl-a nail ganl, Thaolphilluv bhai bhi heeq nia dai, gevq-a nail ngaol. Al ovqtavq, Khali yaq munl khalhai munl khi, geeqlaoq daoq Yeiqlulsaqlaiq meenq nee mail Yuldav milkhaoq, Saqmaqliv milkhaoq khi Lolmav milkhaoq doi dai, khalhai khi gaiq kev ail-a nail ganl iqsanl, gevq-a nail ngaol. Khali yaq munl khoeq nail jiovq nail phaq bhai ya daq khi ngaol-aoq, eeq lal heel lal-a nail ngaol.
1
Aqhaqlal Miqyail bhi lee naol dai, Yeiqsul saljial jaq-ai thaq nail ganl
1-2 Thaolphilluv-ol, Yeiqsul-i mail iqmoeq ilmoeq nl khi, iqmoeq ilmoeq cavq bhiq cov bhiq-a nail nee mail, aivq bhai nqtavq bha bhi tsiqdal laivq-a nail ganl bhai kev dai, haoqgavq iqmoeq khe keiv nail lavqkhoel bhai, ngal naoq bhai gevq bhiq-a nail ngaol. Aivq bhai maq tsiqdal laivq-u nee mail, Yeiqsul Meeqnail Haolnail Aqhaqlal bhai juq khi, aivq-i mail tsel dov-ai thaq nail gaqkhoel juq bhai, daoq bivq-ail ceevq-a nail ngaol.
3 Aivq sil khi gaoq doevq kovq lal-a nail ngaol dai, aqyu juq heeq duq nia lal dai, Yeiqsul aqyu juq bhai mee nia phaq nl daiq bhiq-a nail ngaol. Liq tsel n nail lavqkhoel, gaqkhoel juq bhai aivq nail aqmaol bhi moel khi, Miqyail Milkhaoq nail ganl cavq bhiq cov bhiq-a nail ngaol.
4 Teevq pov aqyu juq jil lai khi aoq jaq-u phao, Yeiqsul aqyu juq bhai ge bhiq-a nail: “Yeiqlulsaqlaiq meenq nee mail thaq dov ail haq lao dei-eiq. ‘Ngal nuljuq bhai bivq naol’ dai, Aqbhu Miqyail-i mail ge-ai thaq nail khe-ai, nuljuq ya-u kev dai, daonq dei-eiq dai. Ganl niil aq-u phao, ngaq-i mail cavq nail cov nail bhai, nuljuq ya gaiq-a nail ngaol.
5 Yaolhaq yu bhai ulcuvq lavqkhoel-ai ulcuvq saol bhiq-a nail ngaol. Nuljuq mao-ail maq maoq lal mail, Meeqnail Haolnail Aqhaqlal nail lavqkhoel, ulcuvq ya saol naol” dai, ge bhiq-a nail ngaol.
Yeiqsul kovq dav lai-a nail ganl
6 Aqyu juq kovq jil lal khi jaol-u phao: “Heeqphaq-ol, niil aq-il naol Ilsaqleiqlal nail jeq-e jaq-a bhai milkhaoq bivq kovq naol laiq” dai, aqyu juq Yeiqsul bhai naldaiq-a nail ngaol.
7 Yeiqsul aqyu juq bhai ge kovq bhiq-a nail: “Aqbhu Miqyail aivq bhai aivq noeqceiv-ai thaq nail yanq bhai nuljuq heeq kivq nail maq loq-ail.
8 Meeqnail Haolnail Aqhaqlal nuljuq nail kovtavq bhai lee kev-u phao, nuljuq bhaqaoq ya naol. Aq-u phao, Yeiqlulsaqlaiq meenq nee mail, Yuldav milkhaoq, Saqmaqliv milkhaoq khi mail, nqjail miljail bhai kev dai, nuljuq ngaq nail salkhil khanq nail tsaol-aq ya pevq lal naol” dai, Yeiqsul aqyu juq bhai ge bhiq-a nail ngaol.
9 Aivq alhai ge gaq khi, gaqkhoel juq aivq bhai heldaiq-u phao, aivq bhai tsiqdal laivq-a nail ngaol. Aq-u phao, nqdil aivq bhai uvthaiq-ai thaq nail ngel-i mail, aqyu juq aivq bhai maq moel nia-al.
10 Yeiqsul kovq dav lai nail bhai gaqkhoel juq heldaiq cov-ai thaq-u phao, aqgaq aqdoi phulleq dai, doi-nq thaq nail tsaol-aq nvq gaq thaiqphuq dai, dov lee khi, aqyu juq nail aqjail bhai thulphaol lee-a nail ngaol.
11 Aqyu nvq gaq ge nail: “Gaqliqlail tsaol-aq juq-ol, khul khi mail nuljuq nqtavq phao gaollel khi heldaiq thailthaiq nail-aiq. Nuljuq nee mail pav-ail khi nqtavq kovtavq bha tsiqdal laivq-a nail bhai, ya daq-a nail Yeiqsul neq, nuljuq nail sivtavq nee nqtavq kovtavq bha kovq dav lai-a nail khe-ai, teevq pov gaoq yavq kha lee nail ngaol” dai, ge bhiq-a nail ngaol.
Yuldav nail dodal tsel phal-a nail ganl
12 Aq-u phao, gaqkhoel juq Saqloq dai khul nail gaoqjaoq nee mail Yeiqlulsaqlaiq meenq bha kovq ail-a nail ngaol. Gaoqjaoq al jaoq neq, Yeiqlulsaqlaiq meenq nee mail maq eq-ail. Jaol n n-gaol tsao khaoq nail ee dai, eq-ail teevq-eel ngaol.
13 Aqyu juq meenq bhai kovq kev ail khi, aqyu juq yavq nail ilkhaol pultavq khe teiv-nvq bha dav lai-a nail ngaol. Aqyu juq neq, Bheiqtuvluv, Yaolhaq, Yaqkov, Aqdaiqlaiq, Pillilpuv, Tholmav, Bhaqthaollaqmail, Maqthaiq, Aqlaqphail nail yaqyov Yaqkov, Seiqlul dai khul nail Silmoq khi mail Yaqkov nail yaqyov Yuldav niil juq ngaol.
14 Aqyu juq iqsanl mail teevq gaq khe-ai, geeqlaoq hal hal-ail jaol nail ngaol. Aqyu juq nee mail jaol nail juq neq, yaqmai-aq juq, Yeiqsul nail aqma Maqlil khi mail, Yeiqsul nail jaqbheq juq ngaol.
15 Teevq pov, aqivq jaqbheq Khali yaq juq teevq yal nvq tsel gaq gaoq jil lai khi jaol-u phao, Bheiqtuvluv aqyu juq nail sivtavq bhai thulphaol khi ge nail:
16 “Aqivq jaqbheq juq-ol, Jalliq lavqkhoel bhai gevq-ai thaq nail daoq niil daoq maldil ya bhee lal naol. Yeiqsul bhai nieivq lal-a nail juq bhai gailkhaol hevq daiq bhiq-a nail Yuldav nail ganl, Meeqnail Haolnail Aqhaqlal iqmoeq-u nee Daqbhil bhai juq khi ge-a nail daoq al daoq ngaol.
17 Yuldav al gaq, ngadao nail munl lavqkhoel bhai jaol khi, ngadao nee mail teevq gaq khe-ai ganl nl-a nail ngaol.
18 Aivq mao-ail haqeiv nail phaq nl khi, ya-a nail aqphoiq nee mail miltsaq teevq tsaol ul-a nail ngaol. A bhai nee ngal-aq, aivq uqhuq daoq pov phaq-ail ga-ail khi, aivq nail ovqmav pav-ail khi, aqul iqsanl mail, ga dov lee-a nail ngaol.
19 Ganl niil ganl Yeiqlulsaqlaiq meenq bha jaol nail tsaol-aq iqsanl mail ya gaiq-a nail ngaol. Alheel ngel-i mail, miltsaq al tsaol bhai aqyu juq nail daoq Aqjeiqdaqmal dai khul nail ngaol. Daoqceevq neq, aqsivq nail miltsaq dai, ge movq nail ngaol.
20 Tsiqeeq nail haoqgavq lavqkhoel bhai niailhai gevq-ai thaq nail ngaol:
‘Aivq nail ilkhaol
iltsoiq tsoiq-ail khi
tsaol-aq maq jaol dai
bhi jiav dei-eiq.
Aivq nail alyaq iqsanl
yu bhai bivq yaoq’ dai,
gevq-ai thaq nail ngaol.
21-22 Alheel ngel-i mail, Yeiqsul gaoq doevq kovq lal-a nail ganl, ngadao juq nee mail salkhil tsao khanq nail teevq gaq tsel dov heeq phaq-ail tsaq nail ngaol. Tsaol-aq al gaq neq, Heeqphaq Yeiqsul Yaolhaq nail aqlavq lavqkhoel bhai ulcuvq saol-u n-gaol nee, Yeiqsul kovq dav lai-u n-gaol kev dai, ngadao juq nee mail tsao tsao-ail, ngadao juq nee mail jaol nail teevq gaq ya pevq naol” dai, Bheiqtuvluv ge bhiq-a nail ngaol.
23 Aq-u phao, aqyu juq tsaol-aq nvq gaq bhai bhi tsel-a nail ngaol. Iqmoeq khe gaq nail aqmil neq, Yaolsai Bhaqsaqbhal dai khul khi, Yulthul dai iqsanl khul nail ngaol. Nvq gaq teevq gaq neq, Maqthil dail khul nail ngaol.
24-25 A bhai nee ngal-aq, aqyu juq geeqlaoq hal hal-ail ge nail: “Tsaol-aq iqsanl nail neema bhai heeq nia nail Heeqphaq-ol, Yuldav neq, saqlaq nail alyaq khi gaqkhoel nail alyaq khaonq-ail ceevq khi, aivq bhai geel-nvq nail jaol duq bhai lai-aoq nail ngaol. Alheel ngel-i mail, aivq nail haqbhoil ganl nl khi, gaqkhoel nail alyaq ya dai niil nvq gaq nail lavqkhoel, naoq-i mail tsel dov-a nail gaq bhai ge lavq yaoq” dai, geeqlaoq hal-a nail ngaol.
26 A bhai nee ngal-aq, aqyu nvq gaq nail aqmil gevq khi, eellaoq bheq-u phao, Maqthil bhai tsaq lai-a nail ngaol. Alheel ngel-i mail, Maqthil neq, gaqkhoel tsel-nvq gaq nee mail jaol nail alyaq ya-a nail ngaol.