20
Abraham uthene Sarah uthene apmere Gerar-ele
1 Abraham apmere yanhe imperle-alhemele alheke antekerre-werne re apmere arrangkethe Negev-werne, rarle anetye-alpeke-werne Kadesh uthene Shur uthene mpwepele. Yanhenge re alheke anteme apmere Gerar-werne.
2 Nhenge rarle yanhele anemele re tyerrtye areyeke ileke anewikwe-arle Sarah-arle, re akwele yaye ikwerenhe. Kenhe Akngerrepate Abimelech Gerar-arenyele Sarah ineke apmere akngerre ikwerenhe-werne akngemele.
3 Kenhe Ngkarte akenhe Abimelech-eke altyerrenge-arle apetyerlenge imerte ikwere angkemele, “Awaye! Unte kwenhe ilwetyenhe arelhe unte-arle ineke yanhe kwenhe kele anewe-akerte.”
4-5 Kenhe Abimelech akenhe ikwerenge intetyakenhe-arle Ngkarteke angkeke, “Ayenge atwetyale! Ayenge-arle Sarah-enge intetyakenhe-arle. Abraham-elarle ileke rarle akwele yaye ikwerenhe, kenhe re-arlke angkeke Abraham akwele kake ikwerenhe. Ayenge-arle akurne irretyeke kwenye-arle aneke, ayenge-arle itirreke apele mwerreke-athene.”
6 Ngkarte Abimelech-eke angkeke altyerre arrpenhenge:
“Kele The itelareme unte mwerre akwele mpwaremeke-athene. Alakenhenge akwele The ngenhe ayakeke Sarah-enge inteme-ketyenge akurne-arlke irreme-ketye.
7 Kele arelhe yanhe ikwere anewe-werne iparrpe yernirtnaye rarle kwenhe Atyenge angkemenge, re kwenhe Atyenge angketyenhe ngkwenge arrkngente angketyenhe-arlke. Kele, unte apeke renhe ikwere anewe anthirtnetyakenhe, kele unte ngkwenge-artweye areye-arlke ilwerlenge.”
8 Ingweleme anteme Abimelech re akeme-irreke-arle urrkapentye ikwerenhe areyeke antangkemele, re anteme itnenhe ileke nthakenhe-arle-irreke altyerre ikwerenhenge kele itne atere-arle-irrerlenge.
9 Abimelech imerte Abraham-eke anteme antangkelhemele apetyetyeke:
“Araye unte-arle anwerneke mpwareke! Ayenge-arle ngkwenge akurne irretyakenhe-arle. Ngkarte anteme ahentye-aneme atyenge akurne mpwaretyeke tyerrtye atyinhe areye-arlke ngkwenge-ngentyele ware.
10 Nthakenhe-ame unte itirreke ngkwenge anewe-akerte urrtyirremele?”
11 Abraham angkirtnerlenge:
“Ayenge urrtyirreke ayenge-arle itirrekenge tyerrtye areye Ngkarteke akangkwe-irretyakenhe apmere nhenhele, ayenge itirreke arrpenhele ayenge-arle atwerrirretyenheke anewe atyinhe inetyenhenge.
12 Kele, arratye-arle akenhe. Re kwenhe arratye yaye atyinhe. Akngeye ilerne-kenhe anyente aneme, meye ilerne-kenhe akenhe arrpenhe-arle.
13 Ngkartele ayenge ileke apmere akngeye atyinhe-kenhe impemele alhetyeke unthemele, the renhe ileke, ‘Unte apeke atyenge arratye ahentye-aneme unte tyerrtye arrpenhe areyeke iletyeke ayenge atyeye ngkwinhe-arle.’ ”
14 Abimelech-ele anteme Abraham yepe-yepe areye antheke, pweleke-arlke, urreye uthene marle uthene urrkapentye akngerre areye-arlke. Re Sarah yernirtneke ikwere-werne.
15 Abimelech-ele Abraham ileke re apmere arerle-anetyeke apmere nthenhele-arle re anetyeke ahentye-aneme.
16 Re anteme Sarah-eke alakenhe angkeke, “The atyeye ngkwinhe antheke ngkweltye silver 1000-pele anthurre tyerrtye areyeke imernemele unte-arle akurne-irretyakenhe-arle.”
17-18 Kele Ngkartele ayakeke anewe Abimelech-kenhe-arlke urrkapentye akngerre ikwerenhe areye-arlke ampe atnyeneme-ketye Abimelech-elarle Sarah inekenge, anewe Abraham-kenhe. Kele Abraham-ele Ngkarte apayuthneke Abimelech mwerre-iletyeke itne anteme ampe anteme atnyenewarretyeke.