95
Ii Apuri warartakur kantamruami
1 Ii Apuri warartakur kantamruami tusaram winitaram.
Iin ejarmak uwemtikramin asamtai kantamruami.
2-3 Ii Apuringkia Yusketai tura juuntaitai.
Tura mash aints ainau yusri nangkamasketai.
Tura asamtai maaketai tusar ni pujamurin wayaawarmi.
Turasha ameketme juuntam tusar kantamruami.
4 Nungka nitkarin ainia nusha mash niinu ainawai.
Tura mura timiá juun ainausha niinu ainawai.
5 Tura juun entsancha tura nungkancha ningki ni uwejejai najanau asa niinuitai.
6 Yus iinka najatmau asamtai,
tikishmatrar ii Yusri warartusmi tusaram winitaram.
Tura ii Apuri maaketai takur tikishmatrarmi.
7 Ningki ii Yusrintai.
Tura asamtai iisha ni aintsri ainiaji.
Tura asakrin uwija wainin ni uwijarin wainua nunisang iincha waitmaji.
Yus atumin turama nuka yamaikia antuktaram:
8 “Yamaikia wina chichamur antukrumka,
nakitsuk pengker anturtuktaram.
Atumi juuntri ainau yaanchuik nungka Meriba tutainum tura chikich nungka Masa tutainum aints atsamunam wekainak wina chichamrun nakitrarmia nunisrumka nakitrairap.
9 Nuningkia wi turamurun waininayat,
atumi juuntri ainau winaka nekaprinak umirtukcharmiayi.
10 Turinau asaramtai wikia cuarenta (40) musach nu aints ainaun kajerkaran:
Nuka tuke nintinchawa nunisarang asar,
wina chichamrun umirtutan nakitinawai timiajai.
11 Tura kajerkaran chicham yapajiachminun chichaarinakun:
Wi Yus asan,
pengke nungkanam tuke pujustinnaka tsangkatkashtatjarme timiajai”.