85
Apuru ami aintsrum ainauka pengker awajnuyame
1 Apuru ami aintsrum ainauka pengker awajnuyame.
Tura Jacobo weauri ainausha ataksha waramtiksamame.
2 Tura ami aintsrum ainau tunaari tura ni pasé turamu risha mash tsangkuramame.
3 Tura kajekartukmaurumsha tuke mash inaisamame.
4 Yusru iin tunaanumia uwemtikiartin asam,
yamaisha tuke uwemtikiartukta.
Tura yamaikia iinka kajerkartutsuk pengker awajkartusta.
5-6 ¿Iinka tuke paseeka awajkartutsuk wina aintsur ainau wina warartursarti tusamka,
pujut yamarmaka ataksha sukartuschatmeash?
7 Apuru ami anengkratairam iwianturkata.
Turam tunaanumia uwemtikiartukta tusan seajme.
8 Ataksha nintinchau pujusarai tusa,
ii Apuri umirkatin ainautin pengker nintimsar angkan pujusartinniun pachis chichartamkatatji.
Tura asamtai ii Apuri titata nunasha wisha antuktatjai.
9 Yus ni kakarmarijai ii nungkarin pujustas wakerawai.
Tura ni umirkur pujuinautinka nekas uwemtikramratas wakerawai.
10 Yus iijai pujamtaikia,
ni wait anengkratairi tura ni chichame nekas aa nunaka iin suramsatnuitji.
Tura angkantin pengker nintimsar pujustinasha tura tunaarinchau pujustinasha iin suramsatnuitji.
11 Tura asamtai ju nungkanam pujuinautisha nekas chicham aa nuke chichastinuitji.
Nu turakrin Yus nayaimpinam puja nu iincha pengker awajtamsatnuitji.
12 Turasha ningki yumin jitumtikratnuitai.
Tura ii nungkarinian arakan tsapamtikiatnuitai.
13 Tura ni pengker awajsamurin iin iwianturmak:
Atumsha tu pujustaram tusa jintintramatnuitji.