81
Yuska iin kakamtikramratnuitji tusaram warasrum kantamataram
1 Yuska iin kakamtikramratnuitji tusaram,
warasrum kantamataram.
Tura Jacobo Yusri warartakrum kakarum chichaktaram.
2 Tura tampurjai tura kitarrjai tura arpajaisha tuntuikiamaikiakrum kanta kantamataram.
3 Tura nantu takaamtai pupun pupuntruataram.
Nuniasha nantu pamau yuwamtaisha,
ii fiestari kinta asamtai,
pupun pupuntruataram.
4 Ii Yusri ni aintsri ainautin nu chichamka umiktaram tusa akupturmakmiaji.
5 Tura Yus Ejiptonmaya ainaun nepetkatas nu chichamnaka Josén akuptukmiayi.
Nunia wi antushtain chichaman antukmiaja nu nuwaitai:
6 “Atum meram entsakua nunisrumek pujarmin,
takatrum uyumtin amia nunia angkan awajsamiajrume.
7 Atumka wait wajakrum pujau asaram,
wina untsurkamiarme.
Nu turakrumin wikia uwemtikramiajrume.
Tura mukuntiunmaya ipiamat chichamia nunian wikia aikmiajrume.
Tura juun entsa kaanmatkarin Meriba tutainum atumnasha nekapsamiajrume.
8 Wina aintsur ainautiram anturtuktaram.
Wikia atumin chicharkatatjarme.
Israel ainautiram,
wina anturtuktaram tusan wakerajrume.
9 Chikich nungkanmaya aints ainau yusringkia seairap.
Turasha chikich nungkanmaya aints ainau yusrin seatasrum tsuntsumruwairap.
10 Wiitjai atumi Apuri.
Wiitjai atumi Yusri.
Wiki atumniaka Ejipto nungkanmaya jiikmiajrume.
Tura asamtai yamaikia atumi jangke awaartaram.
Turakrumin wi atumin yuratatjarme.
11 Wi tamaitiat wina aintsur ainau wina chichamrun antutnasha tura umirtutnasha nakitrarmiayi.
12 Tuminau asaramtai tuuksha pujusarti tusan inaisamiajai.
Wi turam ni wakeramurin pujusarmiayi.
13-14 Wina aintsur ainau wina anturtukaruitmatikia,
aints mitsum mitsum wajawa nutiksanak ni nemase ainaunka mengkatkartinuyajai.
Tura Israela weari ainau wina jintarun amakaruitmatikia,
ni nemase ainaunka wait wajaktintrin susartinuyajai”,
Yus timiayi.
15 Ii Yus umirkawaitkurningkia,
ii Apurin nakitina nuka
shamraminak ayaararmin ainawai.
Turasha tuke mengkaakarmin ainawai.
16 Ii Yusri anturkamuitkungka,
ni aintsri ainautinka yuta nekas pengker aa nuna yurtamamnauyaji.
Tura kitaknasha mikturmamnauyaji.