8
Yuse kakarmari pachisar kantamruami
1 Apuru iinu Yusri asam,
mash ainia nu inawaitme.
Nayaimpinam ame najanamu ainauka mash shiiram asaramtai,
wikia ami naarmin pachisan:
Ameketme juuntam tajame.
2 Ami nemasem ainau amin nakitraminak yapaijkiami tinu ainau itatmamtikiatasam,
uchi kuwirach ainausha amin nekasar pengker awajtamsartas maaketai turutiarti tusam tsangkatu weame.
3 Wikia nayaimpin ame najanamu ainaun jiisan,
nantuncha tura yaancha nuni ketinau jiisan amijai chichaakun:
4 Aintsti mianchau arincha,
¿waruka timiá anengkratme? Aintsti jakatin arincha,
¿waruka timiatcha nintimturkartusmesha pujame?
5 Aints ainautikia yamaik jakatin asakrin,
antsu ame awemamurmeka jakashtin asaramtai,
aintstin nangkamasmek pengker najanamiame.
Turayatum aintstinka amea tumau najakratau asam,
timiá pengker awajkartusmiame.
6 Tura mash najanamuram ainaun aints ainauti inararti tusam tsangkamkamiame.
Tura mash najanamuram ainau aintsti ainautin umirkarmi tusam najanamiame.
7 Uwija ainau tura waaka ainausha tura pachim ainausha,
8 tura nanamtin yakí nanamin ainausha tura namak ainausha tura juun entsanmaya ainausha mash aints ainau inararti tusam tsangkamkamiame.
9 Apuru iinu Yusri asam,
mash ainia nu inawaitme.
Tura asakmin ami naarmin pachisan:
Ameketme juuntam tajame.