62
David: Yusnau asan angkantaitjai timiauri
1 Yusnau asan angkantaitjai.
Iin uwemtikramratnuka nuketai.
2 Ningki wina uwemtikrurtinuitai.
Ningki wina ejarkatnuitjai.
Ningkitai wina waitkatnuka.
Tura asamtai wikia natsaamtsuk pujusminuitjai.
3 ¿Wina nemasur ainausha waruka winasha nepetukartascha wakerutinawa? Wikia wenuk pukuutanak wajasua nunisketjai.
4 Tuke nepetukartas nintimturinawai.
Turasha wait chichaman tuke wakerinawai.
Ni jangkejaingkia pengke aintsuitme turutinayat,
ni nintimaurijaingkia pasé nintimturinawai.
5 Antsu Yus wina yainkati tusan nakajai.
Angkan pujustinka Yusnumiayaintai.
6 Ningki wina uwemtikrurtinuitai.
Ningki ejarkatnuitai.
Ningkitai wina waitkatnuka.
Tura asamtai wikia natsaamtsuk pujusminuitjai.
7 Yusketai wina uwemtikrurtinka.
Tura asa ningki wina pengker awajtustinuitai.
Tura ningkitai wina ejarkatnuka.
Turasha ningki winaka waitkatnuitai.
8 Wi wear ainautiram,
Yus tuke nintimtustaram.
Tura Yus seakrumka,
pengker nintimsaram nijai chichastaram.
¡Ningkitai iin waitmaktinka!
9 Aints kuikiartichu ainausha tura kuikiartin ainausha mash nangkamiar pujuinawai.
10 Atumka mangkartutka tura chikich ainau jeen wayaaram warinchurin kasamkaram jukitnuka nintimsairap.
Tura kuikiartin wajakrumsha,
atumi kuikiaringkia wararsairap.
11-12 Yus tímia nunaka untsuri antinuyajai.
Wi anturnuyaja nuka nuwaitai:
Kakarmaka tura wait anengkrataisha Yusnumiayaintai.
Tura ningki aints ainautin ii turamurijai metek yapaijtamkiatnuitai.